De Vorsterman Bijbel

§ Dat .iij. Capittel.

1

⁺ENde dat woort des HEREN gesciede ten anderen male tot Ionam, segghende

+ A

2

Staet op, ende gaet in die groote stat Niniue [kolom] ende vercondicht haer ^* die prekinge) dien ic tot v segge.

* th. den roep

3

Doen stont Ionas op, ende ginc tot Niniue waert, na dat woort des HEREN. Ende Niniue was een groote stadt, drie dachreysen groot.

4

Ende Ionas begonst te gaen inder stadt een dachreyse, ende riep, ende sprac, ⁺ Het zijn noch veertich dagen dat Niniue sal omgekeert worden.

+ B

5

Ende die mannen van Niniue geloofden ^* den HERE, ende predicten) datmen vasten soude Ende trocken sacken aen, beyde groot ende cleijn

* th. Gode, ende riepen wt

6

Ende dwoort quam voor den coninc van Niniue, ende hi stont op van sinen troon, ende hi werp zijn cleet van hem wech, ende want eenen sac om hem ende ginc in die aschen sitten,

7

Ende liet wtroepen ende seggen tot Niniue, Wt tbeuel des conincs ende zijnder princen, seggende aldus, Noch mensche, noch vee, noch osse, noch scaep, en sal yet proeuen, ende men en salse niet laten weyden, noch si en sullen geen water drincken,

8

ende sullen sacken om hen wijnden, beyde menschen ende vee, ⁺ ende tot God ^* crachtelijc) roepen Ende een yegelic man bekeere hem van sinen quaden wege, ende vander ongerechticheyt, die in harder hant is

+ C

* th. sonder aflaten

9

Wie weet oft God hem keeren mochte ende vergeuen, ende hem omkeeren van zijnder grammiger toornicheyt, ende wi niet vergingen.

10

Ende God sach haer wercken, dat si bekeert waren van haren quaden wege, ende hi is ontfermhertich geweest ouer die quaetheyt, ☞ die hi ghesproken had hen te doen, ende en deets niet.

§ Hoe Ionas totter doot toe droeue was. Ende daerom van God ghestraft wert, ende hoe Ionas droeue was dat die rancke verdorret was.