De Vorsterman Bijbel

[p. X6v]

[kolom]

§ Hier begint die Propheet Aggeus

§ Hoe die Propheet Aggeus, die princen ende tvolck verwect, om den tempel te timmeren, Ende seyt dat tvolc vele ongemacs hadde, om dat si vertrocken den tempel te timmeren.

§ Dat eerste Capittel.

1

⁺INt tweede iaer des Conincs Darij, in die seste maent, ten eersten dage der maent, so is geschiet dat woort des HEEREN in die hant Aggei, des propheten tot Zorobabel Salathiels sone, hertoghe van Iuda, ende tot Iesum Iosedechs sone den grooten priester, seggende,

+ A

2

Dit seyt die HERE der heyrscharen, seggende, Dit volck seyt, die tijt en is noch niet gecomen, dat des HEEREN huys getimmert soude worden.

3

⁺Ende dwoort des HEEREN gheschiede in die hant Aggei des propheten seggende,

+ B

4

En is dat uwen tijt niet, dat ghi woont in gescrijnwercte huysen, ende dit huys moet verlaten zijn?

5

Ende die HERE der heyrscharen seyt nv dit, Sedt v ^* herten op v wegen)

* the. wesen ter herten.

6

Ghi hebt veel ghezayt, ende luttele in ghebracht, Ghi hebt gheten, ende en zijt

[p. X7r]

niet sat geworden, ⁺ Ghi hebt gedroncken, ende ghi en zijt niet droncken geworden, Ghi hebt v gedect, ende ghi en zijt niet warm geworden, Ende die loon ^* vergadert heeft, heeft dien geworpen) in eenen doorsteken sack.

+ C

* th. verdient die behout hem

7

Die HERE der heyrscaren seyt dit, Set v herten op uwe wegen,

8

Climt op die bergen, ende ^* draecht) hout, ende timmert een huys, ende tsal mi ontfanckelijc zijn, ende ic sal zijn eerlijc, seyt die HEERE,

* the. brengt

9

Ghi hebt omgesien op vele, ende siet, tis geworden min, Ende ghi hebt in tot huys gebracht, ende ick heb dat wtgeblasen, Om dese sake, seyt die HEERE der heyrscaren, Want mijn huys is verlaten, ende ghi haestet, een yeghelijc in zijn huys,

10

Daerom zijn op v verboden die hemelen, dat si niet en sullen geuen den dau, ende die aerde is verboden, dat si niet en sal geuen haer vruchte,

11

Ende ic heb geroepen droechte opter aerden, ende op die bergen, ende op die ^* tarwe, ende opten wijn, ende op die olie), ende op al dat die aerde voort brengt, ende op die menscen, ende op die beesten, ende op alle arbeyt der handen.

* the. koren most ende olye

12

Ende Zorobabel Salathiels sone, ⁺ ende Iesus Iosedechs sone die groote priester, ende alle douerbleuen volc, hebben gehoort die stemme haers Gods, ende Aggei des propheten woorden, also die HERE haer God hem gesonden heeft tot hen, ende alle tvolc heeft geureest van des HEREN aenschijn.

+ D

13

Ende Aggeus des HEREN bode, heeft geseyt van die bootscap des HEREN, sprekende den volcke, Die HERE seyt, Ic ben met v,

14

Ende Godt heeft Zorobabels Salatiels des hertoochs van Iuda sone geest verwect, ende den geest Iesus Iosedechs sone des grooten priesters, ende den geest der anderen van alle den volcke, ende zijn gecomen, ende hebben ghedaen twerck aenden huyse des HEREN der heyrscaren haers Gods.

§ Hoe die princen ende tvolc bekeert werden, ende Gods hulpe wert hen belouet Ende van Christus toecoemst.