De Vorsterman Bijbel

§ Dat .xv. Capittel.

1

⁺WI dye stercker zijn, zijn schuldich die crancheden der crancker te draghen ende nyet ons seluen te behaghen.

+ A

2

Laet een yeghelick van ons zijnen naesten behagen, int goet tot stichticheyt.

3

Want Christus en heeft hem seluen nyet behaecht. Maer ghelijcker ghescreuen is. Die versmaetheden der ghenen, die v versmaedende waren, zijn op my gheuallen.

4

⁺+ Want alle dinghen dye ghescreuen zijn, ⁺ zijn tot onser leeringhe gheschreuen, op dat wij door verduldicheyt, ende troost der scriftueren, hoop souden hebben.

+ B

+ psal. xcviij

5

Ende god des verduldicheyts, ende troostinghes, verleene v dat selue te samen onder malcanderen te gheuoelen, nae Iesum Christum,

6

op dat ghy eendrachtelic met eenen mont, god glorificeert, ende den vader ons heeren Ihesu Christi.

7

Daer omme neemt malcanderen op, ghelijck als Christus v op ghenomen heeft, tot gods eere.

[p. I5v]

8

Ick segge, dat Iesus Christus gheweest is een dienaer van dye besnidenis, door die warachticheyt gods, om te beuestighen die belooftenisse der vaderen.

9

Maer dye heydenen god te eeren, op dye barmherticheyt: alsser gheschreuen is. ⁺ Daer om sal ick v belijden heere inden heydenen, ⁺ ende dinen name singhen.

+ C

+ psal. xvij.

10

Ende weder om seyt hy. ⁺ Verblijt v ghy heydenen, met zijn volck.

+ psal. c.xvi.

11

Ende weder om looft den heere alle volck: maect hem groot.

12

Ende weder om seyt Esaias. ⁺ Daer sal een wortel Iesse zijn, die op risen sal, om te regeren den heydenen. In hem sullen die heydens hopen.

+ Esaie. xi.e

13

Ende god des hoeps moet v veruullen met alle vruechde, ende vrede int geloouen, op dat ghi oueruloedich muecht zijn, inden hoep, ende cracht des heylighen gheests. *

14

Want mijn broeders. Ick ben seluer seker van v, dat ghi vol liefden zijt, veruult met alle wetenschap, machtich zijnde, oock malcanderen, dye een den anderen te vermanen.

15

Maer nochtans broeders, heb ick v stoutelicker gheschreuen, eens deels, als vermanende v om der gracie, dye welcke my van god ghegheuen is,

16

daer toe, dat ick een dienaer mach zijn van Ihesu Christo, onder den heydenen, heylichmakende Deuangelie gods, op dat dye offerhande den heydenen aengenaem mach worden, ende geheylicht door den heylighen gheest.

17

⁺So heb ic dan glorie in Christo Iesu tot god.

+ D

18

Want ick en derf nyet spreken yet van tgheen, twelcke Christus door my nyet ghedaen en heeft: tot gehoorsaemheyt der heydenen, met woorden ende wercken,

19

door cracht der teykenen ende wonderlicheyden, door dye macht des heylighen gheests, hoe ick van Ierusalem ende inden landen daer omtrent ligghende, tot Illiricum toe, veruult hebbe dat Euangelium Christi.

20

Also heb ick dat Euangelium ghepreect, niet daer Christus genoemt was. Op dat ic niet op eens anders fundament soude timmeren.

21

Maer gelijcker ghescreuen is, ⁺ den ghenen die van hem niet vercondicht en is, sullen hem sien: ende diet niet gehoort en hebben sullent verstaen.

+ Esaie. lij.d

22

Waer om, dat ick seer worde behindert te comen tot v, ende tot noch toe ben ick belet.

23

Maer nv voort aen: ick gheen plaets hebbende, in dese landen, ende van veel iaren af, een begheerte hebbende tot v te comen.

24

Soe wanneer ick mijnen wech legge nae Spaengien: sal ick tot v comen. Want ick hoope dattet gheschien sal, dat ick der-[kolom]waerts mijnen wech makende, v sien sal, ende van v derwaerts geleyt worden. Ist nochtans, dat ick eerst van uwer vrientschap een deel veruult worde.

25

⁺Ende nv reyse ick te Ierusalem, den heyligen te dienen.

+ E

26

Want het heeft goet gedocht dye van Macedonien ende Achaien een deelinghe te doen voor die arm heyligen die te Ierusalem zijn,

27

want het heeft haer behaecht, ende si zijn haer schuldenaren. Want ist dat si haer gheestelike goeden den heydenen ghedeelt hebben, so zijn si oock schuldich haer in vleeschelijcke dinghen te dienen.

28

Daer om als ick dit volbracht heb, ende haer den vrucht toe gheschict, sal ick door v weder keeren in Spaengien.

29

Want ick weet als ic tot v comen sal, dat ick comen sal met volheyt der benedictien Christi.

30

Daer om bid ic v broeders, door onsen here Iesum Christum, ende door dye liefde des heylighen gheests, dat ghi my helpen wilt met v gebeden voor my, by god,

31

op dat ick vanden ongeloouigen in Iudeen verlost mach worden, ende dat die offerhande mijns diensts ontfanckelic mach worden den heyligen in Ierusalem,

32

op dat ick met bliscappe tot v mach comen duer die wille gods, ende tsamen met v vermaect mach worden,

33

ende god des vredes si met v allen. Amen.