De Vorsterman Bijbel

§ Dat .xxxvi. Capit.

1

⁺MAer ghi des menschen sone propheteert ouer die bergen van Israel ende ghi sult seggen, Bergen van Israel hoort des HEREN woort,

+ A

2

Dit seyt die ^* HERE God,) om dat die viant van v geseyt heeft,

Hei, die eewige hoochten zijn ons tot erffelicheyt gegheuen,

* thebr. heerscappende Heere

3

Hierom propheteert ende segt, Dit seyt die ^* HERE God) Om dat ghi verwoest zijt, ende alom vertreden, ende geworden zijt in erffelicheyt den anderen luyden, ende om dat ghi opgecomen zijt op die lippen vander tongen ende in lachter des volcs.

* thebr. heerscappende Heere

4

Hierom ghi bergen van Israel hoort des HEEREN Gods woort, Dit seyt ^* die HEERE God) den bergen ende den hueuelen, den rieuieren, ende den valleyen, ende den woesten wanden, ende den steden die verlaten zijn vanden menscen, ende berooft zijn ende bespottet vanden anderen heydenen alomme, ende van hem.

* h. heerscappende heere

5

Hierom seyt dit die ^* HEERE Godt) Want inden viere mijns torens heb ic gesproken vanden anderen heydenen, ⁺ ende van alle Idumeen die mijn lant hen selluen gegeuen hebben tot erffelicheyt met bliscappen ende met alder herten ende wten wille, ende hebbense verdreuen, om dat zijt verwoesten souden.

* h. heerscappende heere

+ B

6

Hierom propheteert op dat lant van Israel, ende ghi sult seggen

[p. S1r]

den bergen ende den hueuelen, ende den ^* hoochsten vanden berghen, ende den valeyn, Dyt seyt die ^* HEERE v Godt, ⁺ Siet, ick hebbe gesproken in minen toorn, ende in mijn gramscap om dat ghi der heydenen lachter geleden hebt

* h. steenroetsen

* h. heerscappende heere

+ C

7

Hier om seyt dit die ^* HEERE Godt) Ic heb mijn hant opgeheuen tegen die heydenen, ⁺ die alomme v zijn, dat si haeren lachter dragen sullen,

* h. heerscappende heere

+ § Die hant opheffen, ghebruyct de scrift onderwilen voor sweren.

8

Maer ghi bergen van Israel spreyt wt v telgeren, dat ghi groeyen moecht, ende brenct uwe vrucht minen volcke van Israel Want het is bi dat hi comen sal.

9

Want siet, ic segge tot v, ende ic sal tot uwaert worden bekeert, ende ghi sult worden geackert, ende ghy sult ^* nemen zaet)

* th. bezaeit worden

10

ende ic sal in v vermenichfuldigen die menschen, ende alle thuys van Israel Ende die steden sullen bewoont worden, ende dat veruallen, sal vermaect worden,

11

ende ick sal v veruullen met menschen en met beesten, ende si sullen vermenichfuldicht worden ende wassen, Ende ick sal v doen woonen, soot inden begin was, ende ic sal meerder goeden geuen dan ghi vanden beginne gehadt hadt, Ende ghi sult weten dat ic die HERE ben.

12

Ende ic sal op v menscen brengen, mijn volc van Israel, ende si sullen v in erflicheit besitten, Ende ghi sult hen zijn in erflicheyt, ende ghi en sult voortmeer niet toedoen, dat ^* ghi sonder hen zijn) sult

* theb. ghise verworpen.

13

Dit seyt die ^* HERE God.) Om dat si van v segghen, ghi zijt der menschen verslinster, ende v volck ^* versmacht ghy,)

* h. heerscappende heere

* h. verworpet

14

Hier om en sult ghy niet meer die menschen eten, ende ghi en sult voort meer v volc niet dooden, seyt dye ^* HEERE God)

* h. heerscappende heere

15

⁺Noch ic en sal niet meer in v doen hooren der heydenen schande, ende der volcken lachter en sult ghi geensins dragen, ende ghi en sult niet meer v volc ^* verliesen,) seyt die ^* HERE God.)

+ D

* h. verworpen

* h. heerscappende heere

16

Ende des HEREN woort gesciede tot mi, seggende,

17

Des menschen sone ^* die hyusen van Israel hebben gewont in haer lant, ende si hebbent besmet) met haeren wegen, ende met haeren naersticheden, Na dye onsuyuerheyt eens wijfs die haer maentsuyueringe heeft, so is haeren wech geworden voor my

* theb. Doen thuys van Israel op zijn eygen aertrijck woonde besmetteden zijt

18

Ende ic heb mijn gramscap op hen wtgestort, om dat bloet dat si wtgestort hebben op tlant, Ende si hebbent besmet met haeren afgoden.

