De Vorsterman Bijbel

§ Dat .xvij. Capittel.

1

⁺+ DIt heeft Iesus gesproken, ende opslaende zijn oogen inden hemel, heeft geseyt Vader die vre is gecomen, clarificeert uwen sone, op dat v sone v clarificere,

+ A

2

gelijc als ghi hem macht hebt gegeuen van alle vleesch dat hi al die, ghi hem gegeuen hebt, gheue dat eewighe leuen.

3

Ende dit is deewige leuen dat si alleen kennen v een warachtich God ende dien ghi gesonden hebt Iesum Christum.

4

Ic heb v geclarificeert opter aerden, twerc heb ic volbrocht, dwelc ghi mi ghegeuen hebt, dat ict doen soude.

5

Ende nv so clarificeert mi, ghi vader bi vseluen, met die claerheit die ic gehadt hebbe, eer dat die werelt worde, bi v.

6

Ic heb uwen naem geopenbaert den menschen, welcken ghi mi gegeuen hebt vander werelt. ⁺ Si hoorden v toe, ende ghi hebtse mi gegeuen, ende si hebben mijn woorden onderhouden.

+ B

7

Nv hebben si bekent, dat al tghene dat ghi mi gegeuen hebt, van v zijn.

8

Want die woorden die ghi mi gegeuen hebt heb ic haer gegeuen, ende si hebbense ontfangen, ende hebben warachtich bekent, dat ick van v gecomen ben, ende si hebben gelooft, dat ghi mi gesonden hebt.

9

Ic bid v voor haer Ic en bid voor die werelt niet, maer voor dese, die ghi mi gegeuen hebt, want si v zijn

10

Ende al tmijne is uwe, ende dat uwe is mijne ende ic ben geclarificeert in haer.

11

Ende nv en ben ic niet in die werelt, ende dese zijn in die werelt, ende ic come tot v. *

+ Heylige vader, bewaert haer in uwen naem, die ghene die ghi mi gegeuen hebt, op dat si een zijn, ghelijck wi.

[p. H4v]

12

Als ick met haer was, bewaerde ick haer in uwen naem. Die ghi mi gegeuen hebt heb ic bewaert, ende nyemant en isser wt haer verloren, dan die sone des verlies, op dat die scrift veruult worde.

13

⁺Maer nv come ick tot v, ende dit spreec ic inde werelt, op dat si mijn volmaecte blijschap hebben in haer seluen.

+ C

14

Ick heb haer gegeuen v woort, ende die werelt heeft haer gehaet, want si van die werelt niet en zijn gelijc ick mede van die werelt niet en ben.

15

Ick en bidde niet, dat ghi haer wt die werelt neemt, maer dat ghi haer bewaert vanden quade.

16

Si en zijn vande werelt niet gelijc ic niet en ben van de werelt.

17

Heyliget haer inde waerheyt. V woordt, is die waerheyt.

18

Gelijc ghi mi gesonden hebt inde werelt, also heb ic haer ooc inde werelt gesonden,

19

ende voor haer so heylige ick mi seluen op dat si oock geheylicht mogen zijn, door die waerheyt.

20

Maer ick en bid niet voor haer alleen, maer ooc voor die ghene, die door haer woorden, geloouen sullen in mi

21

op dat si alle een zijn, ghelijck als ghi vader in mi ende ick in v, dat si mede in ons een zijn, op dat die werelt geloouen mach dat ghi mi gesonden hebt.

22

Ende ick heb haer ghegeuen die claerheit, die ghi mi ghegeuen hebt, op dat si een zijn, gelijc wi ooc een zijn.

23

⁺Ic in haer, ende ghi in mi, dat si volmaect moghen zijn in een, ende op dat die werelt bekennen mach, dat ghi mi ghesonden hebt, ende haer lief ghehadt hebt, ghelijc ghi my lief gehadt hebt.

+ D

24

Vader, die ghi mi gegeuen hebt, wil ick, dat waer ick ben, dat si oock met mi zijn, op dat si mijn claerheyt sien moghen, die ghi mi ghegheuen hebt, want ghi mi lief ghehadt hebt voor die scheppinge der werelt.

25

Rechtueerdige vader, die werelt en heeft v niet ghekent, maer ick heb v gekent, ende dese hebben ghekent, dat ghi mi ghesonden hebt.

26

Ende ic heb haer uwen naem bekent gemaect, ende ick salse bekent maken, op dat die liefde, daer ghi mi mede lief gehadt hebt, in haer zijn mach, ende ick in haer. *