De Vorsterman Bijbel

§ Dat .ij Capi.

1

⁺INden vier ende twintichsten dach der sester maent, int tweede iaer Darij des Conincks,

+ A

2

in die seuenste maent, opten .xxi. dach der maent, is des HEREN woort gesciet door die hant Aggei des propheten, seggende,

3

Spreect tot Zorobabel Salathiels sone den hertoge van Iuda, ende tot Iesum Iosedechs sone, den grooten priester, ende totten anderen des volcs, seggende,

4

Wie onder v is ouer gebleuen, die dit huys gesien heeft in zijnder eerster heerlicheyt? ende wat siedi nv dit huys Ende ist nv niet also, oft niet en waer in uwen oogen?

5

Ende nv seyt die HERE, Zorobabel weest gesterct, ende Iesu Iosedechs sone groote priester, weest gesterct, Ende God der heyrscaren seyt, Alle volc der aerden weest gesterct [kolom] ende waecket, want ic ben met v seyt die HERE der heyrscaren,

6

⁺naer dwoort dat ic met v ouerdragen heb, doen ghi wtginct vanden lande van Egypten, Ende mijnen geest sal zijn int middel van v, Wilt niet ontsien,

+ B

7

Want dit seyt die HERE der heyrscaren, Tis noch een weynich dat ic hemel ende aerde ende die zee, ende tdrooge sal beroeren,

8

ende ic sal beroeren alle volcken ^* ende die begeert is, van allen volcken, sal comen,) Ende ic sal veruullen dit huys met heerlicheyt, seyt die HERE der heyrscaren. Die HEERE der heyrscaren seyt,

* the. die sullen met costelike cleynnodien comen

9

Tsiluer is mijn, ende tgout is mijn, Die HERE der heyrscaren seyt,

10

Groot sal zijn die heerlicheyt des laetsten huys, meer dan des eersten, ende ic sal geuen vrede in dese plaetse, seyt die HERE der heyrscaren.

11

Inden vier ende twintichsten dach der negenster maent, int tweede iaer des conincs Darij, is des HEREN woort gesciet tot Aggeum den propheet, seggende,

12

⁺Dit seyt die HERE der heyrscaren, Vraecht den priesteren die wet, ende segt,

+ C

13

oft een mensce droech geheylicht vleesch inden slippen zijns cleets, ende roerde metten oppersten broot oft toespise, oft wijn, oft olye, oft eenige spijse, en sal si niet heylich gemaect worden? Maer die priesteren hebben geantwoort, ende hebben geseyt, Neen.

14

Ende Aggeus heeft geseyt, Oft die gene die besmet is ^* inder zielen) roerde van alle desen, en salt niet besmet worden? Ende die priesteren hebben geantwoort, ende si hebben geseyt, Het sal besmet worden,

* the. aen eenen dooden

15

Ende Aggeus heeft geantwoort ende geseyt, Die HERE seyt, Also is dit volc, ende also is dit gheslachte, voor mijn aensichte, seyt die HERE, ende also is ooc alle werc haerder handen, ende alle die dingen die si daer geoffert hebben, sullen besmet zijn.

16

Ende nv ^* set v herten) van desen dage, ende daer bouen eer den eenen steen opten anderen geleyt wort aen des HEREN tempel,

* the. stellet ter herten

17

Doen ghi ginct tot eenen hoop corens van twintich mudden ende het werden tien, Ende doen ghi ginct tot die wijnpersse, op dat ghi vijftich flesscen wtdrucken sout, ende het werden .xx.

18

⁺Ic beb v geslagen met eenen barnende wint, ende met mist ende hagel alle die wercken uwer handen, ende niemant en was onder v, die wederkeerde tot mi, seyt die HERE,

+ D

19

^* Set uwe herten) van desen dage, ende int toecomende, vanden .xxiiij. dach, der negenster maent, vanden dage, inden welcken die fundamenten des HEREN tempel geleyt zijn, set op v herte,

* th. Stellet toch ter herten.

20

En is nv niet zaet in de spruyte? ende die wijngaert, ende vijgeboom ende granaet appelboom, ende olijfboomen en hebben noch niet gebloeyt, Van desen dage aen sal ic gebenedien.

21

Ende twoort des HEREN is anderwerf gesciet tot Aggeum inden .xxiiij. daghe der maent, segghende,

[p. X7v]

22

Spreect tot Sorobabel, den hertoge van Iuda, seggende, Ic sal te samen ^* beroeren) hemel ende aerde,

* th. scudden

23

Ende ic sal omkeeren den stoel der conincrijcken, Ende ic sal te samen breken die stercheyt der conincrijcken der heydenen, Ende ic sal omkeeren den wagen ende sinen rijder, Ende die paerden sullen neder vallen, ende haer rijders, ^* Ende die man met) zijns broeders swaert.

* the. een yegelijc door

24

Die HERE der heyrscharen seyt, O Sorobabel Salathiels sone, mijn knecht, in dien daghe sal ic v, aen nemen, Ende ic sal v setten gelijc een ^* teeken), Want ic heb v wtuercoren seyt die HEERE der heyrscharen.

* the. seghelrinck.

§ Hier eyndet die Propheet Aggeus.