De Vorsterman Bijbel

§ Dat .ix. Capittel.

1

⁺+ ENde Iesus voorbi gaende, heeft gesien een mensch blint van zijn geboorte af.

+ A

2

Ende zijn discipulen hebben hem geuraecht, Rabbi, wie heefter gesondicht: dese, oft zijn ouders: om dat hy blint gheboren is?

3

Iesus heeft geantwoort. Noch dese en heeft gesondicht, noch zijn ouders, maer op dat die werken gods in hem geopenbaert souden worden.

4

Ick moet wercken zijn wercken die mi gesonden heeft, so lange alst dach is, die nacht die coemt, als nyemant wercken en mach.

5

So lange als ick in die werelt ben, so ben ick tlicht des werelts.

6

Als hi dit gheseyt hadde, heeft hi gespogen opter aerden, ende heeft slijcke ghemaect wt spekel, ende heeft dat slijc gesmeert op zijn oogen,

7

ende sprack tot hem. Gaet ende wast v in dat badeken Siloe, dwelck so veel beduyt als gesonden. ⁺ Hi is wech gegaen, ende heeft hem gewasschen, ende is gecomen siende

+ B

8

Aldus zijn gebueren dye te voren gesien hadden, want hi een bedelaer was, seyden. Is dyt niet dese, die daer sadt, ende badt?

9

Die somige seyden, hi ist. Weder om ander, gheensins, mer [kolom] hy is hem gelijc. Mer hi seyde. Ick bent.

10

Daer om seyden si hem. Hoe zijn v die ooghen gheopent?

11

Hi heeft geantwoort. Die mensch dye Iesus heet: heeft slijck gemact, ende mijn oogen gesalft, ende heeft mi geseyt. Gaet tot dat badeken Syloe, ende wascht v, ende ick ben ghegaen, ende heb mi gewasschen, ende ick sie.

12

Ende sie hebben hem geseyt. Waer is die? Hi sprac Ick en weets nyet.

13

Si leyden hem, die welcke blint geweest hadde tot dye Pharizeen,

14

⁺ende twas Saboth, als Iesus tslijck gemaect heeft, ende zijn oogen geopent heeft.

+ C

15

Daer omme hebben hem die pharizeen weder gheuraecht, hoe hi tgesichte ghecregen hadde. Ende hi heeft geseyt. Hy heeft mi slijc op die oogen geleyt, ende ick heb my gewasschen, ende ick sie.

16

Daer om, seyden sommige vanden pharizeen. Dese mensche en is van god niet, want hi den saboth nyet en bewaert. Ende dander seyden, hoe mach een sondich mensch dese teekenen doen? Ende daer was twist onder haer.

17

Weder om seggen si den blinden. Wat segt ghi van hem die v ooghen gheopent heeft? Ende hi heeft hem geseyt. Hi is een propheet.

18

⁺Mer die Ioden en hebben niet gelooft van hem dat hi blint had geweest, ende tgesicht ontfanghen hadde, ter tijt doe dat si gheroepen hebben zijn ouders, des ghenen die tgesicht ghecregen hadde.

+ D

19

Ende hebben haer gheuraecht, seggende. Is dyet v soon, de welcke ghi segt, dat blint geboren is? Daer om: hoe siet hy nv?

20

Sijn ouders hebben haer geantwoort, ende gheseyt. Wij weten dattet onse soon is, ende dat hy blint gheboren is,

21

maer hoe dat hy nv siet en weten wi nyet, oft wie zijn ooghen geopent heeft en weten wi nyet, hi heeft zijn ouderdom, vraecht hem, laet hem van hem seluen spreken.

22

Dit hebben zijn ouders geseyt, om dat si die Ioden vreesden, want nv hadden die Ioden te samen op gesedt, dat, waert dat yemant belede hem Christus te zijn, die soude wter synagogen geworpen worden.

23

Daer om hebben zijn ouders geseyt. Hy heeft zijn ouderdom, vraecht hem.

24

⁺Daer om hebben si weder geroepen dye mensch die blint geweest was, ende hebben hem geseyt. Geeft god glorie, wi weten dat dese mensch een sondaer is.

+ E

25

Ende hy heeft haer geseyt. Oft hy een sondaer is dat en weet ick niet, een weet ic, als ic blint geweest hebbe, nv sie ic.

26

Daer om hebben si hem weder om geseyt, wat heeft hi v ghedaen? hoe heeft hi v de oogen gheopent?

27

Hy heeft haer gheantwoort. Ic heb v nv geseyt, ende ghy hebtet

[p. G8v]

gehoort, waer om wilt ghijt weder hooren, wilt ghi oec zijn discipulen worden?

28

Daer om hebben si hem vermalendijt, ende gheseyt. Weest ghi zijn discipel, wij zijn Moyses discipulen,

29

wi weten dat God tot Moysen ghesproken heeft, maer wij en weten nyet van waer dese is.

30

Die mensche heeft geantwoort: ende haer geseyt. Dit is wonderlick: dat ghi niet en weet van waer hi is, ende nochtans heeft hy mijn ooghen op gedaen.

31

⁺Wi weten dat God die sondaren niet en hoort, mer ist dat yemant Gods dienaer is, ende zijnen wil doet, dien hoort hi.

+ F

32

Ten is van die werelt niet gehoort, dat yemant heeft gheopent die ooghen des ghenen dye blint geboren is.

33

Het en waer dat dese ware van God, hy en soudet niet hebben mogen doen.

34

Si hebben geantwoort, ende gheseyt. Ghi zijt geheel in sonden gheboren, ende leert ghi ons? Ende si hebben hem buyten gheworpen.

35

Iesus heeft gehoort, dat si hem buten gheworpen hadden, ende als hi hem geuonden hadde, sprack tot hem. Gelooft ghy inden soon gods?

36

Hi heeft gheantwoort, ende geseyt. Wie isset heer, op dat ick hem gelouen mach?

37

Ende Iesus heeft hem gheseyt. Ende ghi hebt hem ghesien, ende die met v spreket die isset.

38

Ende hi seyde. Heer, ick geloof, ende neder vallende, heeft hem aengebeden. *

39

Ende Iesus heuet haer gheseyt. Tot een oordeel ben ick in dese werelt ghecomen op dat dye nyet en sien, sien: ende die sien, blint worden.

40

Ende somige vanden pharizeen, dye met hem waren hebben dit gehoort, ende hem gheseyt Sijn wij oec blint?

41

Iesus heeft haer geseyt. Waert dat ghi blint waert, ghi en sout gheen sonde hebben, mer nv segt ghy, wi sien, daer om so blijft v sonde.