De Vorsterman Bijbel

§ Dat .xi. Capittel.

1

⁺DOet op Libane v poorten, ende tvier sal v cederboomen eten,

+ A

2

Huylt ghi Abeelenboom, want den Cederboom is geuallen, want die moghende zijn verdoruen, Huylt ghy eycken boomen van Basan, want dat stercke bosch der waranden is ^* wtgehouwen)

* the. omgheuallen.

3

dye stemme des screyens der herderen, want haer mogentheyt is verwoest, Dye stemme des briesschens der leeuwen, want dye hoouaerdije des Iordaens is verdoruen,

4

Dit seit dye HERE mijn god, Voet beesten des dootslages,

5

dye welcke ^* diese besaten) sloegense doot, ende si en waren niet droeuich, ende ^* vercochtense, seggende) Ge-[kolom]benedijt si die HEERE, wi zijn rijc gheworden, Ende haer herderen en hebben hen niet gespaert,

* h. haer coopers.

* th. die vercoopers sullen seggen

6

⁺ende ic en sal niet meer sparen (seyt die HERE) die inwoonders der aerden.

Siet, ic sal die menscen ouergeuen, eenen yegeliken in die hant zijns naesten, ende in die hant zijns conincs, Ende si sullen dye aerde te samen in twee snijden, Ende ic en salse van haer hant niet verlossen,

+ B

7

Ende ic sal een beest des dootslachs voeden ^* daerom o ghi arme des cuddes,) Ende ick heb mi ghenomen twee roeden, dye eene heb ic ^* scoonheyt) geheeten, ende die ander heb ic ^* een coorde gheheeten, ende ick heb) die cudde geuoet,

* h. dat voorwaer elendige scapen waren

* theb. soete

* th. verwoestersse gheheeten, ende ick hebbe daer mede

8

Ende ic heb ^* afgehouwen) drie herderen in een maent ^* ende mijn siele is tsamen getrocken in hem, Want haer siele heeft verwandelt in mi)

* the. verdaen

* the. byden welken mij der siele was te enge ende haer kele heeft mi ooc verschupt.

9

Ende ic heb geseyt, Ick en sal v niet voeden, ⁺ Dat sterft, laet steruen, ende dat afgehouwen wort, ⁺ laet afgehouwen worden, Ende laet datter ouerblijft, een yegelic dat vlees zijns naesten verslinden,

+ C

+ Ier. xxv.a

10

Ende ic heb mijn roede genomen, die ^* scoonheyt) geheeten was, ende ic hebse af gesneden, op dat ic mijn verbont te niet maken soude, dat ic met allen volcke gheslagen heb,

* the. Soete

11

Ende het is te niete gebracht in dien dage Ende die arme der cudden die mi bewaerden hebbent so bekent dattet des HEREN woort was.

12

⁺Ende ic heb tot hen geseyt, Ist goet in uwen oogen, ⁺ so brenct minen loon, ende en ist niet, so rust, Ende si hebben minen loon daer gewegen, dertich silueren penningen.

+ D

+ mat. xxvij.

13

Ende die HERE heeft tot mi geseyt, Worpt dat den ^* beeltmakere toe) Een schoon loon, ^* daer ic om vercocht ben van hen) Ende ic hebbe die dertich silueren penningen genomen, ende ic hebbe die geworpen in des HEREN huys, den ^* beeltmaker) toe,

* th. potbackere.

* the. dien ick van hen verdient hebbe

* th. potbackere.

14

Ende ic heb mijn ander roede af gesneden, dye genoemt was een ^* coorde) op dat ic ontbinden soude dye broederscap tusschen Iuda ende Israel,

* h. verwoestersse.

15

ende die HEERE heeft tot mi gheseyt, Noch neemt die ^* vaten) eens sotten herders

* th. gereetschap.

16

Want siet, ic sal eenen herder verwecken opter aerden die niet besoecken en sal dat verloren is, ende en sal nyet soecken dat verstroyet is, ende en sal niet gesont maken dat gequetst is, ende dat noch oprecht staet, en sal hy niet voeden, Ende sal dat vleesch der vetter eten, ende haer clauwen sal hi ^* ontbinden)

* h. afscoeren

17

^* O herder ende afgod ende achterlatende die cudde) Een swaert op sinen arm, ende op zijn rechter ooge. Sinen arm sal ^* van dorheyt gedroocht) worden, ende zijn rechte ooge verdonckerende, sal verdonckert worden.

* o onnutte herder, die die scapen verlaet

* h. gantz ende geheel verdoruen.

§ Van dat belegghe van Ierusalem, ende van Gods barmherticheyt ouer Ierusalem.