De Vorsterman Bijbel

[p. X7v]

Hier begint de propheet Sacharias

§ Hoe die propheet zacharias twederghekeerde volc tot God vermaent, dat si der propheten stemmen niet versmaden en souden gelijc haer vaders gedaen hadden, die gestraft waren, Ende daer wort belouet, dat si den salichmaker ende die Apostelen sien souden, Van die verlossinge ende barmherticheyt, ende van die wrake tegen die vianden.

§ Dat eerste Capit.

1

⁺IN die achtste maent in dat tweede iaer des conincs Darij, is des HEEREN woort geschiet tot Zachariam den propheet, die Barachie sone was, des soons Addo, seggende,

+ A

2

Die HERE is toornich geworden op uwe vaderen met toornicheyt,

3

Ende ghi sult seggen tot hen, Die HERE der heyrscaren seyt dit, Bekeert v tot mi, spreect die HERE der heyrscaren, ende ic sal mi keeren tot v, seyt die HEERE der heyrscaren.

4

En zijt niet, gelijc uwe vaderen, totten welcken riepen die voorleden propheten, ende seyden. Die HERE der heyrscaren seyt dit, Bekeert v van uwen quaden wegen, ende van uwen alderquaetsten quaden gedachten, ende die HERE seyt, si en hebben niet gehoort noch aengemerct tot mi.

5

Waer zijn uwe vaderen? ende die propheten, sullen si oock inder eewicheyt leuen?

6

⁺Nochtans mijn woorden ende mijn ^* geboden des wets) die ic geboden heb, minen knechten den propheten, en hebben si niet omuangen, uwe vaderen? Ende si zijn gekeert, ende hebben geseyt, So die HEERE der heyrscaren heeft gedacht ons te doen na onse wegen, ende na onse vindingen, so heeft hi ons gedaen.

+ B

* th. voornemen.

7

Inden vier ende twintichsten dach, der elfster maent Sabat, Int tweede iaer Darij is des HEEREN woort gesciet tot Zachariam, den propheet Barachie sone, des soons Addo, seggende,

8

Ic heb gesien inder nacht, ende siet een man ^* climmende) op een root paert, ende hi stont onder die ^* gagel)boomen, die inden gront waren, ende na hem ^* roode, bont) ende witte paerden.

* the. ridende

* th. Mirtten

* the. Appel grauwe

9

Ende ic heb ge-[kolom]seyt, Mijn Heere, wie zijn dese? Ende die Enghel des HEEREN die met mi sprac, heeft geseyt tot mi, Ic sal v toonen, wat dese zijn,

10

Ende die man die onder den ^* gagel)boomen stont heeft geantwoort ende geseyt, ⁺ Dese zijn, die de HEERE gesonden heeft, op dat si tlant doorwandelen sullen.

* th. Mirtten

+ C

11

Ende si hebben gheantwoort den Engele des HEEREN, die stont onder die ^* gagel)boomen, ende hebben geseyt, Wi hebben gewandelt doort aertrijc, ende siet, alle daertrijc is bewoont ende rust,

* th. Mirtten

12

Ende des HEREN Engel heeft geantwoort ende geseyt, HEERE der heyrscaren, hoe lange en suldi Ierusalem niet ontfermen, ende den steden van Iuda, op die welcke ghi toornich zijt? dit is nv tseuentichste iaer.

13

Ende die HEERE heeft geantwoort den Engele, die met mi sprac goede woorden, ende troostelijcke woorden

14

Ende die Engel die in mi sprack, heeft tot mi gheseyt, Roept, seggende, Dit seyt die HERE der heyrscaren, Ic heb toornich geweest op Ierusalem ende Syon, macht zeere,

15

Ende ic ben ooc toornich op die ^* rijcke) volcken met grooten toorn, want ick weynich toornich ben, maer si hebben geholpen int quaet.

* h. rustende.

16

Daerom seyt die HERE dit, ⁺ Ick sal wederkeeren tot Ierusalem in barmherticheden, In haer sal mijn huys getimmert worden, seyt die HERE der heyrscaren, Ende des metselaers metsloot sal wtgerect worden op Ierusalem.

+ D

17

Noch roept, seggende, Dit seyt die HERE der heyrscaren, Mijn steden sullen aen vloeyen met goeden, Ende die HERE sal Syon noch troosten, ende sal noch Ierusalem wt uerkiesen.

18

Ende ic hebbe mijn oogen opgheheuen, ende heb gesien, ende siet, vier hoornen,

19

Ende ic heb geseyt totten Engel, die tot mi sprac, Wat zijn dese? Ende hi heeft geseyt tot mi, Dit zijn die hoornen, die ^* gewaeyt) hebben Iudam ende Israel, ende Ierusalem.

* thebre. verstroeyt

20

Ende die HEERE heeft mi gethoont wercmeesters,

21

Ende ic heb geseyt, Wat comen dese doen? Ende hi sprack ende seyde, Dit zijn die horenen, die ^* gewannet hebben Iudam, door alle mannen, ende) niemant van hen, en heeft opgeheuen zijn hooft Ende dese zijn ghecomen om die te veruaeren, op dat si nederworpen sullen alle die horenen der heydenen, die de horenen opgeheuen hebben op dat lant van Iuda, om dat te verstroyen.

* thebre. verstroyt hebben Iudam, also dat

§ Hoe die Engelen gesien werden, ende hem vercondicht wert, dat Ierusalem sonder muer soude bewoont worden, om die menichte des volcs ende des vees, Ende dat God hen een vierighe muer zijn sal.