De Vorsterman Bijbel

§ Dat .xiij. Capittel.

1

⁺IN dien dage, sal een openbaer fonteyne zijn Dauids huyse, ende dye in Ierusalem woonen, in afwasscinghe des sondaers ende des ^* maentsmettinge)

+ A

* the. besprenghinghe

2

Ende die HERE der heyrscaren seit het sal zijn in dien dage, dat ic sal verderuen die namen der afgoden vander aerden, ende men en sal dier niet meer gedachtich worden

Ende ic sal af halen vander aerden dye valsche propheten, ende den onreynen geest,

3

Ende het sal zijn, wanneer yemant voort meer sal propheteren, zijn vader ende zijn moeder (dye hem gewonnen hebben) sullen hem segghen, ghi en sult niet leuen, want ghi lueghenen ghesproken hebt, inden naem des HEREN, ⁺ Ende zijn vader ende zijn moeder zijn ouders sullen hem ^* tsamen nagelen) want hi gepropheteert heeft

+ B

* th. wonden

4

Ende het sal zijn in dien dage, dat die proheten sullen beschaemt worden, een yegelijck wt zijn ghesichte, als si gepropheteert hebben, noch si en sullen niet meer met eenen mantel ghedeckt worden ^* van eenen sac gemaect) op dat si liegen sullen,

* th. met een roucleet

5

Maer hi sal seggen, ick en ben gheen propheet, ⁺ Ic ben een ackerman, want ^* Adam is mijn exempel van mijnder iuecht)

+ C

* th. die luyden hebben mi van mijnder ioncheyt op tot enen herder gestelt

6

Ende hem sal worden gheseyt.

Wat zijn dese wonden int middel uwer handen? Ende hi sal segghen Met desen ben ic gewont, int huys ^* der geender die mi lief hadden)

* h. mijnder vrienden

7

O swaert, staet op mijnen herder, ende op ^* den man die met mi aenhanct) seyt die HERE der heyrscharen, Slaet den herder, ende dye schapen sullen verstroeyt worden, Ende die HERE seyt, ic sal mijn hant tot die cleyne kinderen keeren, ⁺

* th. minen naesten

+ mat. xxvi c mar. xiiij.c

8

Ende si sullen zijn in alle aertrijck (twee deelen in haer, sullen verstroeyt worden ende ontbreken, ⁺ Ende dat derdendeel, sal in haer gelaten worden,

+ D

9

Ende ic sal dat derdendeel leyden doort vier, ende ic salt ^* bernen) so siluer gebrant wort, ende ic salse proeuen, so gout geproeft wort, Hi sal minen naem aenroepen, ende ic sal hem verhooren, Ende ic sal segghen, ghi zijt mijn volck, ende tvolck sal segghen, Die HEERE is mijn God.

* the. suyueren

§ Hoe Ierusalem verdoruen sal worden, om Christus doot ende van die deylinghe des volcs.