De Vorsterman Bijbel

§ Dat .xiij. Capittel.

1

⁺ENde op dien dach is Iesus wten huyse ghegaen, ende heeft geseten bider zee,

+ A

2

ende veel scaren zijn vergadert tot hem, also dat hy int schip geclommen wesende sadt, ende dye ganse scharen stonden opten oeuer.

3

Ende hi heeft haer veel gesproken in parabolen, seggende Syet hy is wt gegaen dye daer saeyt om te sayen, ⁺

+ Mar. 4.a Luce. viij.a

4

ende ter wilen dat hy saeyde, dye somige zijn gheuallen bi den wech ende die vogelen zijn ghecomen ende hebbense opgegeten

5

⁺Dye ander zijn gheuallen in steenige plaetsen, daer si niet veel aerden en hadden, ende ter stont zijnse op ghegaen, daer om dat si gheen diepheyt der aerden en hadden.

+ B

6

Ende als die sonne opgegaen was, zijnse verbrant. Ende wantse gheen wortel en hadden, zijnse dorre gheworden.

7

Wederom die ander

[p. B7r]

zijn gheuallen in doornen, ende die doornen zijn teghens haer opgestaen, ende hebbense verdruckt.

8

Ende die ander zijn gheuallen in goede aerde, ende zij hebben vrucht gegheuen die somige hondertfout, die somige tsestichfout, die somige dertichfout,

9

Die ooren heeft om te hooren dye hoore.

10

Die discipulen tot hem gaende hebben geseyt. ⁺ Waerom spreect ghy tot haer in parabolen?

+ Mar. 4.b

11

Ende hy antwoordende heeft haer gheseit. Tis v gegheuen te kennen die verborgentheden des rijcs der hemelen. Maer ten is haer niet gegheuen.

12

Want wie heeft dien sal ghegeuen worden, ende hi sal oueruloeyen. ⁺ Maer wie niet en heeft, ooc dat ghene dat hi heeft sal van hem genomen worden.

+ Mar. ij.c. Mar. 4.c Luc. viij.c.

13

Daer omme spreeck ick tot haer in parabolen. Want siende en sien si niet, ende hoorende en hooren si noch en verstaen niet,

14

op dat veruult werde in haer die prophecie Esaie, welcke seyt. ⁺ Met gehoor sult ghi hooren, ende ghy en sult niet verstaen, ende siende sult ghy sien, ende ghi en sult niet sien,

+ C

15

Want dat herte van dit volck is verhart, ende met haer ooren hebben si swaerlic gehoort ende hebben haer oogen gesloten, op dat si niet en souden sien met haer oogen, ende hooren met haer ooren, ende met haer herte verstaen, ende bekeert worden, dat ick haer gesont mochte maken.

16

+ Maer v ooghen zijn salich want si sien. ⁺ Ende v ooren, want si hooren,

+ Luce. x.b.

17

want woorwaer segge ic v dat veel propheten ende rechtuerdighen begheert hebben te sien dat ghy siet, ende si en hebbent niet ghesien, ende te hooren dat ghi hoort, ende si en hebbent niet ghehoort.

18

Daer om hoort die parabole des sayers.

19

Al de ghene die daer hoort dat woort des rijcs ende nyet en verstaet, so coemt de quade ende neemt wech datter gesayt is in diens herte, dit is die biden wech gesayt is.

20

Die ghene die inde steenighe aerde gesayt is, dit is die dat woordt hoort, ende ter stont ontfanct dat met bliscap,

21

mer ten heuet gheen wortel in hem, ende ten is niet gedurich, want alser tribulacye coemt oft veruolginge om twoort vort hy ter stont gescandalizeert.

22

⁺Die inde doornen gesait is, dit is, die twoort gods hoort, ende die sorchfuldicheit der werelt ende die bedriechlicheyt der rijcdommen verdruct dat woort, ende twert sonder vrucht

+ D

23

Mer die inde goede aerde gesait is, dit is die dat woort hoort ende verstaet ende die vrucht voortbrengt ende doet die een hondertfout, ende dander tsestichfout de ander dertichfout.

24

Een ander parabel heeft hi haer voorgeleit seggende. +

Dat rijc der hemelen is gelijc gheworden [kolom] een mensche die daer sayt goet saet in zijnen acker,

25

mer als die mensche sliepe, is zijn viant ghecomen, ende heeft oncruyt ghesaeyt onder die tarwe, ende is wech ghegaen,

26

Ende als dyt cruyt ghewassen is gheweest, ende heeft vrucht gedaen, so heeft geopenbaert dat oncruyt,

27

ende die knechten des vaders des huysgesins, comende hebben hem gheseyt. Heere en hebt ghi niet goet saet gesaeit in uwen acker? Daer om van waer heeftet dat oncruyt?

28

Ende hy heeft haer geseyt. Een viant, een mensch heeftet gedaen. Ende zijn knechten hebben hem gheseyt. Wilt ghy dat wij gaen, ende vergaderen dye?

29

Ende hy heeft gheseyt. Neen op dat ghi dat oncruyt vergarende, die tarwe niet en vertrapt.

