De Vorsterman Bijbel

§ Dat .vi. Capittel.

1

⁺DAer om wat sullen wi seggen? Sullen wij in die sonden blijuen, op dat dye gracie oueruloedich wert?

+ A

2

Dat si verre. Wi die de sonde ghestoruen zijn, hoe sullen wij noch daer in leuen?

3

+ Oft weet ghi niet broeders, dat wi al dye daer gedoopt zijn in Christo Iesu in zijn doot gedoopt zijn?

4

Want wi zijn met hem begrauen door dat doopsel inden doot, op dat gelijckerwijs Christus verwect is vanden doot, door die glorie zijns vaders, wi also ooc wandelen souden in nyeuheyt des leuens.

5

Want zijn wi mede geplant geworden dye gelijckinghe zijns doots, zijns verrisenis sullen wij oock deelachtich worden.

6

Dat wetende, dat onsen ouden mensche met hem gecruyst is, op dat dat lichaem der sonden ghedestrueert worde, dat wi hier nae nyet en dienen die sonde

7

Want die daer gestoruen is, die is gherechtuerdicht vande sonde.

8

⁺Voort, ist dat wi gestoruen zijn met Cristo wi geloouen dat wi ooc leuen sullen met hem

+ B

9

wetende dat Christus verwect zijnde vander doot, nv niet meer en sterft: die doot en sal nv nyet meer heerscappie ouer hem hebben,

10

want dat hi gestoruen is der sonden, is hy gestoruen eens. Mer dat hi leeft, dat leeft hi god.

11

Alsoo ghi oock, acht v seluen die sonde doot te zijn, ende god te leuen door Iesum Christum. *

12

Daer om en laet die sonde niet regneren in v sterflick lichaem, op dat ghi gehoorsaem zijt zijnder begeerlicheyt.

13

Ende en wilt ooc niet v leden geuen wapenen des onrechtuerdicheits die sonde, mer geeft v seluen god gelijc als wter doot leuende, ende v leden wapenen des rechtuerdicheyts gode.

14

Want die sonde en sal ouer v gheen heerscappie hebben. Ghy en zijt niet onder dye wet, maer onder die gracie. [kolom]

15

⁺Wat dan? sullen wi sondigen, ouermits dat wi niet onder die wet en zijn, mer onder dye gracie? gheensins.

+ C

16

+ En weet ghi niet, dat die ghene dye ghy v seluen knechten geuet om gehoorsaem te zijn, dat ghi zijn knechten zijt, die ghi gehoorsaem zijt, het si der sonden totter doot, oft des gehoorsaemheyts tot dye rechtuerdicheyt.

17

Danck si God, dat ghi gheweest zijt knechten der sonden, maer ghi hebt gehoorsaem gheweest wter herten, in die form des leerincs, in welcke ghy ouer ghegheuen zijt.

18

Ende verlost wesende van dye sonde, zijt ghy knechten gheworden des rechtuaerdicheyts. *

19

+ Ick segghe dat menschelick is, om die crancheyt ws vleeschs, want gelijckerwijs ghi v leden gegeuen hebt te dienen der onsuuerheyt, ende ongerechticheyt tot ongherechticheyt, also ooc geeft nv v leden te dienen der rechtuerdicheyt tot heylichmakinge.

20

Want als ghi knechten waert der sonden, doe waert ghi vrij van dye rechtuerdicheyt.

21

Daer om wat vrucht hadt ghy doe in dese, van welcke ghi v nv scaemt? want dat eynde van dien is die doot.

22

Mer nv verlost van die sonde, ende gods knechten gheworden zijnde, hebt ghi v vrucht in heylichmakinghe ende eynde dat eewige leuen.

23

Want dye loon der sonden is dye doot. Ende die graci gods dat eewighe leuen door Ihesum Christum onsen Heere. *