De Vorsterman Bijbel

§ Dat .xi. Capittel.

1

^* GHelijc die morgenstont voor by gaet also is voorbi ghegaen die Coninc van Israel, Want Israel is een kint, ende ic hebbe hem lief ghehadt) ⁺ Ende ick hebbe minen sone wt Egipten gheroepen

* theb. So sal ooc de coninc van Israel geheel te nyet comen, Ic beminde Israhel doen hy noch een kint was.

+ A

2

^* Si hebbense gheroepen, also ghingen si van haeren aensichte. Si offerden Baalim, ende deden den afgoden offerhande)

* th. hoe mense meer riep so si verder daer afgingen, den afgoden te offeren, ende den beelden ruecwerc te offeren.

3

Ende ic droechse in mijnen arme als een voester van Ephraim, ende si en wisten niet dat icse ghesont maecte.

4

^* Ic salse in Adams banden trecken, inden banden der liefden). Ende ic sal hen zijn als dat iock op haeren wanghen op lichtende. Ende ic ben tot hen neder ghedaelt, op dat hy soude eten.

* th. met menscelike stricken ende met banden der liefden heb icse tot mi getrocken

5

Hy en sal in Egipten niet weder keeren, Ende Assur selue sal zijn Coninck zijn. Want si niet bekeert en wilden worden.

6

^* Dat swaert heeft in zijn steden beghonnen, ende het sal zijn wtuercorene verteeren, ende haer hoofden eten.

* th. So sal de swaert zijn steden oueruallen, zijn stercke dooden ende verslinden om haer voornemen, Ende mijn volc twifelt oft tot mi bekeren wil men roept hem totten alderhoochsten, maer ten acht zijns niet

7

Ende mijn volc sal twijfelachtich hanghen tot mijn weder coemst, Maer hen sal een ioc opgheleyt worden, dat nyet wech ghenomen en sal worden.

8

O Ephraim, hoe sal ic v ouer gheuen? ende v ^* bescermen) Israel? Hoe sal ic v gheuen, sal ic v setten ge-[kolom]lijck Adama ende Seboim? Mijn herte is in my omme ghekeerdt mijn betrouwen is beroert.

* th. ouerleueren.

9

Die gramscap mijns toorns en sal ic niet doen, Ic en sal nyet bekeert worden, dat ick Ephraim verderuen sal. Want ic ben God, ende gheen mensche, die heylich is onder v ^* Ende ic en sal in die stede niet comen).

* th. dat ic niet met viantscap comen en mach.

10

Si sullen nae den HEERE wandelen.

Als een leeu sal hi briesschen, Want hi sal briesschen, ende die sone ^* der zee) sullen vreesen.

* th. vantwesten

11

Ende als een vogel sullen si wt Egipten wech vlieghen, ende als een duyue wten lande van Assirien. Dit seyt die HERE, ic salse in haeren huysen setten.

12

Ephraim heeft my omuangen met ^* comenscap) Ende dat huys van Israel, met bedroch. Maer Iudas ^* een getuyge is neder gecomen) met God, Ende met den heiligen ^* gheloouighen).

* th. lueghen

* the. is noch geweldich

* th. ghetrouwelick

§ Hoe Israel ende Iuda gestraft werden, Van die weldaden Iacob bewesen, ende van zijnder kinderen quaet, te wetene Ephraim ende Chanaan, Ende hoe tvolc door die propheten geroepen wert.