De Vorsterman Bijbel

§ Dat .viij. Capittel.

1

⁺IN dien daghen, alser weder om een zeer groote schare was met Iesu, ⁺ ende nyet en hadden dat si aten. Ihesus zijn discipulen tot hem gheroepen hebbende, seyde haer.

+ A

+ Mat. xv.d

2

Mi ontfermt ouer die scharen, want siet si nv drie daghen bi mi bliuen, ende en hebben niet dat si eten.

3

Ende laet ick haer nuchteren thuys gaen, si sullen vergaen inden wech, want sommighe van haer zijn van verde comen.

4

Ende zijn discipulen hebben hem geantwoort. Van waer sal yemant dese hier mogen versaden met broode inde woestine?

5

Ende hi heeft haer gheuraecht. Hoe veel brooden hebt ghi? Ende si hebben hem gheseyt seuen.

6

Ende hi heeft die scharen gheboden te sitten op deerde. Ende die seuen brooden ghenomen hebbende, als hi ghedanct hadde, heeft hijse ghebroken, ende zijn discipulen ghegheuen, dat zijse voor souden legghen. Ende si hebbense die scaren voor geleyt.

7

Ende si hadden weynich visschen, ende als hi ghebenedijt hadde, heeft gheboden dese ooc voor te legghen.

8

Ende si hebben ghegeten, ende zijn versaet. Ende hebben op ghenomen seuen koruen, van dye brocken die daer ouer ghebleuen waren,

9

Ende die daer ghegeten hadden, waren bi na vier dusent, ende hy heeft haer gelaten. *

10

Ende ter stont int schip gegaen zijnde met zijn discipulen, ⁺ is gecomen in die palen van Dalmanutha.

+ Mat. xvi a Ioan. ij.d.

11

+ Ende die pharizeen zijn wt gegaen, ende hebben begonnen onderlinge te vraghen, soeckende van hem een teeken wt den hemel, ⁺ tempterende hem.

+ B

12

Ende als hi versucht had in sinen geest, heeft hi geseyt. Waer om soect dit geslacht een teeken? Voorwaer seg ic v, dit gheslacht en sal gheen teeken gegeuen worden.

13

Ende haer gelaten hebbende, is weder om int scip ghegaen, ende ouer varende, is hi henen ghegaen.

14

Ende si hebben vergeten broden te nemen, ende niet dan een broot hadden si met haer int scip. ⁺

+ Luc. xij.a Mat xxi b

15

Ende hi heeft haer gheboden, seggende. Siet, wacht v vanden deesem der pharizeen, ende van Herodes deesem:

16

Ende si dachten onder haer, segghende: wi en hebben gheen brooden.

17

Ende als Iesus dat wist, seyt hi haer Wat denct ghi dat ghy gheen brooden en hebt merct ghi noch niet, ende verstaet ghi noch niet? hebt ghi noch v hert verblint?

18

oogen hebbende en siet ghi niet, ende ooren hebbende en hoort ghi niet?

19

ende en gedenct ghi niet, als ic vijf broden gebroken hadde tot vijf dusent menschen hoe veel koruen met brocken dat ghi opgeno-

[p. D4v]

men hebt? ⁺ Si seggen hem twaleue.

+ C

20

Ende als seuen brooden ghebroken waren, ⁺ onder vier duysent, hoe veel manden met brocken vant ouerblijf hebt ghi opgenomen? Ende si hebben gheseyt seuen.

+ psal. cxiij Mar. vi.e. ende .viij.a

21

Ende hi heeft haer geseyt. Hoe coemet dat ghy noch nyet en verstaet?

22

Ende hy is ghecomen tot Betsayda, ende si brochten tot hem een blinde, ende baden hem dat hi hem raecte.

23

Ende ghenomen hebbende des blinden hant, heeft hem wtgheleyt buten den wech, ende spouwende in zijn ooghen ende die hant op hem geleyt hebbende, heeft hem geuraecht, wat hi sach.

24

Ende opsiende heeft hy gheseyt. Ick sie menschen, wandelende als boomen.

25

Daer na heeft hy weder om zijn hant op zijn oogen geleyt, en heeft begonnen te zien, ende is wel gestelt geworden, also dat hi alle dinck claerlijcken sach,

26

ende hi heeft hem gesonden in zijn huys, * seggende. Gaet na v huys, ende ist dat ghi opt strate coemt, en segges nyemant.

27

Ende Iesus is ingegaen ende zijn discipulen, in die casteelen van Cesarie Philippi. Ende inden wech heeft hi zijn discipulen geuraecht, ⁺ segghende. Wie segghen die menschen dat ick ben?

+ mar. xvi.a Luc. ix.c

28

Ende si hebben hem gheantwoort, seggende. Dander Ioannem Baptistam, ende die ander Helyam. Weder om dye ander een vanden Propheten.

29

Ende hy seyt haer. Maer wie segt ghy dat ick ben? Ende Petrus antwoordende, seyt hem. Ghy zijt Christus.

30

Ende hy heuet haer gedreyghet dat zij nyemant van hem segghen en souden.

31

Ende heeft haer beghinnen te leeren, dattet van node was die soon des menschen veel te lijden, ende versmaet te worden vanden ouderen, ende opperste priesteren, ende scriben ende gedoot te worden, ende nae drie dagen te verrijsen.

32

Ende hi sprack tot haer twoort openbaerlick. Ende Petrus greep hem, ende begonst hem te straffen:

33

⁺ende hi omghekeert wesende, ende zijn discipulen aenghesien hebbende, heeft Petrum gestraft, segghende. Gaet achter my Sathanas, want ghi en smaect niet dat godlick is, maer dat menschelick is.

+ D

34

Ende als hi die scare te samen met zijn discipulen tot hem gheroepen hadde, ⁺ heeft haer gheseyt. So wie dat mi na volgen wil, dye versaeck hem seluen, ende neme zijn cruys ende volghe mi na.

+ Luce. ix.c. Mat. x.d.

35

Want wie zijn siele sal willen behouden sal die verliesen. Mer wie zijn siel sal verliesen om mi, oft omt Euangelijs wille, sal-[kolom]se behouden.

36

Want wat soudt een mensche baten, waert dat hi alle die werelt wonne, ende zijn siele schade dede? ⁺

+ Luce. xij.b

37

Oft wat sal een mensche geuen, daer hi zijn siele mede lost? ⁺

+ mat. xvi.d

38

Want so wie mi ende mijn woorden beliden sal in dit ouerspelige ende sondige gheslacht die sone des menschen sal hem ooc beliden, als hi comen sal met die heylige engelen, in die glorie zijns vaders.