De Vorsterman Bijbel

§ Dat .vi. Capittel.

1

⁺HEt heeft Dario belieft, Ende hi heeft op dat rijc hondert ende twintich drossaten gestelt, op dat si in allen sinen rijcke souden zijn,

+ A

2

Ende bouen hen drie princen, Vanden welcken Daniel een was, Op dat die drossaten, desen rekeninge souden doen, Ende om dat die coninc geen moeyte hebben en soude.

3

Hierom is Daniel te bouen gegaen allen den princen ende den drossaten, want ^* die geest Gods was meerder) in hem,

* the. hi eenen oueruloedigren geest hadde.

4

Maer die coninc heeft hem gedacht te stellen ouer alle zijn rijc, Waerom hebben die princen ende die drossaten een oorsake ghesocht te vinden aen Daniel, die tegen dat coninc rijck ware, Ende si en hebben geen sake conne vinden, noh eenich quaet vermoeden, Want hi getrou was, ende geen misdaet, noch ooc geen quaet vermoeden en was in hem te vinden.

5

Hierom hebben dese mannen gesproken Wi en sullen in desen Daniel niet connen geuinden eenige sake, ten waer bi auontueren in die wet zijns Gods.

6

Doen ^* hebben dye princen, ende die ouerste den coninc heymelijc ingeblasen) ende aldus hebben si tot hem gesproken, Die coninc Darius leue inder eewicheyt

* th. zijn die heeren ende hertoghen tot den coninc vergadert

7

⁺Alle die princen van uwen rijcke, die raetsheeren ende die drossaten, ende die wethouders, ende die rechters hebben eenen raet gehouden, dattet gebot des conincs wtgae, ende zijn beuel, dat al die gene, die daer eenige begeerte sal begeren, van eenigen mensce oft Gode tot dertich dagen toe, dan van v coninc alleen, datmen dien inden cuyl der leeuwen worpen sal.

+ B

8

Hierom Coninc, maect nv dit vonnisse vast, ende schrijf dat gebot, dattet niet en worde verandert, datter geordineert is van den Meden ende den Persen, noch ooc dattet niemant ouertreden en mach.

9

Ende die coninc Darius heeft voort gestelt dat gebot, ende heuet beuesticht.

10

⁺Doen Daniel dat vernam te weten, dat die wet beuesticht was, is hi in gegaen in zijn huys, ende die vensteren stonden open in zijn eedtcamere teghen Ierusalem,

Doen knielde hi driemael des daechs neder op zijn knien, ende hi heeft sinen God aengebeden, gelijc hi voormaels te doen plach,

+ C

11

Doen [kolom] ^* dese mannen zeer curioselijc ondersoeckende) hebben Daniel beuonden, biddende, ende aenbedende sinen God.

* the. vergaderden dese mannen weder, ende

12

Ende comende, hebben si gesproken totten coninc vanden gebode, seggende, Coninc, en hebdi niet beuesticht, dat een yegelijc mensche, die daer yet soude bidden eenigen vanden goden oft den menscen, dan van v o coninc tot .xxx. dagen toe dat die inden cuyl der leeuwen geworpen soude worden? Totten welcken die coninc geantwoort heeft, ende geseyt, Dat woort is waer, na tgebot der Meden ende Persen, dwelc men niet en mach ouertreden.

13

⁺Doen hebben si geantwoort, ende seyden voor den coninc, Daniel, die daer is vanden geuangen kinderen van Iuda, en vraecht na uwe wet niet, ende na tgebot dat ghi beuesticht hebt, Maer ten drien tijden des daechs, bidt hi met zijn bedinge,

+ D

14

Dwelcke woort alst die coninc gehoort had, is hi zeer bedroeft gheweest, ende heeft zijn herte voor Daniel gestelt, op dat hi hem verlossen soude, Ende hi heeft gearbeyt, totten onderganc der sonnen, om hem te verlossen.

15

Dese mannen, ^* verstaende den coninc) hebben hem geseyt, Weet Coninc, dat die wet der Meden ende Persen is, dat alle tgebot dat die coninc beuesticht heeft, datmen dat niet en mach veranderen.

* the. zijn weder voor den coninc vergadert ende

16

Doen heuet die coninc beuolen, ende si hebben Daniel voortgebracht, Ende si hebben hem inden cuyl der leeuwen geworpen, Ende die coninc heeft tot Da-[afbeelding]niel ^* gesproken) Vwe Godt dien ghi altoos dyent, sal v verlossen.

* the. geantwoort ende geseyt

17

Ende daer is eenen steen gehaelt, ⁺ ende hi is geleyt op dat gat vanden cuyle, den welcken die coninc beseghelt heeft met zijn teeken, ende metten ringe zijnder edelen, om datmen tegen Daniel niet en soude doen.

+ E

18

Ende die coninck is wechgeghaen in zijn huys, ende hi ginc slapen sonder auontmael, Ende daer en zijn geen spijsen voor hem gehaelt, Ende den vaec is ooc van hem wechghegaen,

19

Ende doen die coninc smorgens vroech opstont is hi haestelijc totten cuyle der leeuwen ghegaen,

20

ende nakende omtrent den cuyl, heeft hi Daniel aengeroepen met weenender stemme, ende hi heeft hem aen gesproken, seggende, Daniel

[p. T4v]

dienaer des leuenden Gods, v God den welcken ghi aenbidt, meyndi ooc niet, dat hi v heeft moghen verlossen vanden leeuwen?

21

Ende Daniel antwoordende den coninc, heuet gheseyt, Die Coninck leue inder eewicheyt,

22

Mijn Godt heeft sinen Enghel gesonden, ende hi heeft die monden der leeuwen toe gesloten, ⁺ ende si en hebben mi niet gescaet, want voor hem is geuonden rechtueerdicheyt in mi, Ende ooc teghen den coninc en hebbe ick gheen misdaet ghedaen.

+ F

23

Doen is die coninck ouer hem zeer verblijt, ende heeft beuolen datmen Daniel wten cuyle soude doen. Ende Daniel is wten cuyle geleyt, ende gheen quetsuere en is aen hem geuonden, want hi geloofde sinen Gode.

24

Ende door des conincs gebot, so zijn die mannen voortgebracht die Daniel beschuldicht hadden, ende zijn inden cuyl der leeuwen geworpen, si, ende haer kinderen, ende haer wiuen, Ende si en zijn niet gecomen aen den bodem des cuyls, si en zijn vanden leeuwen gegrepen, ende alle haer gebeenten hebben si instucken gheknorst.

25

Doen heeft Darius die coninc allen volcken gescreuen, ⁺ allen geslachten, ende talen, woonende in allen landen. Vrede moet v vermenichfuldicht worden.

+ G

26

Van mi is gestelt een ghebot, Datmen in alle mijn heerscappie ende in alle mijn rijc soude vreesen ende ontsien Daniels God, want hi is die leuende Godt, ende eewich inder eewicheden, ende zijn rijc en sal niet vergaen, ende zijn macht is tot inder eewicheyt,

27

Hi is die verlosser ende die behouder, doende die teekenen ende wonderlijcke dingen, inden hemel ende inder aerden, die Daniel verlost heeft wt den cuyle der leeuwen.

28

Ende Daniel is gebleuen ^* volherdich) tot den rijcke van Darius, ende tot den rijcke van Cyrus van Persen.

* h. vorspoedich.

§ Hoe Daniel die vier dieren sach tot een figuere der vier rijcken, vanden toecomenden tijden.