De Vorsterman Bijbel

§ Dat .xi. Capittel.

1

⁺+ ENde een wasser siec, genoemt Lazarus van Bethanien, vant casteel van Maria, ende Martha zijn susteren.

+ A

2

Maria was die den heere gesalft heeft met salf, ende ghedroocht heeft zijn voeten met haeren hare, wiens broeder Lazarus siec was.

3

Daerom hebben zijn susters tot hem gesonden, seggende, Heere, siet, dien ghi liefhebt, is siec.

4

Iesus hoorende heeft gheseyt, Dese siecte en is niet totter doot, Maer om die glorie gods, op dat die sone Gods daer door geglorificeert mach worden.

5

Iesus hadde Martam lief, ende haer suster Mariam, ende Lazarum.

6

Daerom als hi gehoort heeft, dat hi siec was, is hi doen ter tijt in [kolom] die selue plaetse gebleuen, twee dagen.

7

Ende daer na seit hi den discipulen, Laet ons weder om gaen in Iudeam.

8

Die discipulen seggen hem, Rabbi, die Ioden sochten v nv te steenigen, ende gaet ghi weder derwaert?

9

Iesus heeft geantwoort, En zijnder niet .xij. vren vanden dach? Ist dat yemant inden dach wandelt, die en stoot hem niet, want hy dat licht van dese werelt siet.

10

Maer ist dat yemant wandelt in den nacht, die stoot, want het licht en is niet in hem.

11

⁺Dit seyt hi. Ende daer na, seyt hi haer, Lazarus onse vrient die slaept, maer ic gae hem vanden slaep wecken.

+ B

12

Daerom hebben zijn discipulen geseyt, Heere, ist dat hi slaept, so sal hi genesen.

13

Maer Iesus, hadde van zijn doot geseyt. Ende si hebben gemeent, dat hi vanden slaep seyde.

14

Daerom heeftet Iesus haer opelick geseyt, Lazarus is doot,

15

ende ic verblide mi om v, dat ick daer niet geweest en hebbe, op dat ghi gelooft, Maer laet ons tot hem gaen.

16

Daerom heeft Thomas, die ghenoemt wort Didimus, totten medediscipulen gheseyt, Laet ons mede ghaen ende met hem steruen.

17

Aldus is Iesus gecomen, ende heeft hem gheuonden nv vier dagen in dat graf gelegen hebbende.

18

Ende Bethania was by Ierusalem, omtrent vijfthien stadien.

19

Ende veel van die Ioden waren gecomen tot Martham ende Mariam, om dat si haer troosten souden van haeren broeder.

20

⁺Daerom, als Martha ghehoort heeft, dat Iesus ghecomen was, is si hem te ghemoet gheloopen. Maria sadt in huys.

+ C

21

Ende Martha heeft tot Iesum gheseyt, Heere, waert dat ghi hier gheweest hadt, mijn broeder en waer niet ghestoruen.

22

Maer nv weet ick oock, dat so wat ghi van God begheeren sult, sal hi v gheuen.

23

Iesus seyde tot haer, V broeder, sal opstaen.

24

Martha seyt hem, Ick weet, dat hi opstaen sal, in die verrisenise, in den laetsten dach.

25

Iesus seit haer, Ick ben die verrisenis, ende dat leuen, Die in my gelooft, ya al waert oock dat hy doot ware, so sal hi leuen.

26

Ende alle die ghene die daer leeft ende ghelooft in my, dye en sal nyet steruen inder eewicheyt, Ghelooft ghy dat?

27

Si seyde hem, Ia ick Heere, Ick gelooue, dat ghi zijt Christus, die sone des leuenden Gods, ⁺ die welcke in die werelt comen zijt.

+ D

28

Ende als si dit geseyt hadde, is sie wech gheghaen, ende heeft Mariam haer suster geroepen, heymelic seggende, Die meester

[p. H1v]

is hier, ende roept v.

29

Als dese dat gehoort heeft, stont si haestelic op, ende quam tot hem.

30

Ende Iesus en was noch niet gecomen int casteel, maer hi was noch in de plaetse daer hem Martha, te gemoet comen was.

31

Daerom die Ioden die met haer int huys waren, ende troosten haer, als si gesien hadden Mariam dat si haestelic opgestaen was, ende wtgegaen zijn si haer geuolcht, seggende, Si gaet totten graue, om daer te screyen.

