De Vorsterman Bijbel

§ Dat .ix. Capittel.

39

⁺ENde hy seyde haer. Voorwaer segge ic daer zijn sommige onder die hier staen, ⁺ die den doot niet smaken en sullen, voor dat si sien sullen, dattet rijck gods gecomen is met cracht.

+ A

+ Luc. ix.d mat. xvij.a

1

Ende na ses daghen heeft Ihesus tot hem ghenomen Petrum, Iacobum ende Ioannem, ende leyde haer alleen op eenen hooghen berch,

2

ende hi is verandert voor haer ende zijn cleederen zijn blinckende gheworden, ende zeer wit als znee, so wit als gheen voller op aerden maken en mach.

3

Ende daer is van haer ghesien Helyas met Moyses. Ende si spraken te samen met Iesu.

4

Ende Petrus antwoordende, seyt Ihesu. Rabbi, hier is ons goet te wesen. Laet ons drie tabernaculen maken, v een, ende Moses een, ende Helye een:

5

want hy en wist niet wat hi seyde, want si waren veruaert, ouermits vreese.

6

Ende daer is een wolcke gecomen, ⁺ dye welcke haer om scheemde. Ende daer is een stem wt den wolcke ghecomen, segghende. Dit is mijn alder liefste soon, hoort hem.

+ Mat. iij Mar. i. Luc. iij.

7

Ende ter stont als si ront om ghesien hadden, en hebben si nyemant meer ghesien, dan alleen Iuesum met haer.

8

⁺Als si vanden berch clommen, heeft haer Iesus gheboden, dat zijt nyemant seggen en souden tghene dat si ghesien hadden, nyet eer, dan als dye soon des menschen vanden dooden opghestaen ware.

+ B

9

Ende dit woort hebben si by haer ghehouden, vraghende onder haer, wat dat waer, ⁺ als hi vanden dooden opghestaen sal zijn,

+ Luce. ix.

10

Ende si vraechden hem, segghende. Wat segghen dan die scriben ende pharizeen, dat Helyas eerst comen moet?

11

Ende hi antwoordende, heeft haer geseyt. Tis waer, als Helyas eerst comen sal so brenct hy alle dinck op sinen stel, ende ghelijckerwijs als daer ghescreuen is van dye soon des menschen, ⁺ dat hi veel liden moet ende versmaet werden.

+ Mat. xvi. ende .xvij. Mar. viij. Luce xviij.

12

Mer ick segge v, dat Helyas gecomen is, ende si hebben hem gedaen al dat si ghewilt hebben, alsser van hem gescreuen was.

[p. D5r]

13

⁺Ende als hi gecomen was tot zijn discipulen, heeft hi een groote schare om haer ghesien, ende dye scriben met haer vraghende.

+ C

14

Ende ter stont als alle die schare hem gesien hadde, so heeft hi verwondert ende gheureest, ende tot hem loopende, hebben si hem ghegroet.

15

Ende hy heeft haer gheuraecht. Wat vraechdi onder v?

16

+ Ende een wt de schare antwoordende heeft gheseyt. ⁺ Meester. Ic heb mijn soon, welcke heeft een stomme gheest, tot v ghebrocht,

+ Luce. ix.f. mat. xvij.c

17

ende wanneer dat hi hem aen grijpt, so schuert hy hem, ende hy schuymt ende knerst met zijn tanden, ende verdwijnt. Ende ick hebt v discipulen gheseyt dat si hem souden wtwerpen, ende si en hebben niet ghemoghen.

18

Ende hi antwoordende heeft hem gheseyt. O ongeloouighe gheslacht, hoe langhe sal ick by v bliuen? hoe langhe sal ick v liden? Brengt hem tot mi,

19

ende si hebben hem tot hem gebrocht. Ende als hi van hem gesien was, ter stont verschuerde hem de gheest, ende neder gheuallen zijnde op deerde, worde hi ghewentelt, schuymende.

20

Ende hi heeft zijn vader gheuraecht, ⁺ Hoe veel tijts ist dat hem dyt ghebuert is? Ende hy heeft gheseyt. Van kints af,

+ D

21

ende dicwils worpt hi hem int vier ende int water, om hem te verderuen. Maer ist dat ghy wat muecht. Coemt ons te hulpe: ontfermt onser.

22

Ende Ihesus heeft hem gheseyt. Muchdi dat gheloouen? Den gheloouende is alle dinc moegelick.

23

Ende ter stont seer luyde roepende die vader des kints, heeft met tranen gheseyt. Ick ghelooue heer. Coemt mijn onghelooue te hulpe.

