De Vorsterman Bijbel

§ Dat .xij. Capittel.

1

⁺+ IN dien tijt ghinck Iesus op een saboth doert koren. Ende zijn discipulen hongerende, ⁺ hebben beghonnen die aren te plucken, ende te eeten.

+ A

+ Mar. ij.d. Luc. vi.a

2

Die pharizeen dit siende, hebben hem geseyt. Siet, v discipulen doen dat nyet georlooft en is te doen op den saboth.

3

Ende hi heeft haer gheseyt. En hebdy nyet ghelesen wat Dauid heeft gedaen, ⁺ als hy ende dye met hem waren hongerden?

+ i.reg. xxi.c

4

hoe dat hy ghegaen is int huys gods, ende heeft ghegeten dye broden des voorsettincs, dye welcke hem niet georloeft en waren te eten noch die met hem waren, dan alleen den priesteren? ⁺

+ Nu. xxviij

5

Oft en hebdi niet gelesen in die wet, dat die priesteren op den saboth inden tempel den saboth breken, ende vri zijn van sonde?

6

Ick seg v dat een groter dan den tempel is hier, ⁺

+ Osee. vi.

7

waert dat ghi wist wat is. Ick wil barmherticheyt ende niet offerhande, ghy en soudt noyt dye onnosele veroerdeelt hebben. *

8

Want die soen des menschen is een heer oock des saboths. ⁺

+ Mar. ij.c Luc. vi.a Mat. ix.b Mar. iij.a

9

Ende van daer gegaen zijnde, is gecomen in haer synagoge.

10

Ende siet een mensche was daer hebbende een dorre hant, ⁺ ende si vrachden hem seggende. Machmen opten sabboth ghesont maken? op dat si hem souden beschuldigen.

+ Ioan. x.g

11

Ende hi heeft haer geseit. Wie sas daer wesen wt v een mensch, welcke sal hebben een scaep ende ist saeck dattet geuallen is in een put op den saboth, sal hijt nyet aen vatten, ende opboeren?

12

Daer om hoe veel te beter is een mensche dan een scaep. Daer om machmen op den saboth wel doen.

13

Doe seyt hy den mensche. Steect wt v hant. Ende hy heeftse wtgesteken, ende si is gesont geworden, gelijc als die ander.

14

⁺+ Die pharizeen wtgaende, hebben een raet gehouden tegens hem, hoe datse hem souden mogen dooden.

+ B

15

Iesus na dat hy dat verstaen hadde, is gegaen van daer ende veel zijn hem gheuolcht, ende hi heeft haer al ghesont gemaect

16

Ende heeft haer geboden datse hem niet openbaer en souden maken,

17

op dat veruult soude worden dat gesproken was door den propheet Esaiam seggende.

18

Siet minen soen dye ick wtuercoren hebbe, ⁺ mijn liefste, in welcke mijn siel haer wel behacht heuet. Ick sal minen gheest op hem setten, ende dat oerdeel sal hi die heydensche vercondighen.

+ Esa. xiiij. luce. xi.b

19

Hi sal niet kijuen noch roepen, noch neymant en sal zijn stemme hooren opter straten.

20

Een swac riet en sal hi niet breken, ende vlas dat rokende is en sal hi niet wtdoen tot dat hy wtworpt dat oordeel tot victorie.

21

Ende in sinen naem sullen die heydenen hopen *

[p. B6v]

22

Doe is hem gebrocht een hebbende den duuel, ⁺ blint ende stom, ende hy heeft hem gesont gemact, alsoe dat hy sprack ende sach.

+ Mar. iij.c Luc. xi.b

23

Ende alle dye scharen verscricten ende seyden. Is dit niet die sone van Dauid?

24

Die pharizeen, als si dit gehoort hadden seyden. Dese en worpt de duuelen niet wt dan in Beelsebub den prince der duuelen.

25

⁺Ihesus wetende haer ghedachten, heeft haer geseyt, Alle rijck gedeelt wesende tegen hem seluen, sal worden verlaten. Ende alle die stadt oft huys gedeelt wesende teghens hem seluen, en sal niet staen.

+ C

26

Ende ist dat Satanas wtworpet Satanam, so is hi gedeelt teghen hem seluen, daer om hoe sal zijn rijck staen mogen?

