De Vorsterman Bijbel

§ Dat .xi. Capittel.

1

⁺ENde het is geschiet, doe Iesus voleynt hadde, gebeyende zijn .xij. discipulen, so is hy van daer ghegaen, om dat hi leren ende preken soude in haer steden.

+ A

2

+ Ende als Ioannes gehoort hadde in die banden die wercken Christi, seyndede twee van zijnen discipulen,

3

heeft hem geseit. Sijt ghi die ghene die comen sal, of verbeyden wi een ander?

4

Ende Iesus antwoordende, heeft hem geseyt. Gaet ende wederbootscapt Ioanni, dat ghene dat ghi gehoort hebt ende gesien.

5

Blinde sien, cruepele wandelen, melaetsche worden gereynicht, douen die hooren, doden staen op, den armen woort gebootscapt dat Euangelium.

6

Ende salich is al die ghene, die welcke niet ghescandalizeert en wort in my.

7

Si wech gaende, begon Iesus te segghen den scharen van Ioanne: wat zijt ghi wtgegaen in die woestine? te sien een riet vanden wint gheroert?

8

Oft wat zijt ghi wtgegaen, te sien een mensche met sachten cleederen gecleet? Siet die sacht ghecleet werden zijn in die huysen der Coningen.

9

Mer wat zijt ghi wtgegaen te sien een propheet? Seker segge ic v ende meer dan een propheet

10

Dese is van welcken gescreuen is. Siet ic seynde mijnen bode voor v aensicht, ⁺ die uwen wech voor v bereyden sal. *

+ Mala. iij

11

+ Voorwaer segge ic v, ⁺ onder dye geboornen

+ Luce. vij.d

[p. B6r]

van vrouwen en is gheen op gestaen meerder dan Ioannes baptista ⁺ Nochtans die minste int rijck der hemelen is groter dan hi.

+ B

12

Van Ioannes baptisten daghen tot nv toe, lijdt dat rijc der hemelen gewelt, ende dye geweldige nemen dat

13

Want alle die propheten, ende die wet hebben gepropheteert tot Ioannem toe.

14

Ende ist dat ghijt ontfanghen wilt, hy is Helyas, die comen sal.

15

Die ooren heeft om te horen die hore. *

16

Wien sal ic dyt geslachte gelijken? het is ghelijck kinderen die daer sitten op die marct, ende roepen tot haer geliken,

17

ende seggen. Wi hebben v gesongen, ende ghi en hebt niet ghesprongen. Wij hebben v droefheyt ghesonghen, ende ghi en hebt niet gheweent.

18

Want Ioannes is gecomen noch etende noch drinckende, ⁺ ende si segghen, hy heeft den duuel.

+ C

19

Die soen des menschen is ghecomen, etende ende drinckende ende si seggen. Siet een vraettich mensch, ende een wijnsuper, een vrient der publicanen ende der sondaren. Ende die wijsheyt is gerechtuaerdicht van haer kinderen.

20

+ Doe heeft hi begonnen te verwiten die steden, ⁺ in welcken veel van zijn crachten gedaen waren, dat si gheen penitencie gedaen en hadden.

+ Luce. x.b.

21

Wee v Corozaim, wee v Bethsaida want waren in Tyro ende Sydon die crachten geschiet die in v geschiet zijn, Hier voormals souden si in asschen penitencie gedaen hebben.

22

Nochtans seg ick v, Tyro ende Sydon salt vergeeflijcker zijn inden dach des oordeels, dan v.

23

Ende ghi Caphernaum, sult ghi totten hemel verheuen worden? Ter hellen toe sult ghi neder vallen. Want waert sake dat in Sodoma gedaen waren die crachten, welcke ghedaen zijn in v, si souden by auonturen tot noch toe gebleuen hebben.

24

Nochtans segghe ick v, dat die van Sodoma verdraechlijcker sal zijn inden dach des oordeels dan v. *

25

⁺In die tijt antwordende Iesus, ⁺ heeft geseyt. Ick bekent v vader, heer des hemels ende aerdes, dat ghy dyt verborghen hebt van die wise ende cloecken, ende hebt geopenbaert den cleynen.

+ D

+ Luc. x.b ende .d Ioa. viij.c

26

Ia vader want het also behagelic geweest is voor v.

27

Alle dinck is my ouer gegheuen van minen vader. Ende neymant en kent die soen dan de vader. ⁺ Ende nyemant en heeft den vader ghekent dan die soen ende diet die soen heeft willen openbaren.

+ Hiere. vi.

28

Coemt tot my al dye daer arbeyt, ende die belast zijt, ende ic sal v vermaken.

29

Neemt mijn iock op v, ende leert van mi, dat ic sachtmoedich ben, ende oetmoedich van herten, ende ghi sult uwen sielen rust winden,

30

Want mijn iock is soete, ende mijn last is licht.

[kolom]