De Vorsterman Bijbel

[p. H8r]

[afbeelding]

§ Hier beghint Sinte Pauwels Epistel totten Romeynen.

§ Dat .i. Capittel.

1

⁺PAulus, ⁺ knecht Iesu Christi, gheroepen Apostel, wtgescheyden tot dat Euangelium Gods,

+ A

+ Mattei. i. Luce. ij. ende iij. Ioannis. i.

2

dwelck hi voormaels hadde beloeft door zijn propheten, in die heylige scriften,

3

van sinen sone, die hem gheworden is wt dat saet Dauid, naden vleesch,

4

welcke voor geoordineert is sone Gods inder macht naden gheest des heylich makinge, wt der verrisenisse der dooden ons heeren Iesu Christi

5

Door den welcken wi gracie ontfangen hebben, ende dat Apostelschap, om gehoorsaem te zijne den gelooue, in allen heydenen voor sinen naem.

6

Inden welcken ghi ooc geroepen zijt Iesu Christi.

7

Allen die te Rome zijn wtuercoren Gods, geroepen heyligen, gracie si met v, ende vrede van God den vader, ende onsen heere Iesu Christo.

8

Ten eersten dancke ick minen God door Iesum Christum voor v allen, ouermidts dat v gelooue vercondicht wort door alle de werelt,

9

Want God is mijn getuyghe, den welcken ick diene in minen gheest, int Euangelie zijns soons, dat ick sonder ophouden uwer gedachtich ben, in mijn ghebeden.

10

Altijt biddende, oft mi door eenige maniere doch, tot eenigher tijt gebueren mochte een gheluckige reyse (door Gods wille) tot v te comen.

11

⁺Want ick begheere, v te sien, op dat ick wat gheestelijcke ghaue v mede deyle, waer door ghi ghesterct moecht worden,

+ B

12

dat is, dat ick een gemee-[kolom]ne vertroostinghe in v vercrigen mochte door v ende mijn ghelooue, dat wi te samen hebben.

13

Voort broeders, wil ick dat ghy weet, dat ick dicwils voor my ghenomen hebbe te comen tot v, maer ic ben belet tot nv toe op dat ic ooc eenige vrucht mocht hebben in v, gelijc in ander heydenen.

14

Ick ben een schuldenaer den Griecken ende den Barbaren den wijsen ende onwijsen.

15

Aldus so veel als in mi is, ben ic bereyt, v ooc die te Roomen zijt, te preken dat Euangelie.

16

Ick en schame mi dat Euangelie niet, Want tis die macht Gods tot salicheit alle die geloouen eerst den Ioden, ^{+ +} oock mede den Griecken,

+ C

+ Abac. ij.a. Hebre. .x.c Gala. iij.b

17

Want die rechtueerdicheit Gods wort daer door openbaer, wten geloof inden geloof. Alsser gescreuen staet, Die rechtuerdige leeft wten gelooue.

18

Want die toornicheit gods vanden hemel geopenbaert wort, teghen alle ongoddiensticheyt ende onrechticheyt der menschen, die de waerheyt in onrechticheyt onthouden.

19

Daerom, want het ghene, dwelcmen van God Bekennen mach, ⁺ is in haer openbaer, God heeftet haer geopenbaert,

+ Ephe. iiij.

20

want zijn onsienlike dinghen van die creatuer des werelts, door die dingen die ghemaect zijn verstaen zijnde, gesien worden. Ende ooc zijn eewige macht, ende godheit, Also dat si gheen onschult en hebben,

21

daerom dat, als si God hebben bekent, en hebben si hem niet als god geeert, ende dancbaer geweest, Maer si zijn in haer gedachten ydel geworden, ende haer onwijs herte is verdonckert,

22

want seggende dat si wijs zijn, zijn si sot geworden.

23

Ende si hebben verandert die glorie des onuerganckeliken Gods, in een ghelijckenisse eens beelts des verganckelics menschs, ende der vogelen, ende vieruoetige, ende cruypende dieren.

24

Daerom heeftse God ouer geleuert, in die begeerlicheden haerder herten, in onreynicheyt, dat si haeren lichame souden schandelijcke dingen aen doen in hen seluen,

25

Want si die waerheyt Gods verandert hebben in loghenen, ende hebben geeert, ende gedient den creatueren, bouen den schepper, ⁺ die welcke gebenedijt is inder eewicheyt, Amen.

+ D

26

Daerom, heeft God haer ouergeleuert in oneerliken passien, want haer vrouwen hebben verandert den natuerliken gebruyc in een gebruyck dat daer is teghen die natuere.

27

Des gelijcs oock die mannen, verlatende den natuerliken gebruyck der vrouwen, hebben hittich gheworden, in die begheerlicheyt tot malcanderen, mannen

[p. H8v]

in mannen leelicheyt bedriuende, ende tloon alst behoorlick was van haer dwalinghe in hen seluen ontfanghende.

28

Ende ghelikerwijs als si haer niet ghegeuen en hebben, God te hebben in kennissen, soe heeft God haer ouergheleuert in eenen verkeerden sin, dat si doen souden dinghen, die welcke niet en behooren,

29

veruult zijnde van alle onrechticheit, quaetheit oncuischeit, ghiericheit, boosheit, vol nijts doorslagen, kiuinge, bedroch, quaetherticheit, oorblasers,

30

achterclappers, Godshatende, spijtighe, hoouerdige, opgeblasen, vinders van quade, den ouderen niet gehoorsaem,

31

onwijs, onghemaniert, sonder beweechlijcheyt, sonder trouwe, sonder bermherticheit,

32

Diewelcke na dat si gods rechtueerdicheyt ghekent hadden, en hebbens niet verstaen, want die sulcke dingen doen, den doot weerdich zijn, niet alleen die dese dinghen doen, maer oock die consenteren den ghenen diese doen.