De Vorsterman Bijbel

[p. I1r]

§ Dat .iij. Capittel.

1

⁺WAt heeft dan een Iode meer? oft wat profijt is die besnidenisse?

+ A

2

Veel in alle manieren. ⁺ Want ten eersten, dat haer ghelooft zijn die woorden Gods.

+ 2.Thim. 2

3

Maer wat ist dan, ofter sommige van hem nyet gelooft en hebben? En heuet haer onghelouicheit tgheloof Gods nyet te niet ghemaect? Dat moet verre zijn.

4

God is warachtich, maer alle menschen loghenachtich. Alsser gheschreuen is. ⁺ Op dat ghy gherechtuerdicht wort in uwe woorden, ende verwinnet, als ghi geordeelt wort.

+ Ioan. iij.d psal. c.xv psal. l

5

Ist dat onse ongerechticheit, gods rechtuaerdicheyt prijset, wat sullen wij dan segghen? ⁺ Is God dan onrechtuaerdich, dat hy gramscap op ons brenct? Ic spreec naden mensche.

+ B

6

Gheensins, want anders hoe sal God die werelt ordeelen?

7

Ist dat gods waerheit door mijn logen oueruloedich gheweest is tot zijnder glorien, waer om werde ic dan noch als een sondaer geordeelt?

8

Ende niet (als wi gelastert worden, ende als sommighe seggen dat wi seggen) laet ons quaet doen op datter mach goet wt comen, welcker verdoemenis rechtuaerdich is.

9

⁺Wat ist dan? Gaen wi haer te bouen? In gheender manieren: ⁺ want wi bewesen hebben die Ioden ende de griecken al te samen onder die sonde te zijn,

+ C

+ Gala. 3.d.

10

alst gescreuen is: ⁺ Want daer en is nyemant rechtuaerdich,

+ psal. xiij.a. psal. v.c psa. cxxxix psal. ix.c. prouer. i.a Esa. lix.b psal. lv.

11

nyemant verstandich, niemant god soeckende.

12

Alle gader zijn si af geweken, altesamen zijnse onnut geworden, daer en isser gheen dye goet doet, daer en isser niet tot eenen.

13

Haer kele is een open graf haer tonge hebben si tot bedroch ghebruyct slangen fenijn is onder haer lippen,

14

welcker mondt vol is van vloecken ende bitterheyt

15

Haer voeten zijn haestich om bloet te storten.

16

Vernielinge ende ongeuallicheyt is in haer wegen,

17

ende den wech des vredes en hebben si niet bekent,

18

si en hebben dye vreese gods niet voor oogen.

19

⁺+ Wij weten, so wat die wet seyt, dat seyt si tot die in die wet zijn, op dat alle mont ghestopt wort, ⁺ ende alle dye werelt god onderdanich worde,

+ D

+ Gala. ij.d

20

daer om, dat door dye wercken des wets, alle vleesch niet gerechtuerdicht en wort, voor zijn aensicht. Want door die wet, coemt dye kennisse der sonden.

21

Mer nv, is sonder die wet die rechtuerdicheyt gods geopenbaert, betuycht zijnde door die wet ende propheten.

22

Want die rechtuerdicheyt gods, is door tgeloof Iesu Christi, in allen, ende op allen die gelouen in hem. Want daer en is gheen onder [kolom]scheyt,

23

want si alle gader gesondicht hebben, ende behoeuen die glorie gods.

24

Mer si werden om niet rechtuerdich gemaect door zijn gracie, door dye versoeninge, welcke in Ihesu Christo is.

25

Den welcken god voorghestelt heeft een versoeninge, door tgeloue in zijn bloet, tot een bewisinghe zijns rechtuerdicheyts, ⁺ om dye verghiffenis der voorleden sonden,

+ E

26

dwelck god verdragen heeft, om te bewisen zijn rechtuerdicheyt in desen teghenwoordighen tijt, op dat hi rechtuerdich si, ende rechtuerdich makende den ghenen die wten gheloue Iesu Christi is. *

27

Waer is dan v gloriacie? Si is wt gestooten. Door welcke wet? Der wercken? Neen. Maer door die wet des geloofs.

28

So houden wi dan, dat die mensch gerechtuerdicht wort door tgeloof, sonder die wercken des wets.

29

Oft is god alleen der Ioden, ende niet mede der Heydenen? Ia, ooc van die heydenen.

30

Wantet een God is die rechtuaerdich maect die besnijdenis wten gheloof, ende die onbesnijdinghe door tgheloof.

31

Maken wij dan die wet tot niet door tgheloof? dat si verre, mer wij setten die wet.