De Vorsterman Bijbel

§ Dat .xij. Capittel.

[p. Y2v]

1

⁺DIe last des woorts des HEEREN op Israel, Dye HEERE, dye den hemel wtspannet, ende fundeerdt dye aerde, ende ^* maket den gheest des menschen in hem) seit also,

+ A

* th. den mensche in zijn lichaem adem schept

2

Siet, ic sal Ierusalem setten eenen ^* opper dorpel der gulsicheyt, allen volcke inden omganck, Maer ooc Iuda sal) zijn int belegge tegen Ierusalem,

* thebr. kelc daer alle volcken om ende om ruspen sullen Hy sal ooc ouer Iuda comen dat sy sullen

3

Ende tsal zijn, in dien daghe dat ic sal Ierusalem setten eenen steen des lasts alle volcken, Alle die dien sullen opheffen sullen geschoert worden met snidinghe, Ende alle conincrijcken der aerden sullen vergadert worden tegen haer.

4

Dye HEERE seyt, in dien daghe, sal ic alle paert met vreese slaen, ende sinen rijder met ontsinnicheyt, ⁺ Ende ic sal mijn oogen opdoen op thuys van Iuda, ende ic sal slaen alle paert der volcken met blintheyt,

+ B

5

Ende de hertogen van Iuda sullen seggen in haerder herten, Die inwoonders van Ierusalem ^* moeten mi gesterct worden in) den HEERE der heyrscharen haer God.

* th. stercken mi voor

6

In dien dage sal ick die hertogen van Iuda setten, gelijc ^* eenen schoersteen des vyers, inden houte) ende ghelijc eenen brant viers int hoy, ende si sullen verslinden totter rechter hant, ende totter flincker hant, alle volcken inden ommeghanc.

Ende Ierusalem sal weder bewoont worden in zijn plaetsen, in Ierusalem.

* th. een vierige gloet onder dat hout

7

⁺Ende dye HEERE sal behouden dye wooningen van Iuda ^* als int beghin) op dat Dauids huys niet grootelijck verblijdt en worde, ende dye heerlicheyt der inwoonders van Ierusalem teghen Iuda.

+ C

* th. ten eersten

8

In dien daghe sal dye HEERE dye inwoonders van Iherusalem beschermen, Ende die ^* wt hem sal vertoornen) in dien daghe, sal zijn als Dauid, ende Dauids huys als thuys Gods, als dye Enghel des HEEREN in zijn aenschijn.

* th. swacste

9

Ende tsal zijn in dien daghe, dat ick sal begheeren te breken alle volcken die teghen Ierusalem comen,

10

ende ick sal wtstorten op Dauids huys, ende op dye inwoonders van Ierusalem, den gheest der genaden ende der ^* gebeden), Ende si sullen tot my sien, dien si doorsteken hebben, ende sullen hem bescreyen met kermen, als op eenen eenigen geboren sone, ende si sullen op hem droeuich zijn, gelijc inden doot eens eersten gheboren soons.

* the. barmherticheyt

11

In dien dage sal groot screyen zijn in Ierusalem, als die screijnge tot ^* Adremmon) inden velde Magedom,

* th. Hadad rimon

12

⁺Ende dat huysgesin der aerden sal screyen, ende elc huysghesin bisonder Dat huysghesin des huys Dauids bisonder ende haer wiuen ooc bisonder,

+ D

13

dat huisgesin des huis Nathan bisonder, ende haer wiuen oock bisonder, Dat huysgesin des huys Leui bison-[kolom]der, ende haer wiuen ooc bisonder, Dat huysgesin Semei bisonder, ende haer wiuen ooc bisonder

14

Ende alle ander huisgesin, huisgesin ende huisgesin bisonder, ende haer wiuen oock bisonder

§ Van die fonteyne des doopsels. Van die vernielinge der afgoden, vanden valschen Propheten ende die lueghenen.