De Vorsterman Bijbel

§ Dat .viij. Capittel.

1

⁺+ IEsus is gereyst totten berch van Oliueten,

+ A

2

ende metten dageraet is hi weder inden tempel gecomen, ende al tvolc is tot hem gecomen, ende sittende, leerde hi haer.

3

Ende die scriben ende pharizeen leyden tot hem een vrou in ouerspel gheuonden, ende hebben haer int midden gestelt,

4

seggende tot hem. Meester, dese vrou is nv geuonden in ouerspel,

5

Ende Moses heeft ons in die wet geboden, ⁺ dat al dusdanige ghesteent souden worden Daer om wat segt ghi?

+ Leui. xx.b.

6

Ende dit seyden si, tempterende hem, om dat si hem souden moghen besculdigen. Iesus hem nederbuygende, screef met den vinger in die aerde.

7

Als si dan bleuen vraghende, heeft hy hem opghebuert, ende geseyt. Die van v sonder sonde is, laet dien den alder eersten steen in haer worpen.

8

Ende hem weder buyghende, screef in dye aerde.

9

Dit hoorende, ghinghen si elck bisonder, dye een na dander wt, vanden ouderen beghinnende, ende Iesus is allen daer ghebleuen, ende die vrou int midden staende.

10

⁺Ende als hem Iesus opgebuert had: heeft hi haer geseyt. Vrou? waer zijn dye v beschuldichden? heeft v yemant verdoemt?

+ B

11

Welcke heeft geseyt. Nyemant Here. Iesus heeft haer gheseyt. Noch ick en sal v nyet verdoemen. Gaet ende hierna en wilt niet meer sondigen. *

12

Daer om heeft Ihesus haer weder ghesproken segghende.

+ Ic ben tlicht des werelts, die mi volcht en wandelt nyet in dye duysternissen, maer hy sal tlicht des leuens hebben.

13

Daer om hebben dye pharizeen tot hem geseyt. Ghy geeft ghetuych van v seluen, v ghetuych en is niet waerachtich.

14

Iesus heeft geantwoort

[p. G7v]

ende haer gheseyt. Al ist dat ick getuychnis geef van mi seluen, mijn getuychnis is waerachtich, want ick weet van waer ick gecomen ben, ende waer dat ick henen gae, mer ghy en weet niet van waer ick come, ende waer ick henen gae.

15

Ghi oordeelt nae den vleesch, ic en oordeel nyemant,

16

ende oft ick oordeel, mijn oordeel is waer, want ic niet alleen en ben, mer ick ende die vader, welcke mi ghesonden heeft.

17

⁺Ende in uwe wet is ghescreuen, dattet getuych van twee menschen waerachtich is.

+ C

18

Ick ben die ghene die getuychnis geef van mi seluen ende die vader die my ghesonden heeft, die gheeft getuych van my.

19

Daer om seyden si hem, waer is v vader? Iesus heeft gheantwoort. Ghy en weet my nyet, noch mijnen vader. Waert dat ghi mi wist, ghy sout oec by auonturen mijnen vader weten.

20

Dese woorden heeft Iesus ghesproken bi dofferkist, leerende inden tempel. Ende nyemant en heeft hem gheuangen, want zijn vre en was noch niet ghecomen. *

21

+ Daer om heeft haer Iesus weder geseyt Ick gae, ende ghi sult mi soecken, ende ghi sult in v sonden steruen. Daer ick gae, daer en moecht ghy niet comen.

22

Daer om seyden de Ioden. Sal hy hem seluen dooden? want hy seyt, daer ick gae, daer en moecht ghi niet comen.

23

Ende hy seyde haer. Ghy zijt van beneden, ick ben van bouen. Ghy zijt van dese werelt, ick en ben van dese werelt nyet,

24

Daer om heb ick geseyt, dat ghi in uwe sonden steruen sult. Want ist dat ghy nyet en ghelooft, dat ict ben, soe sult ghy in v sonden steruen.

25

⁺Daer om seyden si hem. Wie zijt ghi? Ende Iesus seyt haer. Dbeghin, die met v spreec

+ D

26

Ick hebbe veel van v te seggen ende te oordelen, mer die mi ghesonden heeft is waerachtich, ende ick spreeck in die werelt, dat ick van hem gehoort heb.

27

Ende si en hebben niet verstaen, dat hi god zijn vader noemde.

28

Daer om heeft Iesus haer gheseyt. Als ghy den soon des menschen verheuen sult hebben, dan sult ghi kennen dat ict ben, ende dat ick wt mi seluen niet en doe, maer alsoe als my mijn vader geleert heeft, dat spreec ick.

29

Ende die mi ghesonden heeft die is met my, die en heeft mi niet alleen ghelaten, want ick doe altijt dat hem behaechlich is, *

30

Doen hy dyt seyde, hebbender veel in hem ghelooft.