24

Ende als Iesus gesien hadde, dat die schare te samen aenliepen, so heeft hy geboden den onreynen gheest, seggende hem. Ghi stomme ende dooue gheest, ick ghebiede v, gaet wt van hem, ende en comt namaels in hem niet

25

Ende als die gheest gheroepen hadde, ende hem seer verschuert hadde, is hy wt ghegaen van hem, ende hi is gheworden als een doode, also datter veel seyden. Hy is doot.

26

Iesus zijn hant nemende, heeft hem opgerecht, ende hy is op ghestaen.

27

Ende als hi in een huys ghegaen was, so vraechden hem zijn discipulen aen deen side Waer om en mochten wi hem nyet wtworpen? ⁺

+ mat. xvij.c

28

Ende hi heeft haer gheseyt. Dit geslacht en mach met gheen dinc wt gaen, dan door bidden ende vasten. *

29

⁺+ Ende van daer ghereyst zijnde, hebben si ghegaen door Galileen, ende hy en woude [kolom] nyet dattet yemant wiste,

+ E

30

want hy leerde zijn discipulen, ende seyde haer. Dye soon des menschen sal gheleuert worden in die handen der menschen, ende si sullen hem dooden ende ghedoot zijnde, ⁺ sal hy ten derden dage verrijsen.

+ Mat. 8.d. ende .x.c.

31

Ende si en wisten twoort niet, ende ontsaghen hem te vraghen.

32

Ende hi is tot Caphernaum ghecomen, ⁺ ende als hy in huys ghecomen was heeft hi haer gheuraecht. Wat tracteerde ghy onder v inden wech?

+ mat. xviij a Luce. ix.f

33

Ende si hebben geswegen. Want si hadden gheuraecht onderwegen, wie van haer dye meeste waer.

34

Ende als hy gheseten was, heeft hi die twalef tot hem gheroepen, ende heeft haer geseyt. Ist dat yemandt die eerste wil wesen die sal die alder laetste wesen, ende dienaer van allen.

35

Ende een kint nemende, heeft hijt geset int middel van haer. Ende als hijt in zijn armen ghenomen hadde, heeft haer geseyt.

36

So wie dat een van sodanigen kinderen ontfangen sal in minen name, die ontfanct mi, ende wie my ontfanct, die ontfanct nyet mi, waer den genen die mi ghesonden heeft. *

37

⁺+ Ende Ioannes antwoorde hem segghende. ⁺ Meester wi hebben ghesien een in uwen name dye duyuelen wtworpen, ende hy en volcht ons niet, ende wy hebbent hem verboden.

+ F

+ Luce. ij.f.

38

Ende Ihesus heeft gheseyt. En verbiet hem niet, want daer en is niemandt die welcke, ist dat hy door minen naem cracht doet, gheringe mach qualick van mi spreken

39

Want die nyet teghen v en is, dye is voor v.

40

Want so wie dat v te drincken geeft in minen naem een cop couts waters, om dat ghi Christo toebehoort. Ick seg v voorwaer, gheensins sal hi zijn loon verliesen.

41

Ende so wie scandalizeren sal een van dese cleyne die in my geloouen, ⁺ het is hem beter dat een molensteen aen sinen hals gedaen worde, ende dat hi gheworpen worde inde zee.

+ mat xviij a Luc. xvij.a

42

Ende ist dat v handt v scandalizeert, snijtse af, tis v beter cranck totten leuen te gaen, dan twee handen hebbende te gaen inde helle, int ontblusscelicke vier, ⁺

+ Mat. 8.b ende .v.c. Esa. 66.g

43

daer haer worm niet en sterft, ende twier en wort niet wt gedaen.

44

Ende ist dat v voet v scandalizeert, hout hem af, want tis v beter dat ghi gaet crepel int eewich leuen, dan twee voeten hebbende, sout worden geworpen in dye helle des onblusscheliken viers

45

daer haer worm nyet en sterft, ende tvier nyet wt ghedaen en wert.

46

Ende ist dat v ooghe v schandalizeert, worptse wt, tis v beter dat ghy losch ghaet int rijcke gods, ⁺ dan twee ooghen hebbende sout worden geworpen int helsche vier

+ G

47

daer haer worm niet en

[p. D5v]

sterft, ende tvier niet wtgedaen en wert. *

48

Want alle sal metten vier ghesouten worden, ⁺ ende alle offerhande sal met sout ghesouten worden.

+ Mat. vi.b Luc. xiiij.g

49

Tsout is ghoet, maer waert dattet sout nyet sout en waer, waer in suldy dat souten? Hebt seluen sout, ende hebt vrede onder v.