De Vorsterman Bijbel

§ Dat .vij. Capittel.

1

⁺NA dat hi geeynt hadde alle zijn woorden in die ooren des volcs, ⁺ is hi gheghaen in Caphernaum.

+ A

+ Mat. viij.

2

Ende een dienaer van Centurio sieck wesende, beghonst te steruen, den welcken hem zeer weert was.

3

Maer als hi ghehoort hadde van Iesu, heeft hi gesonden die oudtste der Ioden tot hem, biddende, dat hi woude comen, ende gesont maken sinen dienaer.

4

Ende doen si gecomen waren tot Iesum, baden si hem sorchfuldichliken, segghende, Hi ist waerdich dat ghi hem dat doet,

5

want hi bemint ons volck, ende heeft ons getimmert een Synagoge.

6

Iesus ghinck met haer, ende doen hi niet verde vanden huyse en was, heeft Centurio gesonden tot hem vrienden, seggende hem, ⁺ Heere, en wilt niet vermoeyt worden, want ick en ben niet waerdich dat ghi sult ingaen onder mijn dack,

+ B

7

daerom oock en heb ic mi seluen niet waerdich gerekent, om tot v te comen, maer segghet een woort, ende mijn knecht sal ghesont worden,

8

Want ick ben een man die oock stae onder macht, hebbende ruyteren onder mi Ende ic segge desen gaet, ende hi gaet, ende een ander coemt, ende hi coemt. Ende minen dienaer, doet dat, ende hi doet dat.

9

Iesus dese woorden gehoort hebbende, heeft verwondert van hem, ende omgekeert wesende, sprac totten scharen die hem volchden. Ick seg v voorwaer, ick en heb niet geuonden alsodanigen ghelooue in Israel.

10

Ende wederom ghecomen wesende in huys, die gesonden waren, hebben gheuonden, den dienaer die daer cranck gheweest was, ghesont.

11

+ Ende daer nae ist gesciet, dat Iesus ginc in een stat, die daer hiet Naym. Ende zijn discipulen, ende een groote schare van volc ghingen met hem.

12

⁺Maer als hi nakende was die poorte des stadts, siet, so is een eenighe sone van zijnre moeder daer wtgedraghen. Ende dese was een weduwe, ende een groote schare des volcs vander stadt waren met haer.

+ C

13

Die welcke als die heere gesien hadde, beroert wesende met barmherticheit op haer, seide haer, En wilt niet screyden,

14

ende hi is ingegaen ende heeft geraect die baer, ende die daer waren dragende, zijn bliuen staen, ende hi sprac, Iongelinck, ick seg v staet op.

15

Ende hi is opgestaen die daer doot geweest was, ende hi beghonde te spreken. Ende hi ghaf hem zijn moeder,

16

ende een vreese heeft haer allen be-[kolom]uangen, ende si maecten groot God, segghende, Een groot propheet is opgestaen onder ons, ende Godt heeft versocht zijn volc. *

17

Ende dese sprake van hem is wtgegaen door heel Iudeen, ende alle die landen daer ontrent.

18

Ende die discipulen Ioannis, hebben Ioanni ghebootschapt al dese dinghen.

19

Ende Ioannes heeft tot hem geroepen twee van sinen discipulen, ende heeftse gesonden tot Iesum, segghende, Sijt ghi die daer comen sal? oft verwachten wi een ander

20

Ende wanneer die mannen gecomen waren tot hem, hebben geseit, Ioannes baptista heeft ons gesonden tot v, seggende, ⁺ Sijt ghy die ghene die daer comende is? oft verwachten wi een ander?

+ D

21

Inde selue vre heeft hijder vele ghesont ghemaect, van siecten ende plaghen, vanden boosen gheesten, ende veel blinde tghesichte ghegeuen

22

Ende antwoordende seyt haer, Ghaende so vercondicht Ioanni, de dingen, die ghi gesien ende gehoort hebt, Als dat die blinde sien, die cruepele ghaen, die malaetse worden gesuyuert, de dooue hooren, die doode verrisen, den armen wort dat Euangely ghecondicht.

23

Ende salich is hi, die welcke in mi niet gheschandalizeert en wort.

24

Ende na dat die boden Ioannis wech gheghaen waren, beghonst hi te spreken totten scharen, van Ioanne, Waerom zijt ghi wt ghegaen inder woestinen? om dat ghi sien soudt een riedt, gheboghen vanden winde?

