De Vorsterman Bijbel

§ Dat .vi. Capittel.

1

⁺ENde het gheuiel opten anderen eersten Sabboth, ⁺ dat Iesus ghinck door koren. Ende zijn discipulen plucten aren, ende [kolom] atense, wriuende die in haer handen.

+ A

+ marc. ij.d. mat. xij.a.

2

Ende sommige vanden Pharizeen seyden haer Waerom doet ghi, dat niet en betaemt op den Sabboth?

3

Ende Iesus antwoordende haer, seyde, En hebt ghi niet ghelesen dat welck Dauid dede doen hem hongerde, ⁺ ende die ghene die met hem waren,

+ i.re. xxi.b.

4

hoe dat hi ingegaen is int huys Gods, ende nam des voorsettincs brooden, ende adt, ende ghaft den ghenen die bi hem waren, den welcken niemant en betaemt te eten, dan alleen den priesteren.

5

Ende seyde haer, Die sone des menschen is een heere, ooc des Sabboths.

6

+ Ende het is gheschiet op eenen anderen Sabboth, ⁺ als dat hi in ginc in inde Sinagoge, ende leerde. ⁺ Ende daer was een mensche die zijn rechter hant was dorre.

+ B

+ matt. ij.a. Mar. iij.a

7

Ende die Scriben ende Pharizeen wachten op hem, oft hi oock ghesondt soude maken, opten Sabboth, om datse mochten vinden, waer van si hem mochten beschuldigen.

8

Hi wiste haer gedachten, ende sprac totten mensche die daer hadde een dorre hant, Staet op, ende staet int middel, ende opstaende, soe stont hi.

9

Iesus sprac doen tot haer, Ic vraghe v, oft gheoorloeft is opten Sabboth goet te doen, oft quaet te doen, die ziele te behouden, oft te verliesen?

10

Ende ouergesien hebbende hen allen, seyde hi den mensche, Steect wt dijn hant, ende hi dedet. Ende zijn hant is hem wederom gesont gemaect

11

Ende si zijn veruult met onwaerdicheyt, ende spraken tsamen onder henlieden, watse van Iesu doen souden. *

12

Ende het is gheschiet in dien daghen, dat hi wtgheghaen is inden berch om te bidden, ende was daer vernachtende in die biddinge Gods.

13

Ende doent dach gheworden was, heeft hi gheroepen zijn discipulen, ende heefter twaelf wtgecoren van hen lieden, ⁺ die welcke hi ooc genoemt heeft Apostolen,

+ matte. x.a marc. iij.b. ende .vi.a. Actuum. i.b.

14

Symonem, den welcken hi geheeten heeft Petrum, ende Andreas sinen broeder, Iacob ende Ioannes, Philippus ende Bartholomeus,

15

Mattheus ende Thomas, Iacob Alpheus sone, ende Symon die daer hiet Zelotes,

16

ende Iudas Iacobus sone, ende Iudas Scarioth, die daer was die verrader.

17

Ende nederdalende met haer vanden berghe, stont in een plat velt, ende die scare zijnre discipulen, ⁺ ende een groote menichte van volck wt al tlant van Iudeen, ende van ontrent die zee, ende Ierusalem, ende van Tyro ende Sydon,

+ C

18

die welcke gecomen waren

[p. E6r]

om hem te hooren ende ghesont te worden van haeren siecheden. Ende die daer ghequelt worden vanden onsuyueren gheesten worden ghenesen.

19

Ende alle die schare begheerde hem te raken, want een cracht wt ghinc van hem, diese alle gesont maecte.

20

Ende opslaende zijn ooghen op zijn discipulen, seyde, Salich arme, want v hoort toe trijck Gods.

21

Salich die daer nv honghert, want ghi sult versaet worden. Salich die daer nv screyt, want ghi sult lachen.

22

+ Salich sult ghi wesen, ⁺ wanneer v die menschen haten, ende afscheyden v, ende verwiten v, ende verworpen uwen naem als quaet, om den sone des menschen.

+ amos. vi.a

23

⁺Verblijt v in dien dach, ende veruroghet v, want siet v loon is groot in die hemelen. Na deser wijsen deden haer voorvaders den propheten.

+ D

24

Nochtans voorwaer, wee v rijcke die daer hebt uwe vertroostinghen.

25

Wee v die daer versaedt zijt, want ghi sult hongheren. Wee v die daer nv lacht, want ghi sult screyen ende huylen.