32

Daerom als Maria daer gecomen was, daer Iesus was, siende hem, is geuallen tot zijn voeten ende seyde hem, Heere, hadt ghi hier geweest mijn broeder en waer niet gestoruen,

33

Daer om, als Iesus haer sach screyende, ende die Ioden screyende die met haer waren, heeft hi hem inden gheest versucht, ende heeft hemseluen gestoort, ende geseyt,

34

Waer hebt ghi hem geleyt? Si seggen hem, Heer, coemt ende sietet

35

Ende Iesus heeft gescreyt.

36

⁺Daerom hebben die Ioden geseit, Siet, hoe lief had hi hem

+ E

37

Ende sommige van haer hebben geseyt, En mocht dese, die de oogen des blinden gheopent heeft, niet doen, dat dese ooc niet en sterf?

38

Daerom, Iesus weder in hemseluen versuchtende, quam tottet graf, ende het was een speluncke, ende een steen was daer op geleyt.

39

Iesus seyt, Neemt den steen wech. Martha die suster, van den ghenen die daer doot was, seyde hem, heer, hi stinct nv, want hi is vierdaghich.

40

Iesus seyde haer, Heb ick v niet geseyt, waert dat ghi geloofdet, ghi soudet die glorie Gods sien?

41

Daerom hebben si den steen wech genomen, Ende Iesus opborende zijn ogen om hooghe, heeft geseyt, Vader, ick dancke v, want ghi mi gehoort hebt,

42

ende ick wistet, dat ghi mi altijt hoort, ⁺ Maer om die schare die daer om staet, so heb ict geseyt, op dat si geloouen, dat ghi mi gesonden hebt.

+ F

43

Ende als hi dit geseyt hadde, heeft hi geroepen met een groote stemme Lazare, coemt buyten.

44

Ende hi is voort gecomen die daer gestoruen was, hebbende handen ende voeten met banden ghebonden, ende zijn aensicht was verbonden met eenen doeck. Iesus seyde haer, Ontbint hem, ende laet hem gaen.

45

Daerom veel van die Ioden, die gecomen waren tot Mariam, ende Martham, ende gesien hadden, dat Iesus gedaen hadde, hebben in hem gelooft. *

46

Ende sommige van haer zijn wech gegaen totten Pharizeen, ende hebben haer geseyt, dat Iesus gedaen hadde.

47

+ Daerom hebben die ouerste priesters ende Pharizeen eenen raet vergadert, ende spraken, Wat doen wi? Want deze mensche [kolom] doet veel teekenen,

48

⁺Ist dat wi hem aldus laten, si sullen alle gader in hem geloouen. Ende die Romeynen sullen comen, ende sullen onse plaetse, ende volc nemen.

+ G

49

Ende een van haer genoemt Cayphas, als hi ouerste priester was van dat iaer, heeft gheseyt, Ghi en weet niet met allen,

50

noch ghi en ouerdenct niet, dattet profitelick is, dat een mensche sterft voor tvolck, op dattet geheel volck niet en vergae.

51

Dit en heeft hi van hemselfs niet gheseyt, maer als hi ouerste priester was van dat iaer, heeft hi gepropheteert dat Iesus steruen soude, voor tvolc,

52

ende niet alleen voor tvolck, maer om dat hi de kinderen Gods die verstroyt waren, in een vergaderen soude.

53

Daerom van dien dach af, hielden si raet met malcanderen, hoe dat si hem dooden souden.

54

Ende hierom en wandelde Iesus niet openbaer bi de Ioden, maer is wech ghegaen in en lant bi die woestine, in een stadt die geheeten is Effrem, ende daer woonde hi met zijn discipulen. *

55

Ende der Ioden Paesschen was nakende, ende veel wten lande zijnder op geclommen te Ierusalem, voor Paesschen, dat si hemseluen souden heylighen.

56

Aldus sochten si Iesum, ende spraken onder malcanderen inden tempel staende, Wat dunct v, dat hi niet ghecomen en is, totten feestdach?

57

Die ouerste priesteren ende Pharizeen hadden een gebot gegeuen, dat waert dat yemant geweten hadde, waer hi was, dat hijt soude te kennen geuen, op dat si hem mochten vanghen.