De Vorsterman Bijbel

§ Dac .xxxij. Capittel.

1

⁺IN dat .xij. iaer, in die .xij. maent, in ^* eenen) dach vander maent, so geschiede dat woort des HEEREN tot mi, segghende,

+ A

* h. den eersten

2

Des menschen sone, neemt een gheween op Pharaonem den coninck van Egipten, ende ghi sult tot hem segghen, Ghi zijt ghelijck gheworden der heydenen leeuwen, Ende den ^* drake die in die zee is) En ghi waeydet metten hoorne in uwe ryuieren, ende ghi verstoordet die wateren met uwen voeten, ende ghi vertraet haer ryuieren.

* h. meerdrake

3

Hier om seyt dit die ^* HERE God). Ick sal op v wtspreyden mijn nette door eenen grooten hoop volcs, ende ick sal v wt trecken in mijn nette,

* h. heerscappende here

4

ende ic sal v wech worpen op die aerde. Ic sal v ^* wech worpen) op dat aensicht vanden ackere, ende ic sal op v doen woonen al die vogelen des hemels, ende ic sal van v verzaden die beesten van al den lande

* th. laten ligghen,

5

⁺Ende ic sal v vleesch geuen op die bergen, ende ic sal die hueuelen veruullen met uwen ettere.

+ B

6

Ende ic sal dat lant ^* veruerscen op die bergen met den stanc van uwen bloede) ende die dalen sullen veruult worden van v.

* h. daer ghi ingeswommen hebt, sal ic met uwen bloede veruerscen tot op die berghen,

7

Ende als ghi wt gedaen sult zijn, sal ic den hemel ouer decken, ende ick sal zijn sterren doen verdonckeren Ic sal die zonne met eender wolcken bedecken

[p. R7r]

ende die Mane en sal haer licht niet geuen.

8

Ic sal alle die lichten des hemels doen op v trueren, ende ic sal donckerheden geuen op v lant, seyt die ^* HERE God), ^* als uwe gequetste sullen vallen int midden der aerden, spreect die HEERE)

* h. heerscappende heere

* ten is niet int hebree.

9

Ende ic sal veel volcs herte ^* verwecken tot gramschappen) als ic uwe verderffenisse gebracht sal hebben, in die heydenen, op die landen, die ghi niet en kent,

* the. becommeren.

10

⁺Ende ic sal veel volcs op v doen verwonderen, Ende haer coningen sullen met grooter vreesen op v ontsien, om alle die groote boosheden die ghi gedaen hebt, Als mijn swaert sal beginnen te vliegen op haer aensichten, ende yegelijc sal haestelijc verwonderen, elc om zijn ziele, inden dage ws vallens,

+ C

11

Want dit seit die ^* HEERE God), Des conincs van Babilonien swaert sal v comen,

* h. heerscappende HERE

12

met starcker luyden swaerden sal ic uwe menichte neder doen vallen, Alle dese heydenen zijn onwinlijc, ende si sullen verwoesten die hoouaerdie van Egipten, ende haer menichte sal worden gescheyden.

13

Ende ic sal alle haer beesten vernielen, die op veel wateren waren, ende des menschen voet en sal voortmeer die wateren niet verstooren, noch die clauwen vanden paerden en sullen die wateren niet verstooren.

14

Dan sal ic haer wateren dalderclaerste maken, ende ic sal haer riuieren toebrengen als olie, seyt die ^* HEERE God)

* h. heerscappende heere

15

Als ic dat lant van Egipten woest sal hebben gegeuen Want dat lant sal verlaten worden van haerder volheyt, als ic sal hebben geslegen alle dinwoonders des lants, ende si sullen weten, dat ic die HEERE ben.

16

^* Hi is beweent) ende der heydenen dochteren sullen hem beweenen op Egipten ende op haer menichte sullen si hem beweenen, seyt die ^* HEERE God.)

* the. O hoe beclagelijc salt worden

* h. heerscappende heere

17

⁺Ende tgeschiede in dat twaelfste iaer inden vijftienden dach vander maent, dat des HEREN woort gheschiede tot mi, segghende,

+ D

18

Des menschen sone singt eenen droeuen sanc op die menichte van Egipten, ende trectse neder haer, ende der vromer heydenen dochteren ten wtersten lande, metten ghenen die nedergaen in den put

19

^* Hoe dat ghi schoonder zijt?) Gaet nederwaert, ende slaept metten onbesnedenen.