27

Ende ist dat ick in Beelsebub die duuelen wtworp, in wien worpense v kinderen wt? Daer om so sullen si v rechters zijn

28

Maer ist dat ick inden geest gods die duuelen wtworpe, so is tot v comen dat rijc gods

29

Oft hoe mach yemant gaen in huys van een machtighe, ende zijn vaten nemen, ten ware dat hi te voren dye machtigen ghebonden had? ende dan sal hy sijn huys berouen.

30

+ Die niet met mi en is, is teghens mi. Ende die niet vergadert met mi, die verstroyt

31

Daer om segge ic v. ⁺ Alle sonde ende blasphemie sal den menschen vergeuen worden, mer blasphemie inden heyligen geest, en sal den mensche niet vergeuen worden.

+ Mar. ij.b Luc. xij.d

32

Ende wie dat een woort spreect tegen den soon des menschen, tsal hem vergeuen worden, mer die daer seyt een woort tegen den heyligen geest, ten sal hem niet vergeuen worden, noch hier, noch hier namaels

33

Maect eenen goeden boom, ende zijn vruchten goet, oft maect eenen quaden boom, ende zijn vruchten quaet, Want wt die vrucht vort den boom bekent.

34

Ghi slanghen gheslacte, hoe mocht ghi goet spreken als ghi quaet zijt? want wt oueruloedicheit des herten, so spreect den mondt.

35

Een goet mensch wt een goede schat brengt voort goet, ende een quaet mensch wt die quade schat brengt quaet voort.

36

Mer ic segge v, dat van alle ydel woort dat die menschen gesproken sullen hebben, sullen si reden geuen inden dach des oordeels,

37

Want wt v woorden, sult ghi gerechtuaerdicht worden Ende wt v woorden, sult ghi verdoemt worden. *

38

⁺+ Doen hebben somige wten scriben ende pharizeen hem gheantwoort seggende. Meester, ⁺ wi willen van v een teeken sien.

+ D

+ mar. viij.b Luc. i.b Ioa. ij.c

39

Ende hy antwoordende, heeft haer geseyt. Dat valsce ende ouerspeelige geslachte soecht een teeken ende hem en sal gheen teeken gegeuen worden, dan dat teeken des propheets Ione,

40

Want gelijck [kolom] Ionas gheweest heeft inden buyck des valuis drie dagen ende drie nachten. Also sal die soen des menschen in dat herte des aerden drie daghen ende drie nachten zijn.

41

Die mannen van Niniue sullen opstaen int oordeel met dit geslacht, ende sullen dat verdoemen, want si penitencie ghedaen hebben doer die prekinge van Ionas. Ende siet meerder dan Ionas is hier.

42

Die Coninghinne van suyden sal opstaen int oordeel met dit gheslacht, ende sal dat verdoemen, want si gecomen is van die eynden des aerdes om te hooren Salomonis wijsheit, ⁺ ende siet meerder dan Salomon is hier.

+ E

43

Als een onreyn geest wtghegaen is vanden mensche, ⁺ so verwandelt hi droge plaetsen, soekende rust, ende hi en vintse niet.

+ Mar. iij.d

44

So seyt hi. Ick sal weder keeren in mijn huys daer ic wtgegaen ben. Ende als hy coemt, so vindt hi dat leech ende met besemen ghereynicht ende verciert.

45

Dan gaet hi ende neemt tot hem seuen ander gheesten booser dan hi, ende inghegaen zijnde woent hi daer Ende dat laeste des menschen wert arger dan dat eerste. Alsoe salt zijn met desen alder quaetsten geslachte.

46

⁺ Als hi noch was sprekende den scharen. Siet, zijn moeder ende zijn broeder stonden buyten soeckende hem te spreken.

+ Luce. viij.c

47

Ende een heefter geseyt tot hem. Siet v moeder ende v broeders staen buyten soeckende v.

48

Ende hi antwoordende heeft geseyt den ghenen die dit hem geseyt heeft. Wie is mijn moeder, oft wie zijn mijn broeders?

49

Ende wtstekende zijn hant tot zijn discipulen heeft gheseit. Siet mijn moeder ende mijn broeders,

50

want wie den wille mijns vaders doet die in die hemelen is, die is mijn broeder ende suster ende moeder. *