De Vorsterman Bijbel

§ Dat .viij. Capittel.

1

⁺ENde dat woordt des HEREN der heyrscaren gesciede tot mi, seggende,

+ A

2

Dit seyt die HEERE der heyrscharen, Ic heb bemint [kolom] Syon met grooter liefden, ende met grooter gramschap hebbe icse ghehaet,

3

Dit seyt die HEERE der heyrscharen, ic ben weder ghekeert tot Sion, ende ick sal woonen int midden van Ierusalem, Ende Ierusalem sal worden geheeten, een stad des waerheyts, ende eenen berch des HEREN der heyrscharen, eenen gheheylichden berch.

4

Dit seyt die HEERE der heyscharen, Noch sullen ^* woonen) oude mannen ende vrouwen op die straten van Ierusalem, ende den stock des mans, sal in zijn hant zijn, om veelheyt der daghen.

* the. sitten

5

⁺Ende die straten des stadts sullen veruult worden met ionge kinderen, ende met maechden spelende op haeren straten.

+ B

6

Dit seyt die HERE der heyrscharen, Ist sake dattet swaer sal worden gesien, inden oogen der ouerbleuenen dees volcks, in dien daghen, salt dan swaer zijn in minen oogen, seyt die HERE der heyrscharen.

7

Dit seyt die HERE der heyrscharen Siet, ic sal mijn volc behouden, vanden lande vant oosten, ende vanden lande des ondergancs der sonnen,

8

ende ic salse brengen, ende si sullen int midden van Ierusalem woonen, ende si sullen mi zijn tot een volc, ende ick sal hen zijn een Godt inder waerheyt, ende inder rechtuaerdicheyt.

9

Dit seyt die HERE der heyrscharen, Laet v handen gesterct worden, die hoort in desen dagen dese redenen, door den mont der propheten inden daghe daer in gefundeert is thuys des HEREN der heyrscharen, op dat den tempel soude getimmert worden.

10

Want voor dien dach en was geenen loon der menschen, noch der beesten, Noch geenen vrede en was den ingangere, noch den wtgangere, ouermits druc, Ende ic heb alle menschen gelaten eenyegelijc tegen sinen naesten,

11

Maer nv seydt die HEERE der heyrscharen, en sal ic niet doen ouerbleuenen des volcs na den eersten daghen,

12

maer ^* het sal zijn een zaet des vreden.)

Die wijngaert sal zijn vrucht geuen, ende die aerde sal haer spruyten geuen, ⁺ ende die hemelen sullen haeren dauw gheuen, ende ic sal den ouerbleuenen des volcs, doen besitten alle dese dingen,

* th. men sal met vrede zaeyen.

+ C

13

Ende het sal zijn, so ghi huys van Iuda ende huys van Israel waert, een vermaledijnge onder den heydenen, also sal ic v behouden, ende ghi sult zijn een gebenedijnge. En wilt niet vreesen, Laet uwe handen ghesterct worden,

14

Want dit seyt die HERE der heyrscaren Also ic gedacht heb, dat ic v pijnigen soude, doen v vaderen mi met toornicheyt verwecten seyt die HERE,

15

ende en hebbe nyet ontfermet, also ben ic bekeert ende hebbe gedacht in desen daghen, dat ick Ierusalem, ghoet

[p. Y1v]

doen sal, ende den huyse van Iuda, En wilt niet vreesen,

16

⁺ Hierom dit zijn die woorden die ghi doen sult, spreect die waerheyt, eeniegelic met sinen naesten ^* Oordelt de waerheit, ende oordeel des vreden) in uwen poorten,

+ Epe. iiij.b

* th. nader warachticheit ende vredelijke rechten suldy onderrechten

17

ende en wilt gheen quaet dencken in uwe herten, eenyegelijc tegen sinen vrient, ende en wilt niet lief hebben eenen luegenachtigen eedt, Want die HERE seit, alle dese dinghen, zijn die ick gehaet hebbe.

18

⁺Ende des HEREN der heyrscharen woort is tot mi geschiet, seggende,

+ D

19

Dit seit die HERE der heyrscharen, Die vasten der vierder maent ende die vasten der vijfster, ende die vasten der seuenster, ende die vasten der thiender maent, sal zijn den huyse van Iuda, in blijscap ende vrolicheyt, ende in zeer schoon feestdagen, ^* bemint alleen die waerheit ende den vrede)

* h. want si sullen de waerheit ende den vrede beminnen.

20

Dit seit de HERE der heyrscharen, ^* Tot) dat die volcken comen sullen ende woonen in veel steden,

* the. het sal noch comen

21

ende die inwoonders sullen gaen, die een totten anderen, ende seggen, Laet ons gaen, ende bidden ^* dat aensicht des HEREN) ende laet ons soecken den HERE der heyrscharen, Ic sal dan ooc gaen,

* th. voor den HEERE

22

ende veel volcken sullen comen, ende stercke volcken om te soecken, den HEERE der heyrscharen, in Ierusalem, ende om te bidden ^* dat aensicht des HEREN)

* th. voor den HEERE

23

Dit seit de HERE der heyrscaren, In dien dagen in welcken .x. mannen van allen ^* tongen) der heidenen, sullen aengrijpen den soom eens Ioetschen mans, ende segghen, Wi sullen met v gaen, Want wi hebben gehoort dat godt met v is

* theb. talen

§ Van der heidenen roepinge, der welcker wijsheyt hope ende betrouwen beschaemt sal worden, ende die hoouaerdie vernedert, ende dat die Sion die kercke dan sal getimmert worden.