De Vorsterman Bijbel

§ Dat .ij. Capit.

1

DAerom, ghi niet onschuldich en zijt, o mensce, wie ghi zijt, die daer oordelt ⁺ Want int ghene ghi eenen anderen oordeelt verdoemt ghi v seluen, ⁺ Want ghi doet die selue dingen, die welcke ghi oordeelt,

+ A

+ Mat. vij.a

2

Want wi weten dat Gods oordeel naer die waerheyt is, teghen die ghene die alsoodanighe dinghen doen,

3

Meent ghy oock o mensch die welcke haer oordeelt die sodanige dinghen doen ende doetet seluer, dat ghy ontulieden sult dat oordeel Gods?

4

Oft ghi den rijcdom zijnder goetheit, ende verdrachlicheit, ende lancmoedicheyt versmaet? Weet ghi niet dat die goetheit Gods, v tot penitencie leit?

5

⁺Mer na v herdicheit, ende onbewegelick herte tot penitencie, vergadert ghi v seluen toornicheyt inden dach des torens ende der openbaringe des rechtueerdich oordeels Gods,

+ B

6

die welcke eenen yegelijcken loon sal gheuen nae zijn wercken,

7

glorie ende eere, ende onuerganckelicheyt, den ghenen die met ghedoochsaemheyt in goede wercken soecken dat eewich leuen.

8

Maer den ghenen die welcke kijfachtich zijn ende der waerheit niet gehoorsaem zijn, maer der onrechticheit geloouen, sal gramscap ouercomen, ende onwerdicheyt,

9

ende tribulacie, ende bangicheyt, ouer alle sielen der menschen die quaet doen, eerst den Iode, ende Griecke.

10

Maer glorie ende eere, ende vrede, alle die goet doende is, ten eersten den Ioden, oock den Griecken.

11

⁺Want daer en is gheen wtneminghe [kolom] der persoonen by Godt. ⁺

+ C

+ Deut. x.d. para. xix.c iob. xxxvij Actuum. x.e. mat. vij.d. Iacobi. i.d

12

Dye sonder wet ghesondicht hebben, sullen sonder wet, verghaen, ende dye in dye wet misdaen hebben, sullen door dye wet gheoordeelt worden.

13

Want niet die de wet hooren, zijn rechtueerdich bi God, maer die doenders des wets sullen gerechtueerdicht worden

14

Want ist dat die heydenen, die gheen wet en hebben, wt der natueren doen tghene dat die wet inhoudt, dese gheen wet hebbende zijn hen seluen een wet.

15

Die daer bewisen dwerc des wets gescreuen in haer herten, door tgetuyge van haer conscientie, ende haer gedachten hen seluen besculdigende oft ooc onsculdigende

16

in dien dach, als god oordeelen sal die verborgentheden der menschen na mijn Euangelie door Iesum Cristum.

17

Ist dat ghy wort een Iode ghenoemt, ende rust in die wet, ende glorieert in god

18

ende bekent sinen wille, ende prijst die profitelijcste dinghen, geleert zijnde door die wet,

19

ende ghi betrout v seluen te sine een leytsman der blinden, een onderwiser der onwetender,

20

een leerder van die onwijsen een meester der simpelen, hebbende een forme des wetentheyts, ende des waerheits in dye wet.

21

Daerom ghy dye daer leerdt eenen anderen, v seluen en leerdy nyet. Ghi die preect niet te stelen, steelt.

22

Ghi die segt, men sal gheen ouerspel doen, doet ouerspel. Ghi die daer afgoden versmaet beneemt God zijn eere.

23

Ghi die in die wet glorieert, onteert God door ouertredinge des wets,

24

want die naem Gods wort door v gheblasphemeert onder die heydenen, als daer ghescreuen staet.

25

⁺Die besnijdinghe is profitich, ist dat ghy dye wet houdt. ⁺ Maer ist dat ghy een ouertreder des wets zijt, uwe besnijdinghe is verandert in onbesnijdinge.

+ D

+ Esai. liij.d ezec. xxxvi.

26

Daer om waert sake, dat die onbesnidinge die rechtueerdichmakinghe des wets onderhielde, en sal niet, zijn onbesnijdinge, voor een besnijdinghe gherekent worden?

27

Ende dat na die natuere onbesneden is, ist dattet dye wet onderhoudt, sal oordelen v, dye na der letteren ende besnijdinge een ouertreder zijt des wets.

28

Want nyet dye int openbaer een Iode is, noch die besnijdinghe die welcke int opebaer is, int vleesche,

29

maer dye int heymelijcke een Iode is, ende die besnijdinghe des herten, dye welcke door den gheest is, nyet in dye letter, welcks lof en is nyet wt den menschen maer wt God.