De Vorsterman Bijbel

§ Dat .xvi. Capittel.

1

⁺DIt heb ick tot v gesproken, dat ghi niet gescandalizeert en soudt worden.

+ A

2

Si sullen v buyten der Synagoghe doen. Mer den tijt sal comen, dat al die gene die v doodt, sal hem laten duncken, dat hi God eenen dienst doet. ⁺

+ mat. xxiiij ende .vi.c. mar. xiij.b luce. xxi.c.

3

Ende dit sullen si v doen, ouermidts dat si niet ghekent en hebben den vader oft mi.

4

Maer dit heb ic tot v gesproken, op dat, wanneer die tijt coemt, ghi deser ghedachtich zijt, dat ic v gheseyt hebbe. *

5

Ende dit en heb ick v niet geseyt vant beghinsel, want ick was met v. ⁺ + Ende nv ghae ick totten ghenen die mi ghesonden heeft, ende nyemant van v en vraecht mi, waer gaet ghi?

+ B

6

Maer want ick v dit geseyt heb, so heeft droefheyt v herte veruult.

7

Maer ick seg v die waerheyt, tis v profijt dat ick ghae. Want waert dat ick niet en ghinc, die vertrooster en soude niet comen tot v, Maer ist dat ic ghae, so sal ick hem tot v senden,

8

ende als hi coemt, sal hi straffen die werelt, van sonde ende van die rechtuer-

[p. H4r]

dicheit, ende vant oordeel,

9

Van die sonde, want si en geloouen in mi niet.

10

Van die rechtueerdicheyt, want ic gae totten vader, ende hierna en sult ghi mi niet meer sien.

11

Vant oordeel, want de prince deser werelt is nv geoordelt

12

⁺Noch veel heb ic v te seggen, maer ghi en mochtet nv niet dragen.

+ C

13

Maer als die coemt, die welcke een gheest is des waerheyts, die sal v leeren alle waerheyt. Want hi en sal niet spreken van hem seluen, maer al dat hi gehoort heeft, dat sal hi spreken, ende dat toecomende is, sal hi vercondigen.

14

Die sal mi clarificeren, want hi salt vant mijn nemen, ende v vercondighen.

15

Al tghene dat die vader heeft, dat is mijn daerom heb ic geseyt, dat hijt van mi sal nemen, ⁺ ende v vecondigen. *

+ D

16

+ Een weynich, ende ghi en sult mi niet sien ende weder een weynich, ende ghi sult mi sien want ick ghae totten vader.

17

Daerom seyden zijn discipulen onder malcander. Wat ist, dat hi ons seyt, een weynich, ende ghi en sult mi niet sien? ende wederom een weinich ende ghi sult mi sien, ende want ick ghae totten vader?

18

Daerom seyden si, wat is dat dat hi seyt weynich? Wi en weten niet wat hi seyt.

19

⁺Ende Iesus heeft bekent, dat si hem wouden vragen, ende heeft haer geseyt, Van dat vraecht ghi onder malcanderen, dat ic geseyt heb, een weynich ende ghi en sult my niet sien, ende weder een weynich, ende ghi sult mi sien.

+ E

20

Voorwaer, voorwaer seg ick v, ghi sult screyen ende weenen, maer die werelt sal haer verbliden, Ghi sult bedroeft worden, maer v droefnis sal verandert worden in blijscap.

21

Een vrouwe als si baert heeft droefnis, want haer vre is gecomen Ende als si tkint gebaert heeft, is si des banghicheyts niet gedachtich, om die vruechde, datter een mensche in die werelt geboren is.

22

⁺Daerom hebt ghi nv ooc droefnis. Maer ick sal v wederom sien, ende v herte sal hem verblijden, ende v blischap en sal niemant van v nemen. *

+ F

23

Ende in dien dach en sult ghi mi niet vraghen.

+ Voorwaer, voorwaer seg ic v, So wat ghi bidden sult den vader in minen naem, sal hi v geuen.

24

Tot nv toe en hebt ghi niet begeert in minen naem, Begeert ende ghi sult ontfangen, op dat v blischap volmaect si.

25

Dit heb ick v in bisprake geseit, die tijt sal comen, dat ick v niet in bispraken sal spreken, maer opentliken sal ick v van minen vader vercondigen.

26

In dien dach sult ghi begheeren in minen naem, ende ick en seg v niet [kolom] dat ick den vader bidden sal voor v,

27

want die vader self v lief heeft, om dat ghi mi lief gehadt hebt, ende ghelooft hebt, dat ic van God wtgegaen ben.

28

⁺Ick ben wtgegaen vanden vader, ende ben gecomen in die werelt, wederom late ick die werelt, ende ghae totten vader.

+ G

29

Sijn discipulen seggen hem Siet, nv spreect ghi opentlic, ende en segt gheen bisprake.

30

Nv weten wi, dat ghi alle dinck weet, ende ten is niet van noode dat yemant v vraecht, daer door geloouen wi dat ghi van God zijt wtgegaen. *

31

Iesus heeft hen geanwoort, Nv ghelooft ghi,

32

siet, die tijt genaect, ende is nv gecomen, dat ghi verstroyt sult worden, een yegelick int zijn, ende mi alleen sult laten, ende ic en ben niet alleen want die vader is met mi.

33

Dit heb ick v geseyt, op dat ghi in mi vrede hebt, In die werelt sult ghi hebben benauwinge, maer betrout, ick heb die werelt verwonnen.