19

⁺ Ende ic stroeydese onder den heydenen, ende si zijn verwaeydt inden landen, ende ic hebse geoordeelt na haeren wegen, ende na haeren vindinghen

+ Roma. ij.d

20

Ende si zijn ingegaen totten heydeden, totten welcken si ingingen, ⁺ ende besmetteden minen heyligen naem, datmen van hen seyde, dit is des HEEREN volc, ende si zijn wt zijn lant gegaen.

+ E

21

Ende ic spaerde mijnen heyligen naem, welc thuys van Israel besmettede onder den heydenen [kolom] totten welcken si ingegaen waren.

22

Hierom sult ghi den huyse van Israel seggen, Dit seit die ^* HEERE God) Huis van Israel, Ic en salt om uwent wille niet doen, Maer om minen heiligen naem, dien ghi besmet hebt, onder den heydenen, tot welcke ghi gecomen zijt,

* h. heerscappende heere

23

Ende ick sal minen grooten naem heylighen, die besmet is onder den heidenen, dien ghi besmet hebt int midden van hen, Op dat die heidenen weten sullen, dat ic die HERE ben, seyt die ^* HERE der heyrscharen) als ic in v geheilicht sal zijn voor hen.

* h. heerscappende heere

24

Want ic sal v wech halen vanden heidenen, ende vergaderen v van allen landen, ende ic sal v leyd in v lant.

25

⁺Ende ic sal op wtstorten claer water, ende ghi sult gesuyuert worden van alle uwe smetten, Ende van allen uwen afgoden sal ic v reynigen.

+ F

26

☞ Ende ic sal v geuen een nieu herte, ende ic sal eenen nieuwen gheest setten in dmidden van v, Ende ic sal dat steenachtige herte van uwen vleesch nemen, ende ic sal v een vleesachtich herte geuen.

27

Ende ic sal minen geest setten int midden van v luiden, Ende ic sal doen, dat ghi in mijn ^* geboden) wandelen sult, ende dat ghi mijn oordeel bewaren sult, ende die doen,

* theb. zeden

28

Ende ghi sult woonen int lant, dat ic uwen vaders gaf, ende ghi sult mi zijn tot een volc, ende ic sal v tot een God zijn.

29

Ende ic sal v gesont maken van allen uwen besmetheden, ende ic sal de tarwe roepen, ende ic salt vermenichfuldigen, ende ic en sal in v den honger niet setten.

30

Ende ic sal vermenichfuldigen de vruchten des houts, ende dat groeysel des ackers, op dat ghi, onder den heydenen voortmeer niet dragen en sult, den lachter des hongers.

31

Ende ghi sult gedencken uwer zeer quader wegen, ende uwer naersticheden die niet goet en zijn, ende uwe ^* boosheden) ende sonden sullen v mishagen,

* h. misdaden

32

⁺Om uwen wille en sal ics niet doen, seit die ^* HERE God), dat si v bekent, Wort beschaemt, ende schaemt v van uwen wegen, huis van Israel.

+ G

* h. heerscappende heere

33

Dit seit die ^* HERE God) Inden dage dat ic v suyueren sal van allen uwen ^* boosheden,) sal ick doen, datmen inden steden woonen sal, ende als ick vermaect sal hebben, dat veruallen is,

* h. heerscappende heere

* h. misdaden

34

ende als twoeste lant sal wesen gheackert, dat wilen woest wast, voor elcs gangers oogen,

35

Dan sullen si seggen, Dat ongeackerde lant is geworden als eenen hof ^* der weeldicheyt) ende die woeste steenen die verdoruen ende omgeworpen zijn, zijn bemuert, ende wel beset.

* theb. Eden

36

Ende die heydenen die ouergelaten, sullen zijn al om van v, sullen weten, dat ic die HERE, heb die verdoruen steden gesticht, ende dat ic geplant heb, dat ongeackert was, Ic de HERE hebt gesproken, ende hebt gedaen.

37

Dit seyt die ^* HEERE God) Noch hier in sal mi vinden thuis

* h. heerscappende heere

[p. S1v]

van Israel, dat ic hen doen sal, Ic salse vermenichfuldigen, als een kudde der menschen,

38

als een heylige kudde, als die kudden van Ierusalem op haer feestdagen, Aldus sullen die woeste steden vol zijn van kudden der menschen, ende si sullen weten, dat ick die HEERE ben.

§ Van die gemeyne verrisenisse, Van Christo ende dat inden laetsten daghen Iuda ende Ierusalem hem ontfangen sal ende dattet een volck wesen sal.