De Vorsterman Bijbel

§ Dat .ij. Capittel.

1

⁺ENde na acht daghen so is Iesus weder om gecomen in Caphernaum, ⁺

+ A

+ Mat. ix. Luce. v

2

ende het is ghehoort dat hi in huys was, ende daer zijn veel menschen tsamen ghecomen, also dat dye plaetsen daer omtrent der doren, haer niet en mochten begripen ende predicte haer dat woort,

3

ende quamen tot hem, brenghende een ghichtich mensche, dye welcke van vieren ghedragen wert.

4

Ende na dien si hem niet aenbrengen en mochten ouermits dye groote schare, so hebben si ontdect dat dac in welcke hi was, ende dat bedde neder ghelaten in welcke bedde die ghichtighe lach.

5

Maer na dien Ihesus ghesien hadde haer gheloof, sprac totten ghichtighen. Sone, v

[p. D1r]

sonden worden v vergeuen.

6

Aldaer waren ooc somige vanden scriben sittende, ⁺ ende denckende in haer herten:

+ B

7

Wat? hoe spreect dese aldus blasphemie? Wie mach vergeuen die sonden, dan alleen God?

8

Ende ter stont na dat Iesus bekent hadde wt sinen gheest, dat si alsoe in haer seluen dochten, sprack hy tot haer.

Waer om denct ghi dese dingen in v herten?

9

Welck is lichter te seggen den gichtighen, vergeuen worden v sonden, oft te seggen, staet op ende neemt v bedde, ⁺ ende wandelt?

+ Ioan. v.b.

10

Maer op dat ghi moghet weten, dat dye sone des menschen heeft die macht om te vergeuen die sonden op der aerden, sprack hi totten gichtighen.

11

Ick segge v, staet op, ende neemt v bedde, ende gaet wech in uwen huyse.

12

Ende ter stont is hy op ghestaen, ende wech nemende zijn bedde, is wt ghegaen, in teghenwoordicheyt van hem allen, dat si hem alle gader zeer verwonderden, ende gauen Gode glorie, segghende. Nye en hebben wi sulcs ghesien.

13

+ Ende Iesus is weder wt ghegaen totter zee, ⁺ ende al die schare quam tot hem, ende hi leerdese.

+ C

14

Ende Ihesus voorby gaende, heeft ghesien Leui, een soon van Alphei, sittende opten tol, ende heeft geseit tot hem. Volcht mi na. Ende opstaende, is hem na gheuolcht.

15

Ende tis gheschiet, doen hi was etende int huys Leui, datter veel publicanen ende sondige menschen waren, etende met Iesu ende zijn discipulen. Want daer warender vele die hem na volchden. ⁺

+ Mat. ix. Luc. v.f.

16

Ende siende die scriben ende pharizeen hem spijse nemende metten publicanen ende sondaren, spraken tot sinen discipulen. Waer om eedt ende drinct v meester met publicanen ende sondaren?

17

Ihesus dat horende, sprack tot haer. Die ghesont zijn, en hebben van ghenen noode die medecijn, mer die sieck zijn. Ic en ben niet ghecomen, ⁺ om te roepen die rechtuaerdige, maer sondige.

+ Lu. xv.a i.Cor. i.c

18

Ende die discipulen Ioannis, ende die pharizeen waren vastende, ende comen ende segghen hem ⁺ Waer om vasten die discipulen Ioannis, ende der pharizeen, ende v discipulen en vasten niet?

+ D

19

Ihesus sprack tot haer. Ist betamelic dat die kinderen des bruylofts, also lange als die bruydegom met haer is, souden vasten? Also langhe als si den bruydegom hebben en moghen si niet vasten.

20

Maer die dagen sullen comen, wanneer die bruydegom van haer ghenomen sal werden, ende dan in dien dagen sullen si vasten.

21

Want nyemant en naeyt een lap van ruych [kolom] laken aen een out cleet, anders so haelt hy af het nyeuwe stopsel vanden ouden, ⁺ ende wort quader schore.

+ Mat. ix. Luce. v.

22

Oock mede, nyemant giet nieuwe wijn in oude vaten, want anders so doet die nyeuwen wijn die vaten bersten, ende dye wijn wort ghestort, ende dye vaten vergaen, maer nyeuwen wijn sal gedaen worden in nyeuwe vaten.

23

Ende het gheuiel dat Ihesus opten saboth ghinck doort koren, ⁺ ende zijn discipulen begonnen onder weghen die koren aren af te plucken.

+ Mat. xij Luce. vi.

24

Ende die pharizeen seyden hem. Siet, waer om doense opten saboth dat niet georloeft en is?

25

Iesus sprack tot haer. En hebdy nyet gelesen wat Dauid dede, ⁺ doen hi noot hadde ende hongerende was, ende die ghene die met hem waren,

+ i.Re. xxi.b

26

hoe dat hi gegaen is int huys gods, onder den prins der priesteren Abiathar, ende gegeten heuet die offerhande broden, dye welcke niemant en betaemt te eten, dan alleen die priesteren, ende heeftse ooc ghegeuen den ghenen, die met hem waren?

27

Ende hi seyde haer. Den saboth is gemaect om den mensche, nyet die mensche om den saboth.

28

Alsoo dan die soon des menschen is die here ooc des saboths.