De Vorsterman Bijbel

§ Dat .xiiij. Capittel.

1

⁺IN die tijt heeft Herodes viervorst ghehoort die faem Iesu,

+ A

2

ende heeft geseyt zijn knechten Dese is Ioannes baptista, dye opgestaen is vanden dooden, ende daer om wercken die crachten in hem

3

want Herodes had Ioan-[kolom]nem gehouden ende gebonden, ende had hem in een kercker geset, om Herodias die huysurouwe zijns broeders,

4

want Ioannes die seyde hem Ghi en moget haer niet hebben.

5

Ende willende hem dooden, vreesde hi die gemeente, ouermits dat si hem hielden als een propheet.

6

⁺Ende op Herodes gheboort dach, so danste Herodiadis dochter int midden, ⁺ en heeft Herodi behaecht,

+ B

+ Mar. vi.b Luce. iij.d. ende .ix.a.

7

waer om hijt haer met eenen eedt belooft heeft, te geuen wat si begeerde van hem.

8

Ende si eerst onderwesen zijnde van haer moeder Geeft mi hier (seyt si) in die schotel thooft van Ioannes baptista.

9

Ende die coninck is bedroeft gheweest. Nochtans om den eedt, ende die ghene dye met hem ter tafel saten geboot hijt te geuen.

10

Ende heeft ghesonden, ende heeft onthooft Ioannem inden kercker.

11

Ende zijn hooft is gebrocht in die scotel, ende dat meysken ghegeuen. Ende si heeftet ghebrocht haer moder

12

Ende zijn discipulen toegaende hebben tlichaem wech genomen, ende dat begrauen. Ende comende hebbent Iesu verbootscapt.

13

Iesus dat gehoort hebbende, is van daer gheweken in een schip, tot een woeste plaetse ter siden waert. Ende alst die scharen gehoort hadden so hebben si te voet hem geuolcht wten steden. ⁺

+ Mar. vi.c Luce. ix.b. Ian. vi.a.

14

Ende wtgaende, heeft gesien een groote schare, ende haer ontfermende, heeft wt haer ghesont gemaect die siec waren.

15

Als den auont ghecomen was, so zijn zijn discipulen tot hem gecomen seggende. Dese plaetse is woest, ende die vre is nv voorleden. Laet die scaren, op dat si mogen gaen in die casteelen, ende coopen haer spisen.

16

Ende Iesus heeft haer geseit Ten is hem niet van noode dat si wech gaen, geuet ghi haer teten.

17

Ende si antwoorden hem. Wi hebben hier niet dan vijf brooden ende twee visschen.

18

Ende hi seyde. Haelt mi die herwaert.

19

Ende doen hi geboden hadde die scaren te sitten op dat gras, nemende die vijf brooden ende twee visschen, die oogen opborende inden hemel, heeftse ghebenedijt Ende als hijse gebroken had, heeft hi die discipulen die brooden gegheuen, ende die discipulen den scaren.

20

Ende si hebben allegader gegeten, ende zijn versaet geweest. Ende si hebben op genomen van die stucken die ouergebleuen waren .xij. volle koruen.

21

Ende die ghegeten hadden, die waren vijf duysent mannen behaluen vrouwen ende kinderen.

22

Ende ter stont heeft Iesus zijn discipulen gedwongen te climmen in een schepken, om dat si voor hem reysen souden op dander side, ter tijt toe dat hi die scaren gelaten hadde.

23

Ende als hi die scaren ghelaten hadde, is hi alleen opten

[p. B8r]

berch geclommen, om te bidden. Ende alst auont geworden was, so was hi daer alleen

24

Tschip midden in die zee, worde benaut vanden goluen, want die wint was contrary,

25

Maer in die vierde wake des nachts, is hy gecomen tot haer wandelende op die zee.

26

Ende siende hem opter zee wandelen hebben veruaert geweest seggende, ⁺ Het is een schae, ende van vreesen hebben si geroepen.

+ marci. vi.g

27

Ende terstont heeft Iesus tot haer gesproken, seggende: Hebt betrouwen. Ic bent, en wilt niet vreesen:

28

Ende Peeter antwoordende heeft hem gheseyt, ⁺ Heer, ist dat ghijt zijt, gebiedt mi tot v te comen opt water.

+ D

29

Ende hi heeft geseyt, Coemt. Ende als Petrus neder geclommen was wt dat schip, wandelde hi opt water, om te comen tot Iesum.

30

Mer als hi den stercken wint sach is hi veruaert geworden, ende als hi begonst te sincken heeft hi geroepen seggende, Heere, behout mi.

31

Ende terstont Iesus wtstekende zijn hant heeft hem geuaet ende hem geseyt, Cleyn van betrou, waerom twifelde ghi?

32

Ende als si int schip geclommen waren, so heeft die wint op gehouden.

33

Voort die int schip waren, zijn ghecomen ende hebben hem aenghebeden seggende. Warachtich ghi zijt die sone gods.

34

Ende als si ouer geuaren waren, zijn si gecomen int lant Genesar.

35

Ende als die mannen des plaets hem gekent hebben, hebben si tot alle plaetsen, allesins gesonden int geheele lantschap dat daer omtrent gelegen was ende hebben hem gebrocht alle die siecken,

36

ende si baden hem, op dat si alleen dat wterste van zijn cleet mochten raken, ende alle die ghene diet geraect hadden, zijn gesont gheworden.