De Vorsterman Bijbel

§ Dat .iij. Capittel.

1

⁺ENde hi is weder om inghegaen in die synagoge, ende aldaer was een man, hebbende een verdorde hant, ⁺

+ A

+ Mat. xij.a Luc. vi.a

2

ende wachtende oft hi hem oec gesont soude maken inden saboth, op dat si hem souden mogen besculdighen.

3

Ende hy sprack totten man, die daer hadde dye verdorde handt. Staet op int middel.

4

Ende hy sprack tot hen. Ist georloeft opten saboth wel te doen oft qualiken? die ziel gesont te maken oft te verliesen? Doen swegen si.

5

Ende na dien hijse ouergesien hadde met toornicheyt mededogen hebbende vande blintheyt haerder herten sprac totten man. Steect wt v hant. Hi stacse wt, ende zijn hant is hem weder ghegeuen.

6

Dye pharizeen wt gaende, hebben ter stont metten herodianen raedt ghehouden teghens hem, ⁺ hoe dat si hem souden mogen dooden.

+ Mat. iiij d Luce. vi.a.

7

Mer Ihesus met sinen discipulen weeck van daer na die zee toe, ende een grote menichte van Galileen is hem nae gheuolcht, van Iudeen,

8

van Ierusalem, van Idumea, van ouer die Iordane, ende van die ontrent Tyrus ende Sydonen woonden, een ouer grote menichte, die welcke, nae dien si ghehoort hadden die dingen die hi ghedaen hadde, tot hem gecomen zijn.

9

⁺Ende Ihesus seyde sinen discipulen, als dat si hem tscheepken dienen souden, ouermits der scaren, dat si hem niet en souden vertrap-

+ B

[p. D1v]

pen.

10

Want veel had hy daer ghesont ghemaect, als dat zij hem ouerliepen, om hem te raken, alle die plaghen hadden.

11

Ende als die onreyne gheesten hem saghen, so vielen si hem te voet, ende riepen, segghende.

12

Ghy zijt die sone Gods. Ende neersteliken dreychde hi haer, dat si hem niet openbaer maken en souden.

13

+ Ende opclimmende inden berch, riep tot hem die hy woude, ⁺ ende si zijn ghecomen tot hem.

+ Luce. iiij.f. Mat. 8.d.

14

Ende heeft ghescict, datter souden wesen twalef met hem, om dat hijse soude seynden te prediken,

15

ende heeft haer macht ghegheuen om te ghenesen die siecten, ende wt te worpen die duyuelen.

16

Ende heeft Simon inghesedt den naem Petrus,

17

ende Iacob zebedeus soon, ende Ioannem Iacobs broeder, heeft hy inghesedt die naem, Boanarges. dat welck gheseyt is kinderen des donders,

18

ende Andream, ende Philippum, ende Bartholomeum, ⁺ ende Mattheum, ende Thomam, ⁺ ende Iacobum Alpheus soon, ende Thadeum, ende Symonem van Cananeen,

+ C

+ Mat. x.a Luce. vi.c.

19

ende Iudam ischarioth, welck hem verraden heeft. *

20

Ende si zijn ghecomen in een huys, ende daer is weder om te samen ghecomen een groote schare, alsoo dat si gheen broodt en mochten eten.

21

Ende nae dat dit verhoort hadden, dye welcke hem toe hoorde, zijn si wt ghegaen, om hem te houden. Want si seyden, als dat hy rasende gheworden was.

22

Ende die Scriben die van Ierusalem neder ghecomen waren, seyden. Hy heeft in hem Beelzebub, ende door den prins der duuelen worpt hy die duuelen wt.

23

Ende nae dat hi haer tot hem geroepen hadde, heeft hi tot haer ghesproken in parabolen.

Hoe mach den eenen duyuel den anderen wtworpen?

24

ende ist dat een rijck gedeylt is tegens hem seluen, so en mach dat rijck nyet blijuen staen. ⁺

+ Luce. xi.b. Mat. xij b

25

Ende in dien een huys gedeylt is teghens hem seluen, soo en mach dat huys niet blijuen staen.

26

Ende in dien dye duyuel opstaet teghens hem seluen, ende ghedeylt is, soo en mach hy niet staen, maer hi heeftet eynde.

27

⁺Daer en mach nyemant beroouen die vaten van eenen stercken, ingaende in sinen huyse, ten si dat hy eerst gebonden heeft den stercken, ende dan so sal hi moghen beroouen zijn huys.

+ D

28

Ick seg v voorwaer. Alle sonden ende blasphemie daer si mede geblasphemeert hebben, sullen vergeuen worden den kinderen [kolom] der menschen.

29

Maer so wie blasphemeert inden heyligen geest, ⁺ en heeft gheen verghiffenisse inder eewicheyt, maer is sculdich der eewiger sonden.

+ Mat. xij.c Luce. 2.b.

30

Want si seyden, hy heeft in hem eenen onreynen geest.

31

Ende zijn moeder ende broeders quamen ende buyten staende, hebbense een tot hem ghesonden, die hem wtroepen soude.

32

Ende die schare sadt by hem, ende seyden hem. Siet v moeder, ende broeders daer buten staende begeeren v.

33

Hi heeft haer gheantwoort, segghende. Wie is mijn moeder ende mijn broeders?

34

Ende als hy ouer ghesien hadde dye ghene die daer waren, sittende ront om hem sprac hy. Siet mijn moeder ende mijn broeders.

35

Want die ghene die daer doet die wille gods, die is mijn broeder, ende mijn suster, ende mijn moeder.