De Vorsterman Bijbel

§ Dat .v. Capittel.

1

⁺HOort dit ghi priesteren, Ende aenmerct ghi huysgesinne van Israel, ende ghi huys des conincs hoort toe, tis v een oordeel, want ghi ^* eenen stric der bescouwige) geworden zijt ende als een wtgerect net onder den berch Thabor

+ A

* th. Mitzpa eenen stric.

2

^* ende hebt die offerhanden vernetert int diepe, ende ic ben een leeraer al deser dingen).

* th. die ouertreders hebben hen met haeren slaen verdiept daer heb ic hen allen een straffinge bereyt

3

Ic ken Ephraim, ende Israel en is van mi niet verborgen. Want nv ^* heeft Ephraim) ouerspel ghedaen, ende israel is besmet.

* th. o Ephraim ghi hebt

4

Si en sullen haer gedachten niet geuen om bekeert te worden tot haren god, want die geest der hoererien int middel van hen is, ende si en hebben den HERE niet bekent.

5

Ende Israels vermetentheit sal ^* antwoorden) in zijn aensicht. Ende Ephraim ende Israel sullen ^* vallen in haer boosheit) Ende Iudas sal ooc vallen met hen.

* th. vernedert worden

* th. struyckelen in haer misdaet

6

⁺Si sullen met haer cudden, ende met haeren vee den HERE gaen soecken ende en sullen hem niet vinden. Hi is van hen afgenomen.

+ B

7

Si hebben tegen den HERE ouer ghetreden, want si hebben vremde kinderen gewonnen, Nv sal ic dese maent verslinden met haeren deelen.

8

Blaest in Gabaa metter basoenen, ende metten trompetten in Rama, Huylt in Bethanen, achter uwen rugge BenIamin.

9

Ephraim sal verwoest worden, ^* Inden dach der straffinge heb ic trouwe getoont, inden geslachten van Israel)

* th. ende dat heb ic den geslachten van Israel trouwelijc condt gedaen.

10

Die princen van Iuda zijn geworden ^* als een eynde nemende) Op hen sal ic als water minen toorn wtstorten.

* theb. die de paelsteenen verstooten

11

Ephraim lijdt ghewelt, gebroken ouermits dat oordeel, want hy begonnen heeft na ^* die onreynicheit) te gaen.

* th. tgebot § Tgebot dat is, na die afgoden

12

⁺Ende ic sal Ephraim een motte zijn, ende den huyse van Iuda, als ^* vullicheyt)

+ C

* th. een houtworm

13

Ende Ephraim heeft zijn crancheit gesien, ende Iuda sinen bant ende Ephraim is wech gegaen tot Assyrien, ende heuet gesonden totten coninc ^* den wreker Hi en sal v niet mogen gesont maken) noch van v den bant ontbinden.

* h. Van Iared Hi en conde v niet heylen

14

Want ic sal Ephraim, als een ⁺ leeuwinne) zijn ende als eenen iongen leeu den huyse van Iuda. Ic salse vanghen ende wech gaen, ic salse wech nemen, ende niemant en isser, die v verlossen sal.

+ th. lupaert.

15

Ic sal gaende wederkeeren tot mijn plaetse, tot dat ghi ^* ontbreect) ende mijn aensicht soect

* the. v luyden sculdich geuet

§ Van dat liden van drie dagen, Ende van die corte bekeeringe, Ende dat God bermherticheit wilt ende geen offerande, Ende God te kennen lieuer dan die brantofferen.