De Vorsterman Bijbel

§ Dat .x. Capittel.

1

⁺+ UOorwaer voorwaer seg ick v, die niet en gaet doer die dore in de scaeps koy: maer climt andersins in, die is een dief, ende moordenaer.

+ A

2

Maer die doer dye dore coemt is dye herder van dye scaepen.

3

Desen doet dye poortier op, ende dye schapen horen zijn stemme. Ende hy roept zijn eyghen schapen by namen, ende leytse wt.

4

Ende als hy zijn eyghen schapen wt ghesonden heeft, gaet hy voor haer, ende die scapen volgen hem, wantse zijn stem ghekent hebben.

5

Een vreemde sullen si niet volgen, maer sullen van hem vlien, want si dye stemme der vreemde niet ghekent en hebben.

6

Dese byspraeck heuet Iesus haer gheseyt, maer si en hebben niet [kolom] gheweten, wat hy haer sprack.

7

⁺Daer om heeft Iesus haer weder geseyt. Voorwaer, voorwaer seg ick v. Ick ben dye dore der schapen,

+ B

8

so veel alser gecomen zijn: zijn dieuen en moordenaers, mer dye scapen en hebben haer nyet gehoort.

9

Ic ben die dore. Ist datter yemant door mi ingaen sal, sal behouden zijn, ende hy sal ingaen, ende wtgaen, ende hi sal weyde vinden.

10

Een dief en coemt nyet, dan op dat hi mach stelen, ende doden, ende verderuen. Ick ben ghecomen, op dat si tleuen hebben moghen, ende oueruloediger hebben souden. *

11

⁺+ Ick ben een goet herdrr, Een goede herder, geuet zijn leuen voor zijn schapen.

+ C

12

Maer een huerlinc ende die gheen herder en is, wien die schapen nyet eyghen en zijn, die siet dye wolf comen, ende hi verlaet die schapen ende vliet, ende die volf grijpt, ende verstroeyt die schapen. ⁺

+ Esaie. xl Eze. 34

13

Die huerlinc vliet, wantet een huerlinc is, ende hi en heeft gheen sorch voor die schapen.

14

Ick ben een goede herder, ende ick ken mijn schapen, en die myne kennen mi.

15

Als my de vader kent, also ken ick oec den vader, ende ic sedt mijn siel voor mijn schapen. ⁺

+ Eze. 37.

16

Ende ic heb ander schapen, die nyet wt dese scaeps koy en zijn, ende die moet ick oec mede bi brengen, ende si sullen mijn stemme hooren ende tsal een scaeps koy, ende een herder worden. *

17

⁺Daerom heeft mi dye vader lief, want ick mijn siel set, op dat icse weder om nemen mach

+ D

18

Niemant en neemtse van mi, mer ick sedtse van mi seluen. Want ick heb macht haer te setten, ende ick heb macht haer weder om te nemen. Dat gebot heb ic van mijnen vader ontfangen.

19

Daer is weder om: een twist geworden onder die Ioden, om dese woorden. Want veel wt haer seyden,

20

hy heeft den duuel, ende hy raest, wat hoort ghi hem?

21

Die ander seyden. Dese woorden en zijn niet van een die den duuel heeft. Mach de duuel op doen, die oogen vanden blinde?

22

⁺+ Ende het was kerckwijnge te Hierusalem ende twas winter. ⁺

+ E

+ i.Macha. iiij.f.

23

Iesus wandelde inden tempel, in Salomons portael.

24

Daer dan hebben hem die Ioden omcingelt: ende seyden hem Hoe lange neemt ghi ons leuen? Ist dat ghi Christus zijt, segghet ons openbaer.

25

Iesus heeft haer geantwoort. Ick spreec v, ende ghy en ghelooftet nyet. Dye wercken dye ic doe inden naem mijns vaders, gheuen getuych van my.

26

Maer ghy en ghelooft nyet, want ghy nyet en zijt van mijn schapen.

27

Mijn schapen horen mijn stem, ende ick ken haer, ende si volgen my,

28

ende ick geue haer dat eewige leuen.

[p. H1r]

Ende si en sullen niet vergaen inder eewicheit ende niemant en salse wt mijn hant grijpen.

29

Mijn vader dat hi mi gegeuen heeft, dat is tmeeste van al, ende nyemant machse nemen wt mijns vaders hant.

30

Ick ende die vader zijn een.

31

Daerom hebben die Ioden steenen ghenomen, dat si hem steenighen souden.

32

Iesus heeft haer gheantwoort, ⁺ Ick hebbe v veel goede wercken bewesen wt minen vader, om dwelcke van dien wercken steenicht ghy my?

+ F

33

Die Ioden hebben gheantwoort, seggende, Om tgoede werc en steenigen wi v niet, maer om die blasphemie, ende want ghi vseluen god maect, als ghi nochtans een mensch zijt.

34

Iesus heeft haer geantwoort, Stater niet gescreuen in v wet, Ick heb geseit, ghi zijt goden?

35

Ist dat hi haer goden genoemt heeft, totten welcken twoort gods gesciet is, ende die scriften mach niet verloren gaen,

36

hem den ghenen dien de vader geheylicht heeft, ende gesonden heeft in die werelt, segt ghi, ghi blasphemeert, om dat ick geseyt heb, ic ben gods sone?

37

Ist dat ic niet en doe die wercken mijns vaders, en wilt mi niet gheloouen,

38

maer ist dat icse doe, ende ist dat ghi mi niet en wilt geloouen, ghelooft die wercken, op dat ghi moecht kennen, ende geloouen dat die vader in mi is, ende ic in den vader. *

39

Daerom sochten si hem te vanghen, ende hi is wt haer handen ghegaen,

40

ende is weder ghegaen ouer die Iordane, inde plaetse daer Ioannes eerst was doopende, ende is daer ghebleuen.

41

Ende veel zijnder tot hem ghecomen, ende seyden, Ioannes en toonde toch gheen teeken.

42

Maer alle tghene dat Ioannes van desen gheseyt heeft, dat was waer, ende veel gheloofden daer in hem.