De Vorsterman Bijbel

§ Dat .v. Capittel.

1

⁺DAer om gerechtuaerdicht zijnde wten ghelooue, ⁺ laet ons vrede hebben tot God, door onsen Heere Ihesum Christum

+ A

+ Ephe. ij.d

2

Door welcken wij eenen toeganck hebben door tgheloue in dese gracie, in welcke wij [kolom] staen, ende glorieren inden hoop des glorien, vanden kinderen gods.

3

Ende dat niet alleen, mer wij glorieren oock in ons tribulatie, wetende dat tribulatie pacientie werct,

4

pacientie proeuinghe, ende proeuinghe hoop,

5

voort hoop en bescaemt niet. ⁺ Want die liefte Gods is wt ghestort in onse herten, door den heiligen geest, die ons gegeuen is.

+ Iaco. i.c.

6

⁺Want waer toe is Christus anders als wij cranck waren nae gheleghentheyt des tijts ghestoruen voor dye boose?

+ B

7

want voor een rechtuaerdich nauwelic yemant sterft, mer voor eenen goeden by auontuer yemant soude dorren steruen.

8

God die bewijset zijn liefde in ons.

+ Want als wi noch sondaers waren nae der tijt,

9

is Christus voor ons gestoruen. Daer om veel te meer gherechtuaerdicht wesende nv door zijn bloet, sullen wij behouden worden, door hem van die toornicheyt.

10

Want ist dat wi versoent zijn god, door den doot zijns soons, als wij noch vyanden waren. Veel meer versoent zijnde, sullen wi behouden worden door zijn leuen.

11

Ende nyet alleen dat, maer oock glorieren wij in God, door onsen Heere Ihesum Christum. * Door welcken wij nv versoeninghe ontfanghen hebben.

12

Daer om gelijckerwijs door een mensche die sonde in die werelt gecomen is, ende door die sonde den doot, ⁺ ende also heeft door alle menschen den doot ghegaen. Inden welcken si alle ghesondicht hebben,

+ C

13

want tot die wet toe, was die sonde in die werelt. die sonde en wort niet aenghetijet, als daer gheen wet en was.

14

Maer dye doot heeft gheregneert van Adam tot Moysem toe, ooc in dye ghene, dye niet ghesondicht en hadden, nae dye gelijckenis des ouertredincs van Adam welcke een figuere draecht van des toecomende.

15

⁺Maer niet ghelijc dye sonde is die gaue. Want ist sake dat door een sonde daer veel ghestoruen zijn, veel te meer die gracie gods ende die gaue door dye gracie eens menschen Christi Ihesu heeft oueruloedich geweest in veel.

+ D

16

Ende niet ghelijc door een sonde, also ooc die gaue: want dat oordeel wt een, tot die verdoemenis, maer die gracie wt veel sonden, tot rechtuerdicheyt.

17

Want ist dat door die sonde van een dye doot geregneert heeft door een, veel te meer, die de oueruloedicheit des gracien ende des gauen ende der rechtuerdicheyt ontfangen, sullen regneren int leuen door eenen Iesum Christum.

18

Aldus gelijc door eens

[p. I2r]

sonde, in alle menschen tot die verdoemenisse, ⁺ also ooc door eens rechtuerdicheyt, in allen menschen tot die rechtuerdicheit des leuens

+ E

19

want gelikerwijs wi door eens menschen ongehoorsaemheyt veel sondaren gheworden zijn. Also door eens gehoorsaemheyt, sullender veel rechtuerdich gemaect worden.

20

Die wet is in gecomen, om dat die sonde oueruloedich soude worden. Ende waer dye sonde oueruloedich geworden is, daer is de gracie veel meer oueruloedich geworden.

21

Dat gelijckerwijs dye sonde geregneert hadde in die doot, die gracie ooc also regneren soude, door rechtuerdicheyt tot dat eewige leuen door Iesum Christum onsen heer.