De Vorsterman Bijbel

§ Dat .ix. Capittel.

1

⁺DIe last des woorts des HEREN ^* inden lande Adrach, ende Damasci, zijnder ruste, want die HERE is des menschen ooge, ende alder geslachten van Israel)

+ A

* th. sal ouer dat lant Hadrach comen ende hem ouer Damasc neder laten, want alder menscen ooge ende stammen van Israel sal opten HEERE sien.

2

Emach is ooc in sinen palen, ende ^* Tyrus) ende Sydon, want si hebben hem ouer zeer wijsheyt aengenomen,

* thebr. Zor

3

Ende ^* Tyrus) heeft zijn bolwerc ghetimmert ende heeft siluer als ^* aerde) verghadert, ende gout als slijck der straten.

* thebr. Zor

* thebre stof

4

Siet, die HERE salse ^* besitten,) ende hi sal zijn stercheyt inder zee slaen, ende dese sal verslonden worden vanden viere.

* h. verdriuen

5

Ascalon salt sien ende vreesen, ende Gaza, ende sal zeer droeuich zijn, ende Accaron, want zijn hope beschaemt is.

Ende die Coninc van Gaza sal vergaen, ⁺ ende Ascalon en sal niet bewoont worden,

+ B

6

Ende die ^* Afscheyder) sal sitten in Azoto, ende ic sal verderuen die hoouaerdicheit der Philistinen,

* h. vremdelinc.

7

ende ic sal wechnemen zijn bloet, van sinen mondt, ende zijn afgrijselicheden vant midden zijnre tanden Ende hi sal ooc worden gelaten onsen gode, Ende hi [kolom] sal zijn als een hertoech in dat Ioetsche lant ende Accaron als ^* Iebuseus)

* th. Iebus § Iebus dat is Ierusalem. esd. xxvi.b

8

Ende ic sal mijn huys omuangen, ^* wt den ghenen, die mi dienen strijdende, gaende ende wederkeerende) ende voortmeer en sal gheen schattere, ouer hen ghaen, ^{+ +} want nv heb ict aengesien met mijnen oogen.

* th. tegen die gene die ouer ende weder trecken mochten.

+ mat. xxi.a.

+ C

9

Dochter van Sion, verblijt ^* genoech) weest vrolijc dochter van Ierusalem, Siet, v Coninc sal v comen rechtuaerdich een salichmaker, hi is arm, ende rijdt op een ezelinne, Ende op haer ionghe vuelen der ezelinne,

* the. zeere

10

Ende ick sal den waghen wt Ephraim verderuen, ende tpaert van Ierusalem, ende den boge des strijts sal verdoruen worden, Ende hi sal den heydenen, vrede spreken, ende zijn macht vander zee, tot die ander zee, ende vanden riuieren totten eynde der aerden,

11

Ende ghi ^* hebt ooc v gebonden wtgesonden inden bloede ws testaments vanden cuyle, daer gheen water in en is.)

* th. sult ooc heil worden doort bloet ws verbonts ende uwe geuangene sal ic wt die gracht die sonder water is wt laten.

12

Keert weder tot die beschermenisse, ghi die tsamen gebonden zijt in ^* hope) Ende huyden sal ic ooc bootschappende v weder geuen dubbele gauen,

* h. verlangen.

13

want ic heb mi Iudam ^* wtgerect) als eenen boge, ende ic heb Ephraim ^* veruult) Ende ghi Syaon, ic sal v sonen verwecken op v sonen, ghi Griecken lant, ende ick sal v setten, ghelijck een swaert der stercken.

* h. gespant

* h. gelijc een koker gheuult

14

Ende God die HERE sal op hen gesien worden, ende zijn geschut sal wtgaen gelijc blixem ⁺ Ende ^* God die HERE) sal met een trompette blasen, ende hi sal gaen met een onwedere ^* des zuydens,)

+ D

* h. heerscappende HERE

* h. tot Theman

15

Die HERE der heyrscharen salse beschermen, ende si sullen verslinden, ende si sullen metten ^* steenen des slingeren) onderworpen, Ende drinckende, sullen si droncken worden als vanden wijn, ende si sullen veruult worden als ^* flessen) ende als horenen des altaers

* th. die slinger steenen

* th. bespreng beckens

16

Ende die HERE haer God salse verlossen in dien dage, als een cudde zijns volcs, want die ^* heylighe steenen) sullen worden verheuen, op zijn aerde,

* h. die steenen der croonen

17

^* want wat is zijn goet, ende wat is hen schoonder, dan tarwe der wtuercoren ende wijn voortbrenghende) maechden?

* th. Hoe gelucklijc ende schoon salt zijn dat coren sal de ionge gesellen ende die most sal vrolijc maken die

§ Hoe tvolck vermaent wert, te begeeren die leeringe der waerheyt, want si verleydt waren, door lueghenen, so waren si gheuanghen, ende hen wert verlossinge belouet.