De Vorsterman Bijbel

§ Dat .iiij. Cappittel.

1

⁺DAer om wat sullen wi seggen, dat geuonden heeft Abraham onsen vader na den vleesch?

+ A

2

want is Abraham wt wercken des wets rechtuerdich gheworden, soo heeft hy glory, maer nyet by god.

3

⁺ Want wat seyt die scriftuer? Abraham heeft God ghelooft, ende tis hem gherekent tot rechtuerdicheyt.

+ Gen. xv.b Gala. iij.b Iaco. ij.d.

4

Maer die ghene die daer werct, en wort dat loon niet toe gheschict door gracy maer door schult.

5

Voort die ghene, die daer niet en werct, mer gelooft in hem die daer rechtuerdich maket den bosen, zijn gheloof wort hem gherekent tot rechtuerdicheyt, na tvoornemen der gracie Gods.

6

⁺Ghelijck als oock Dauid wt leyt die salichmakinge des menschen, ⁺ welcken God die rechtuerdicheyt toeschict, sonder wercken.

+ B

+ psal. xxxi a

7

Salich die haer boosheden vergeuen zijn, ende die haer sonden bedect zijn.

8

Een salich man, die de Heer gheen sonden toe gerekent en heeft.

9

⁺Daer om dese salichmakinge blijftse alleen in die besnidinge, oft oock in dye onbesnijdinghe? ⁺ want wi segghen dattet geloof Abraham toegerekent was tot rechtuerdicheyt.

+ C

+ Ge. xvij.b

10

Daer om, hoe ist hem toe gescreuen, als hy in die besnijdinge was? oft als hi in die onbesnidinge was? Niet in die besnidinge, mer in die onbesnidinge.

11

Ende hi heeft ontfangen dat teeken des besnidinghe, tot een teeken van die rechtuerdicheyt des ge

[p. I1v]

loofs, welcke is in die onbesnidenis, op dat hi wesen soude een vader van al die ghene die daer geloouende zijn door die onbesnidenisse, op dattet haer ooc toe gescreuen worde tot rechtuaerdicheyt,

12

op dat hi si een vader des besnijdenis. Niet alleen die daer zijn wter besnidenisse, mer ooc den ghenen die nauolgen die voetstappen des geloofs, welck is int onbesnijdinge ons vaders Abrahams.

13

Want dye beloftenis en is Abraham oft zijn saet niet geschiet door dye wet, ⁺ dat hi een erfgenaem soude wesen des werelts, ⁺ mer door die rechtuerdicheyt des geloofs.

+ D

+ Ge. xvij.b

14

Want ist dat, die daer wter wet hooren, erfghenamen zijn, so is dat geloof te niet geworden, ende de beloftenis is te vergeefs gheschiet

15

want de wet werct toornicheyt. Waer gheen wet en is, daer en is gheen ouertredinghe.

16

Daer omme wtet gheloof. Op dat nae der gracien die belooftenisse vast si, allen saden Niet hem alleen, dye wt dye wet is, mer ooc hem die wten geloof is van Abraham, die welcke is ons alre vader

17

gelijc alsser ghescreuen is. Want een vader van veel volcs heb ic v gesedt voor god, dien ghi gelooft hebt, die leuende maect die dooden, ende roept die dinghen die niet en zijn, gelijc als die zijn.

18

Die welcke tegen den hoop, inden hoop geloeft heeft, dat hy een vader soude wesen van veel volcs, na dat ghene dat hem geseyt is. Alsoo sal v saet wesen gelijc die sterren des hemels, ende gelijc tsant des zees.

19

⁺Ende niet cranck wesende int geloof, ⁺ heeft niet aengemerct zijns selfs lichaem, nv bestoruen, als hi by na hondert iaer out was, noch ooc die verstoruentheit des buycs Sare.

+ E

+ Gen. xvij.

20

Ooc aen die gelooftenisse gods en heeft hi niet getwifelt, door onghelouicheyt, mer hi is sterck geweest int gheloof, geuende glorie god,

21

volcomelic wetende, want so wat god belooft heeft, dat is hy machtich ooc te doen.

22

Daer om ist hem ooc toe gescreuen tot rechtuerdicheyt.

23

Ende ten is niet alleen gescreuen om hem, dattet hem toe gescreuen was tot rechtuerdicheyt

24

mer ooc om ons, den welcken toe gescreuen sal werden, geloouende in hem, die daer verwect heeft vander doot Iesum onsen heer,

25

die geleuert is om onse sonden, ende is verresen om onse rechtuerdicheyt.