31

+ Daerom seyde Iesus totten Ioden, die in hem geloeft hadden. Ist dat ghi blijft in mijn woorden, so sult ghi waerachtich mijn discipu-[kolom]len zijn,

32

ende ghi sult die waerheyt kennen, ende die waerheyt sal v vrij maken.

33

Si hebben hem gheantwoort. Wij zijn tsaet van Abraham, wij en hebben nye yemant ghedient. Hoe segget ghi, ghi sult vrij worden?

34

⁺Iesus heeft haer geantwoort. Voorwaer voorwaer segge ic v. ⁺ Alle die sonde doet, is knecht van die sonde.

+ E

+ 2.petr. 2.b

35

Die knecht en blijft niet eewelic int huys, mer die soon blijfter eewelick.

36

Daer om, ist dat v die soon vrij maect, so zijt ghi waerachtich vrij.

37

Ick weet dat ghi Abrahams kinderen zijt, mer ghy suect my te dooden, om dat mijn woort in v niet en vaet.

38

Ick spreeck dat ick by mijnen vader gesien hebbe, ende ghi doet dat ghi by uwen vader ghesien hebt. *

39

Si hebben hem geantwoort, ende gheseyt Onse vader is Abraham. Iesus seyde haer. Ist dat ghi Abrahams kinderen zijt, doet Abrahams wercken.

40

Mer nv suect ghi mi te doden, een mensch, die v die waerheyt geseyt heb, dye welcke ick van god gehoort heb, dat en heeft Abraham niet gedaen,

41

ghi doet die wercken van v vader.

Aldus hebben si hem geseyt. Wij en zijn wt gheen bastaerden gheboren, wi hebben eenen vader god.

42

Iesus heeft haer gheseyt. Waert dat god v vader waer, vorwaer, ghi soudt my lief hebben, want ick ben wt god voort ghegaen ende ghecomen, want ick en ben van my seluen niet ghecomen, maer hi heeft mi gesonden.

43

Waer om en kent ghi mijn spraeck niet? want ghi en moecht mijn woorden niet horen.

44

⁺Ghi zijt wt den vader den duuel, ende die begeert van uwen vader wilt ghi volbrenghen. ⁺ Hi was een dootslager int beghin, ende in dye waerheyt en heeft hy niet gestaen want dye waerheyt en is in hem niet. Als hi loghen spreect, spreect hi wt zijns selfs, want hy is logenachtich, ende die vader des logens

+ F

+ i.Ioan. iij.b

45

Ist dat ick v die waerheyt segge: ghi en ghelooft my niet.

46

+ Wie van v sal my straffen van sonde? Ist dat ick v die waerheyt segghe: waer om en gelooft ghi my niet.

47

Die wt god is, hoort Gods worden. *

Daer om en hoort ghy niet, want ghy wt god nyet en zijt.

48

Daer om hebben die Ioden geantwoort ende seyden hem. Segghen wi niet wel, dat ghi een Samaritaen zijt, ende den duuel hebt

49

Iesus heeft geantwoort. Ick en heb den duuel niet, maer ick eer mijnen vader ende ghi hebt mi onteert.

50

Ick en soeck mijn glorie niet:

[p. G8r]

hy isser diese soect, ende oordeelt.

51

⁺Voorwaer voorwaer segge ic v. Ist dat yemant mijn woorden bewaert, die en sal den doot niet sien inder eewicheit.

+ G

52

Daer om hebben hem die Ioden geseyt. Nv bekennen wij dat ghi den duuel hebt. Abraham is gestoruen ende die propheten, ende ghy segt: waer dat yemant mijn woorden bewaerde, die en sal niet smaken den doot inder eewicheyt.

53

Sijt ghy meerder dan onse vader Abraham, die gestoruen is, ende die propheten zijn ghestoruen? Wie maect ghy v seluen?

54

Iesus heeft geantwoort. Ist dat ic mi seluen glorificeer, soe is mijn glorie niet, mijn vader ist die welcke mi glorificeert, die ghi segghet, want het is ons God.

55

Ende ghy en hebbet hem nyet ghekent, maer ick hebbe hem ghekent. Ende waert saeck dat ick segge, dat ick hem niet en kenne, ick sal ws ghelijcs wesen logenachtich. Maer ic kenne hem: ende zijn woort beware ick.

56

Abraham v vader heeft hem verblijt dat hi sien soude mijnen dach, hy heeften ghesien, ende is verblijt

57

Daer omme hebben die Ioden tot hem gheseyt. Ghy en hebt noch gheen vijftich iaer, ende hebt ghy Abraham ghesien?

58

Ihesus heeft haer geseyt. Voorwaer, voorwaer segghe ick v. Eer Abraham worde ben ick.

59

Daer om namen si steenen om op hem te worpen, ende Iesus heeft hem seluen verborgen: ende is wten tempel ghegaen. *