De Vorsterman Bijbel

§ Dat .ij. Capittel.

1

⁺ENde die HERE bereyde eenen grooten visch, om dat hi Ionam soude opslocken Ende Ionas was inden inden buyc des vischs drie daghen ende drie nachten.

+ A

2

En Ionas badt totten HERE sinen God, wt den buyc des vischs, ende sprac,

3

Ic riep totten HERE wt minen anxt, ende hi verhoorde mi, Ic riep wt den buyc der hellen, ende ghi hoordet mijn stemme.

4

Ende ghi werpet mi in die diepte, int hert van die zee, ende die vloeden omuingen mi, Alle uwe water wagen, ende baren gingen ouer mi.

5

Ende ic seyde, Ic ben van uwen oogen verstooten, ⁺ Ic sal nochtans uwen heyligen tempel wederomme sien.

+ B

6

Die wateren omuingen mi tot aen mijn ziele, die diepten omringden mi, ^* die zee) bedecte mijn hooft.

* th. dat riet

7

Ic sanc onder wech tot der berghen gronden, Der aerden grendelen hadden mi inder eewicheyt besloten, Ende ghi sult mi vander verganckelicheyt opheffen mijn leuen o HERE mijn God.

8

Doen mijn ziele in mi verzaecht was, dacht ic op den HERE ^* om dat) mijn gebet quam tot in uwen heyligen tempel.

* th. ende

9

Maer die hen verlaten op ydelheyt, te vergeefs, die achterlaten zijn ontfermhertiheyt.

10

Maer ic sal in die stemme des loefs v offeren, Al dat ic geloeft heb ^* den HERE voor die behoudenisse, sal ic betalen)

* th. sal ic betalen want bi den Heere is die salicheyt

11

Ende die HERE sprac totten vische, Ende hi spooch Ionam wt op dat drooghe lant.

§ Hoe Ionas weder in Niniue ghesonden wert om te prediken, Ende hoe hi predicte, Ende hoe tvolc berou bewees. Ende hoe God haerder ontfermde.