26

Wee v, wanneer v alle die menschen prisen. Want na deser wisen, hebben haer voorvaders gedaen den valschen propheten.

27

Maer ick segghe v die hoort, Bemint uwe vianden, doet goet den ghenen die v gehaet hebben.

28

Ghebenedijt den ghenen die v vermaledien. ⁺ Ende bidt voor die v verdriet aen doen.

+ Mat. vi.g

29

Biet den ghenen die v slaende is aen v wanghe, oock die ander. ⁺ Ende die ghene die v afneemt uwen mantel, en wilt oock niet verbieden te nemen uwen rock.

+ E

30

Gheeft alle den ghenen die yet van v begheren, ende eyschet oock niet weder vanden ghenen die dat v ontnemen.

31

Ende also ghi wilt dat die menschen v doen sullen, ⁺ so doet haer oock des ghelijcs.

+ Tobi. iiij.c matthei. v

32

Ende ist dat ghi bemint die v beminden wat danc is v dat? Want die sondaren beminnen oock den ghenen, daer si van bemint worden.

33

Ende ist dat ghi weldoet den ghenen die v weldoen, wat danc is v dat? Voorwaer, die sondaren doen ooc dat.

34

Ende ist dat ghi leent dien, vanden welcken ghi hoept wederom te ontfanghen, wat danck is v? Want die sondaren leenen den sondaren, datse souden des ghelijcs ontfangen.

35

Nochtans bemint uwe vyanden, ende doetse goet, ende leent haer, nyet daer van hopende, ende v loon sal groot wesen. * Ende ghi sult wesen kinderen des alder oppersten, want hi is goedertieren ouer die ondancbaren ende quaden. [kolom]

36

⁺Daerom so weest barmhertich, als ooc v vader barmhertich is.

+ F

37

En wilt niet oerdelen, ende ghi en sult niet geoerdelt worden, Ende wilt niet verdoemen, ende ghi en sult niet verdoemt worden. Vergheeft, ende v sal vergheuen worden.

38

Gheeft, ende v sal gegeuen worden. Si sullen geuen een goede, volle, geschudde ende ouerloopende mate, in uwen schoot. Sekerlic, metter seluer mate daer ghi mede metet, sal v gemeten worden.

39

Hy seyde haer oock een ghelijckenisse. Mach oock een blinde een blinde leyden? Vallen si niet beyde inden gracht?

40

Die discipel en is bouen sinen meester niet, maer een yegelick sal volmaect wesen, is dat hi is ghelijck zijn meester.

41

Maer wat siet ghi een splinter int ooghe ws broeders, maer den balc in v ooge en merct ghi niet aen?

42

Ende hoe moecht ghi seggen tot uwen broeder, Broeder, gehenget dat ick mach wt worpen tsplinter dat in v ooge is, ende en siet niet den balc in v ooghe? Ghi ypocrijt, werpt wt eerst den balc wt v ooghe, ende dan sult ghi voort sien dat ghi moghet wtworpen die splinter, welc is int ooge ws broeders.

43

Want het en is gheen goet boom, die daer quade vruchten brengt, noch ooc gheen quaet boom is brenghende goede vrucht.

44

Want een yegelick boom wort bekent, wt zijn vrucht. ⁺ Noch si en plucken oock gheen vigen van doornen, noch si en snijden ooc gheen druyuen van bramen.

+ Mat. vij.c

45

Een goet mensche wt den goeden schat zijns herten, brenget goet voort. ⁺ Ende een quaet mensche, ⁺ wt een quaden schat zijns herten, brenget quaet voort, Want wt oueruloedicheyt des herten spreect den mont.

+ G

+ matt. xij.c.

46

Maer waerom hiet ghi mi, heer heer, ende ghi en doet niet dat gheen, dat ick v segghe?

47

Soe wie tot mi coemt, ende hoort mijn woorden, ende doet die, ick sal v thoonen wien die gelijck is.

48

Hi is gelijck eenen mensche timmerende een huys, die daer int diepe gedoluen heeft, ende het fundament ghesedt op een steen, gecomen wesende eenen grooten opuloet, heeft die stroom geslagen aent huys, ende en heeft dat niet moghen beroeren, want het was ghetimmert op den steen.

49

Maer diese gehoort heeft ende niet gedaen, is gelijck een mensche, die zijn huys tymmert opter aerden sonder fundament aenden welcken die vloet geslaghen heeft ende ter stont ist neder geuallen, ende die val

[p. E6v]

des huys is gheworden zeer groot.