De Vorsterman Bijbel

§ Dat .xiiij. Capittel.

1

⁺DEn ghenen die cranck is int gheloof, neemt op: niet in kiuinge der gedachten

+ A

2

Die een gelooft, datmen alle dinc eten mach Een ander die cranc is, eedt moes.

3

Die daer eedt: die en laet niet versmaden, die daer niet en eedt: ende die nyet en eedt, en oordeel niet dye daer eedt. Want god heeft hem op ghenomen.

4

Wije zijt ghy, dye eenen vreemden knecht oordeelt? Hy staet, oft hi valt zijnen heer, immer sal hi staen, want god is machtich te maken dat hy stae.

5

⁺Ende een ander oordeelt tusschen dach ende dach, mer die ander oordeelt van elcken dach. Een yegelijcke si in zijnen sin oueruloedich.

+ B

6

Die den dach onderscheyt, onderscheyt den heere, dye eedt, dye eedt den heere, want hy danct god, ende die niet en eedt dye en eedt niet den heere, ende danct god.

7

Want nyemant van ons en leeft hem seluen, ende nyemant en sterft hem seluen.

8

Tsi dat wi leuen, wi leuen den heer, tsi dat wi steruen, wij steruen den heer. Daer om leuen wi oft steruen wij, wi hooren den heer toe.

9

Want daer toe is Christus ghestoruen, ende verresen: op dat hi ouer dooden ende leuendigen heerschappie soude hebben.

10

Mer waer om oordeelt ghi v broeder? oft oeck waer om versmaet ghi uwen broeder? wi sullen alte samen staen, voor die rechterstoel Christi.

11

Want daer gescreuen is. ⁺ Ic leue spreect die heere, want mi sal alle knie ghebuycht worden, ende alle tonge sal god beliden

+ Esa. xlv.d

12

Daer om sal een yegelic van ons, god rekeninge geuen, van hem seluen.

13

Daer om laet ons [kolom] voort meer malcanderen niet oordeelen.

⁺ Maer oordeelt dat lieuer, dat den broeder gheen scandalizacie ende oorsaeck des vals geleyt en wort.

+ C

14

Want ick weet, ende betrouwe inden heere Iesum Christum, datter niet gemeen en is door hem seluen, dan den ghenen die rekent wat gemeen te wesen, dien seluen ist gemeen.

15

Ist dat v broeder bedroeft wert om der spise, so en wandelt ghy nv niet nae die liefde. En wilt niet verliesen met dijnre spijse den ghenen, voor welcken Christus ghestoruen is.

16

Daer om, maect dat ons goet nyet gheblasphemeert en worde.

17

Want dat rijck gods en is niet spijs ende dranck, maer rechtueerdicheyt, ende vrede, ende vrucht inden heyligen gheest.

18

Want so wie door dese Christo dient, die behaecht gode, ende is vanden menschen ghepresen.

19

⁺Daer om laet ons achteruolgen, dat den vrede aengaet, ende den stichticheyt, den eenen teghen den anderen.

+ D

20

Ende wilt nyet om der spijse wil gods wercken verderuen. Alle dinck is reyn, maer tis den mensch quaet, die door scandalizacie eedt.

21

Het is goet gheen vleesch te eten, noch oeck wijn te drincken, noch yet door welcke v broeder hem stoet, oft verargert wort, oft cranck wort.

22

Hebt ghy gheloof? hebtet v seluen, voor god. Salich is hi die hem seluen niet en oordeelt, in dat gheen dat hy prijst.

23

Dye daer oordeelt dye is verdoemt, ist dat hi dat eedt, want hi en etet niet wten gheloof. Ende wat wten gelooue nyet en is, dat is sonde.