De Vorsterman Bijbel

§ Dat .xvi. Capittel.

1

⁺ENde ic beueel v Pheben onse suster: die inden dienst is der kercken tot Chenchre,

+ A

2

dat ghi haer ontfangen wilt inden heer, also alst den heyligen betaemt, ende wilt haer by staen in allen saken, daer si uwer in behoeft. Want dese stater veel by, ende oeck my seluen

3

Groetet Priscam ende Aquilam mijn mede hulpers in Christo Iesu,

4

die voor mijn leuen, haren eygen hals onder geset hebben, den welcken ick nyet alleen dancke, maer oock allen kercken der heydenen.

5

Desgelijcs (groet) die vergaderinge die in haren huyse is. Groet Epenetum mijnen liefsten: die welcke is dye eerste vrucht van die kercke in Asien, in Christo Iesu.

6

Groet Mariam, die veel in v ghearbeyt heeft.

7

Groet Andronicum ende Iuliam mijn maghen, ende mede gheuangen: de welcke vernaemt zijn onder die Apostelen die oec voor mi geweest zijn in Christo Iesu

8

⁺Groet Ampliatum minen beminden inden heer.

+ B

9

Groet Vrbanum onsen hulper in Christo Iesu ende Stachin minen lieuen.

10

Groet Apellen in Christo beproeft.

11

Groet den ghenen, die van Aristobolus huys zijn. Groetet Herodianem minen mage. Groet die daer zijn

[p. I6r]

van Narciscus huys, die ghene die inden heere zijn.

12

Groet Thryphenam, ende Thryphosam, die ghearbeyt hebben inden heere. Groet den beminden Persiden, die zeer gearbeyt heeft inden heere,

13

Groet Rufum den wtuercoren inden heere, ende zijn moeder ende mine.

14

Groetet Asynerecum, Philegontem. Herman, Patrobam, Herman, ende dye broeders die met haer zijn.

15

Groet Philologum, ende Iuliam, Nereum, ende zijn suster, ende Olympiadem, ende alle die heyligen die met dese zijn.

16

Groet malcanderen met eenen heylighen cusse. Alle die kercken Christi groeten v.

17

Ende ick bidde v broeders, dat ghi waerneemt dye tweedracht, ende erghernisse voortbrenghen, sonder die leeringe, die ghi geleert hebt, ende wilt haer schouwen.

18

Want die sodanich zijn, en dienen niet den heere Iesu Christo, maer haeren buyck. Ende door soete sprekinghe, ende smeekerie, verleyden si die herte der onnoselen.

19

Want v gehoorsaemheyt is ouer al openbaer gheworden. Daerom verblijde ick mi sekerlijcken van v. Ic wil, dat ghi wijs zijt int goet, ende simpel int quaet.

20

Ende Gods des vrede, sal geringhe ontwee treden den Satanam onder v voeten. Die gracie ons heeren Iesu Christi, ⁺ si met v.

+ D

21

Tymotheus mijn mede wercker, ende Lucius, ende Iason, ende Sosipater mijn magen groeten v.

22

Ick tercius die den brief ghescreuen heb, inden heere groete v.

23

Gayus mijn weert ende die geheele gemeente groet v. Erastus der stad rentmeester groet v, ende Quartus die broeder.

24

Die gracie ons heeren Iesu Christi, moet zijn met v allen. Amen.

25

Ende den ghenen die machtich is v te vestigen na mijn Euangelien, ende predicatie Iesu Christi, na die openbaringhe des verborgentheyts, van eewighen tijden gesweghen,

26

maer nv geopenbaert door die scriftueren der Propheten, nae tbeuel des eewighen Gods, die bekent ghemaect is, tot gehoorsaemheyt des geloofs, onder alle heydenen,

27

dien God die alleen wijs is, moet zijn door Iesum Christum, glorie inder eewicheyt, Amen.

§ Gheschreuen te Corinthen, ghesonden tot den Romeynen met Pheben, welcke was een dienaersse der kercken tot Cenchren.