* th. hoe sidy nv so schoon

20

In die middewaert vanden verslagenen sullen si metten swaerde vallen, Tswaert is gegeuen ^* ende si hebben haer aengetrocken ende alle zijn volck.)

* h. datmense nv daertoe voort trecken sal, dat lant ende die luyden.

21

Die aldermachtichste vanden starcken mannen, sullense aenspreken vant midden der hellen, die met zijn hulpers nedergegaen zijn, ende metten onbesnedenen hebben geslapen, ende verslagen zijn metten swaerde.

22

⁺Daer is Assur ende alle zijn menichte, ende rontsom hem zijn haer grauen, die alle zijn verslagen, ende die geuallen [kolom] zijn metten swaerde,

+ E

23

welcker grauen gegeuen zijn int laetste vanden putte, Ende zijn menichte is gedaen rontsom inden omganc zijns graefs, alle die verslagen zijn, ende geuallen metten swaerde, Die hier voorijts, haer vreese, hadden bracht in der leuender landt.

24

☞ Daer is Elam, ende alle zijn menichte rontsomme zijn graf.

⁺ Alle dese zijn verslagen ende vallende metten swaerde, die onbesneden neder gegaen zijn ^* totten wtersten lande) Die haer vreese leyden inder leuender lant, Ende droegen haeren lachter metten ghenen die nedergegaen waren inden putte.

+ F

* the. onder die aerden

25

Si hebben haer bedde geleyt in die middewaert vanden verslagenen in alle zijn volc, alomme hem is zijn graf, Alle dese zijn onbesneden ende verslagen metten swaerde, ☞ Want si gauen haer vreese inder leuender lant, ende droegen haeren lachter metten genen die nedergaen inden putte, Si zijn geset in de middewaert vanden verslagenen,

26

Daer is ^* Mosoch) ende Tubal ende alle zijn menichte, alom hem zijn sine grauen, Alle dese zijn onbesneden ende verslagen ende vallende metten swaerde, Want si haer vreese brachten inder leuender lant,

* h. Mesech

27

Ende si en sullen niet slapen metten starcken, ende die vallen ende metten onbesnedenen, die nedergedaelt zijn ter hellen, met haeren wapenen, Ende si hebben haer swaerden onder haer hoofden geleyt, ende haer boosheden waren in haer beenen, Want si zijn der starker vreese geworden inder leuender lant.

28

⁺Ende hierom suldy in die middewaert vanden onbesnedenen worden vertreden, ende ghi sult slapen metten ghenen die verslagen zijn metten swaerde.

+ G

29

Daer is Idumeen, ende haer coningen alle haer leytsmannen, die gegeuen zijn met haeren heyre metten verslagenen des swaerts, ende die metten onbesnedenen sliepen, ende met dien die inden put nedergegaen zijn.

30

Daer zijn alle die princen vant noorden, ende alle die ^* iagers) die geleit zijn metten verslagenen ^* hen ontsiende, ende beschaemt in haer starcheit, Die onbesnedene sliepen) metten verslagenen des swaerts, ende si droegen haer scande met dien die inden put nedergingen.

* th. Zidoniten Genesis .x

* th. om datmen somtijts voor haer ghewelt vreesen moeste maer nv zijn si besehaemt ende liggen bi donbesnedene

31

Pharao sachse, ende hi wert vertroostet van alle zijnder menichten, Die verslagen was metten swaerde Pharao ende alle zijn heyr seit die ^* HERE God)

* h. heerscappende here

32

Want ^* hi gaf zijn) vreese inder leuender lant, ende hi sliep in de middewaert vanden onbesnedenen, die metten swaerde verslagen zijn Pharao ende alle zijn menichte, seyt die ^* HEERE God.)

* the. ic ghaf mijn

* h. heerscappende here

§ Vanden wachtere die metter trompette blies, dat si bekeeren souden, ende dat een yegelijc gheoordeelt sal worden, int ghene daer hi in geuonden sal worden, Ende dat God des sondaers doot niet en begeert Ende van de ghene die dwoort tot een liedt ende ghiericheyt keerden.