De Vorsterman Bijbel

§ Dat .iiij. Capittel.

1

⁺ENde Ionas werdt bedroeft met grooten verdriete, ende wert toornich,

+ A

2

ende bat totten HERE, ende sprac Och HERE, Ende is dat niet mijn woort, dat ic seyde, doen ic noch in minen lande was, Warom ic ooc had voorcomen te vlieden in Tharsis, Want ic weet dat ghi een genadich, ontfermhertich Godt zijt, lancmoedich, lijtsaem, ende van groote ontfermherticheyt, ende vergeuende die boosheyt,

3

Aldus neemt nv doch bid ic v, o HERE, mijn ziele van mi, Want beter is mi die doot, dan tleuen.

4

De HERE sprac Meynt ghi dat ghi wel te recht gram zijt?

[afbeelding]

[p. X2r]

5

⁺Ende Ionas ghinc ter stadt wt, ende sadt oostwaerts tegen die stadt, Ende maecte hem aldaer een hutte, Doen settede hi hem onder in de scaduwe, tot dat hi sage, wat der stadt toecomen soude.

+ B

6

Ende die HEERE bereyde een ^* wilde rancke), die wies ouer Ionas hooft, dat si scaduwe soude zijn ouer zijn hooft, ^* ende hem bescermen, want hi gearbeit had) Ende Ionas verblide hem zeere met grooter blischap, van dien wilden rancke,

* h. kikaion § Kikaion is een cruit dat olie geuet, de grieken noement kawoerden cruyt.

* th. dattet hem voor zijn ongheual bescermen soude.

7

Ende die HERE bereyde eenen worm, des morgens, doen die dageraet opginc, die ^* stac) de wilde rancke dat si verdorde,

* th. cnaechde

8

Ende als die sonne opgegaen was, beual de HERE eenen verdorrenden oostwint, ende die sonne stac Ionam opt hooft, also dat hi ^* heet ende flau) wert, Doen wenschte hi ^* zijnder zielen die) doot ende sprac, ⁺ Tis mi beter te steruen, dan te leuen.

* th. moeyeloos.

* the zijns leuens

+ C

9

Doen sprac God tot Ionam, Meynt ghi, dat ghi wel te recht toornich wordt, om den wilden rancke? Ende hi sprac, wel te rechte ben ic gram totter doot toe,

10

Ende die HEERE sprack, V iammert der wilder rancke, daer ghi niet aen gearbeyt en hebt, noch en hebtse ooc niet op doen wassen, diewelke in eender nacht wies ende in eender nacht verderf

11

Ende ick en soude niet sparen Niniue, sulcke groote stadt, in die welcke meer, dan ^* hondert ende twintich duysent) menschen zijn, die gheen onderscheit en weten, wat onderscheit tusschen haer rechter ende slincker handt is, daer toe oock veel dieren.

* th.twaelfmalen tien duysent

§ Hier eyndt die Propheet Ionas.