30

Laetse beyde wassen tot den oext, ende inden tijt des oexts, sal ick den mayers seggen. Vergadert eerst dat oncruyt, ende bindt dat in busschen, om dat te verbranden, maer dye tarwe vergadert in mijn schuer. *

31

⁺Een ander parabel heeft hy haer voorgheleyt segghende.

+ Trijc der hemelen is gelijc een mostaert saet, ⁺ welc een mensch nemende, heeft gesaeit in zijn acker,

+ E

+ Mar. 4.a Luce. xiij.a

32

twelc tminst is onder alle saden Maer na dattet opgewassen is, ist dat grootste onder alle cruyt, ende twert een boom, also dat dye voghelen des hemels comen, ende woonen in zijn tacken.

33

Een ander parabel heeft hy haer geseyt

Dat rijc der hemelen is gelijc een deesem dewelcke een vrouwe verborgen heeft in drie maten meels, ⁺ ter tijt toe dattet al ghesuert was

+ Luc. xiij.b

34

Dit heeft Iesus gesproken door parabolen totten scharen. Ende sonder parabolen en heeft hi haer niet geseit,

35

op dat veruult soude worden dat door den propheet geseyt was, ⁺ die welcke spreect. Ic sal minen mont op doen in parabolen, ende ick sal wt spreken verborgen dingen van beginsele des werelts. *

+ Mar. 4.d Psal. 77.

36

Doen ghelaten hebbende die scharen, is hy in huys gecomen. + Ende zijn discipulen zijn gecomen tot hem, seggende. Verclaert ons dye gelijckenisse van dye oncruden des ackers.

37

Hi antwoordende, heeft haer geseyt. Die daer saeyt goet saet, is die soon des menschen,

38

⁺die acker is de werelt, ende tgoet saet zijn de kinderen des rijcs, dat oncruyt zijn die boose kinderen,

+ F

39

dye viandt dye dese saeyt, is dye duuel, den oext is dye eyndinghe der weerelt, dye mayers zijn dye engelen. ⁺

+ Apocalips xiiij.d

40

Daer om ghelijc dat oncruyt vergadert ende verbrant wort mettet vier, also salt zijn in die eyndinge der werelt.

41

Die soon des menschen sal zijnden zijn

[p. B7v]

engelen, ende si sullen vergaderen wt zijn rijck alle verargernissen, ende die ghene die daer boosheyt doen.

42

Ende si sullen haer worpen in eenen vierigen ouen, daer sal zijn screyinge, ende knersinge der tanden.

43

Dan sullen die rechtueerdige blincken gelijc die sonne in dat rijc haers vaders, die ooren heeft om te hooren die hoore. *

44

+ Weder om is dat rijc der hemelen gelijc een verholen schat inden acker, welcke een mensche geuonden hebbende verborcht, ende van bliscappen so gaet hi ende vercoopt alle dat hi heeft, ende coopt den acker.

45

Weder om ist rijc der hemelen gelijc een coopman, die goede peerlen soect,

46

dewelcke geuonden hebbende een goede peerle, gaet ende vercoopt al dat hi heeft, ende coopt dien.

47

Weder om is dat rijc der hemelen gelijc dat net, twelc geworpen wort inder zee, ende alderhande visschen vergaderende,

48

twelcke alst veruult was si op getogen hebbende aent ouer, ende sittende, hebben si vergadert die goet waren in haer vaten, mer die quaet waren hebben si wech geworpen.

49

Alsoo salt gheschien in die eyndinge der werelt, de engelen sullen wtgaen, ende sullen verscheyden dye quade van dat middel der rechtueerdighen, ⁺

+ Mat. xxij.b. ende xxv.c

50

ende sullen haer worpen in een vierighen ouen, daer sal wesen screyinge ende knersinge der tanden.

51

⁺Hebt ghi dit al wel verstaen? Si segghen hem Ia wi.

+ G

52

Ende hi heeft haer geseyt. Daer om alle scribe, die gheleert is int rijc der hemelen, die is ghelijc een mensche, die vader des huysghesins is, die welcke voort haelt wt sinen schat, nieuwe ende oude. *

53

Ende het is geschiet, ⁺ doen Iesus dese parabolen gheynt hadde, is hi van daer gegaen

+ Mat. vi a Luce 4 d

54

ende comende in zijn lantschap, heeft haer geleert in haer synagogen, alsoe dat si haer verwonderden, ende spraken. Van waer is desen dese wijsheit ende cracht? ⁺

+ Ioan. vi.e Mar. vi.a Luce. iiij.d

55

Is dyt nyet een timmermans soon? heet sijn moeder niet Maria? ende zijn broders Iacob ende Ioseph? ende Symon ende Iudas?

56

ende zijn susteren zijnse nyet al by ons? ⁺ Daer om van waer is desen dit al?

+ ioan. iiij.f.

57

Ende si worden gescandalizeert in hem. Ende Iesus heeft haer geseyt. Een propheet en is niet sonder eere, dan in zijn lant, ende in zijn huys.

58

Ende hi en heeft daer niet veel teekenen ghedaen, om haer ongeloofs wil.