25

Maer waerom zijt ghi wtgheghaen? om te sien een mensche ghecleedt met saeften cleederen? Siet, die daer zijn in costelijc habijt, ende in weelden, zijn in coninghen houen.

26

Maer wat zijt ghi wt ghegaen te sien? een propheet? ⁺ ick seg v voorwaer, ende meerder dan een propheet.

+ E

27

Dese is, daer van ghescreuen is, Siet, ick seynde minen engel voor v aenschijn, die welcke bereyden sal uwen wech voor v,

28

want ick seg v, + Dat niemant onder die gheboren der vrouwen, en is meerder propheet dan Ioannes baptista. Nochtans die de minste is int rijc Gods, is meerder dan hi.

29

Ende allet volck hoorende, ende die publicanen die ghedoopt waren met Ioannis doopsel hebben God rechtueerdich gemaect.

30

Maer die Pharizeen ende gheleerde des wets niet van hem ghedoopt wesende, hebben teghens henseluen Gods raet versmaet.

31

Maer die Heere seyde, Die menschen dees gheslachts, bi wien sal icse doch ghe-

[p. E7r]

lijcken? ⁺ ende wien zijn si ghelijck?

+ matt. xi.b.

32

Si zijn gelijck den kinderen, sittende op die marct ende tot malcanderen roepende, ende seggende, Wi hebben v ghesonghen in pijpen ende ghi en hebt niet gesprongen, Wi hebben v droefheit gecondicht, ende ghi en hebt niet gescreyt,

33

Want Ioannes baptista is gecomen, noch broot etende, noch wijn drinckende, ende ghi segt, Hi heeft den duyuel in.

34

Die sone des menschen is gecomen, etende ende drinkende, ende ghi segt, Siet, dese vrate mensch, ende wijnsuyper, een vrient van publicanen, ende van sondige menschen.

35

Ende die wijsheyt is rechtueerdich bewesen van allen haeren kinderen. *

36

⁺+ Een vanden Pharizeen badt hem, als dat hi woude met hem comen eten. Ende ingegaen in des Pharizeen huys, heeft aen die tafel geseten.

+ F

37

Ende siet, een vrouwe, die welcke daer was inde stadt een sondaerster. Als si verstaen heeft dat Iesus was etende int huys des Pharizeeus, heeft si met haer genomen een vat van Albasten met salue,

38

ende staende achter bi zijn voeten, heeft begonnen met haeren tranen te wasscen zijn voeten, ende mettet haer haers hoofts gedroocht, ende custe zijn voeten, ende salfdese metter saluen.

39

Maer dit siende die Pharizeeus die hem genoot hadde, sprac in hem seluen, seggende, Waert dat dese een propheet waer, hi soude sekerlic wel weten, wie ende wat dat voor een wijf waer die hem raect, want si een sondaerster is.

40

Ende Iesus antwoordende, seyde tot hem Simon, ic heb wat dat ic v seggen wil. Ende hi sprac, Meester segt.

41

Daer waren twee schuldenaeren van eenen rentmeester, die een was hem schuldich, vijfhondert penningen, ende die ander vijftich.

42

Maer als si niet machtich en waren, om te betalen, heeft hise beyde gader quijt geschouden. Hier om segt mi, welc van desen bemint hem meest?

43

Simon antwoordende sprac, Ic vermoede dat die ghene, den welcken hi meest quijt heeft gescouwen. Doen seyde hi tot hem, Ghi hebt recht geoordeelt.

44

Ende hi gekeert wesende totter vrouwen, seyde tot Simon, Siet ghi wel dese vrouwe? Ic ben gecomen in v huys, ende ghi en hebt niet ghegheuen water tot mijnen voeten, mer dese heeft gewasschen mijn voeten met haeren tranen, ende ghedroocht met haeren hare.

45

⁺Ghi en hebt my niet ghegheuen een cus, maer dese na dat si hier gecomen is, en heeft niet op ghehouden te cussen mijn voeten.

+ G

46

Ghi en hebt niet gesalft mijn hooft met olie, mer [kolom] dese heeft ghesalft mijn voeten met salue

47

Waerom seg ic v, Haer worden veel sonden vergheuen, want si veel bemint heeft. Maer die weynich vergeuen wort, die bemint weynich.

48

Ende hi sprack tot haer v sonden worden v vergheuen.

49

Ende die daer te samen aten, beghonden in haer seluen te spreken, Wie is dit, die daer ooc vergeeft de sonden?

50

maer hi sprac totter vrouwen, V ghelooue heeft v salich gemaect, gaet in vreden.