De Vorsterman Bijbel

§ Dat .iij. Capittel.

1

^* WEe v der stat der bloeden) Gheheel tot lueghenen, ende vol tweedrachts. ⁺ Die roof en sal van v niet gaen.

* th. o bloetgierighe stadt,

+ A

2

Die stemmeme des gheesels, ende tgheluyt vanden gedruysche des radts, Ende der paerden drauen ende des ^* barnenden) wagens, Ende des rijders die daer op climt,

* the. springhenden,

3

ende des ^* blinckenden swaerts ende des schijnende) lancie, Ende des veelheyts dootgeslaghen, ende ^* des swaren vals) ende der dooder lichamen en isser gheen eynde, Ende si sullen vallen ouer haer lichamen,

* h. vlammende swaerts ende glentzende

* th. der dooder lichamen menichte,

4

om die veleheyt der oncuyscheyt des schoonen gemeyn wijfs, ende bequaem ende hebbende betooueringe, Die die heydens vercocht heeft met haer oncuyscheyden, ende die huysgesinnen met haeren roouerijen.

5

Siet, ic wil aen v, seyt die HEERE der heyrscharen, ic sal ontdecken v ^* onscamel leden in) v aensichte, ick sal den volcke v naectheyt thoonen, ⁺ ende den conincrijcken v schande.

* the. slippen ouer

+ B

6

Ende ick sal op v gruwelicheden worpen, ende ick sal v tot oneeren brenghen, ende ick sal v ^* tot een exempel setten)

* the. ghelijc eenen dreck maken,

7

ende het sal zijn, dat alle die v siet, sal van v vlieden, ende sal seggen, Niniue is verdoruen Wie sal ^* zijn hooft op v roeren) Van waer sal ick v eenen trooster soecken?

* th. medelijden met haer hebben

8

Sidy niet beter ^* dan Alexandrien der volcken die daer woont inden riuieren?) die wateren zijn in haeren omganc, ⁺ wiens rijcdommen zijn in die zee, ende die wateren zijn haer mueren?

* ih. dan die hooftstadt No,

+ C

9

Moorenlant ende Egipten, waren haer macht, sonder eynde ^* Affrica ende Libien) hebben oock uwe hulpe geweest,

* the. Libien ende Lubim

10

maer noch is si in die oueruaringhe gheleyt in die gheuanckenisse. Haer cleyn kinderen zijn geclopt inden beghinne van allen weghen, Ende op haer edelen, hebben si dat lot geworpen, ende al haer opperste zijn in boeyen geuest.

11

Ende hierom suldy ooc droncken worden ende sult ^* versmaet zijn) ende sult van uwen viant hulpe soecken.

* the. v verberghen,

12

Al v bolwercken zijn als vijchboomen met ^* haeren vruchten) die als si gheschut worden, inden mont des eters vallen,

* the. tijdige vruchten,

13

Siet, v volck zijn vrouwen in uwen middel Die poorten ws lants sullen moeten uwen [kolom] vianden opghedaen worden, dat vier sal v grendelen verslinden.

14

⁺Puttet v water, om die belegghinghe, Timmert uwe vesten, Gaet in dat slijck ende tredet, maect optredende eenen bacsteen.

+ D

15

Daer sal v dat vier eten, ghi sult metten swaerde vergaen, ende tsal v verslinden ghelijc oude vliegende sprinchanen. ^* Hierom vergadert als oude vliegende sprinchanen, ende vermenicfuldicht v, als sprinchanen)

* the. het sal op gelijck cappers ende sprinchanen naer die swart comen.

16

Ghi hebt uwe coomanscap meerder ghemaect, dant sterren zijn des hemels ^* Die vliegende sprinchaen is wtgespreyt ende is wech geulogen)

* th. nv sullen si hen gelijc cappers wtbreyden, ende wech vlieghen,

17

V bewaerders zijn so vele als sprinchanen, ende v ^* kinderen) zijn als cleyne sprinchanen, die tsamen sitten ^* in die thuynen) inden tijt der couden. Die zonne is opgegaen, ende si zijn wech gheuloghen, ende haer plaetse en is niet bekent, daer si gheweest hebben,

* h. hertogen

* th. aen die wanden

18

O coninc van Assirien v herders, hebben geslapen, v princen sullen ^* worden begrauen) V volc ^* heeft gescuylt) opten bergen, ende niemant en is diese vergadert.

* h. stille sitten

* th. is verstroyt,

19

V vernielinge en is niet duyster. V wonde is dalder quaetste, Alle die gehoort hebben v geruchte, hebben haer hant ^* mede gedruct op v) Want op wien en is v boosheyt altoos niet geghaen?

* th. op v te samen geslaghen,

§ Hier eyndt die propheet Naum.