De Vorsterman Bijbel

§ Dat .xxvij. Capittel.

1

⁺DEs HEREN woort geschiede tot mi seggende.

+ A

2

Hier om ghi des menschen sone, neemt aen v gheween op ^* Tyrum)

* thebr. Zor

3

ende ghi sult ^* Tyro) seggen, die daer leet aen die hauene der zee, ende der comenscap vanden volcke tot veel eylanden. Dit seyt die ^* HEERE God) O ^* Tyre) ghi hebt geseyt, Ic ben vol van volmaecter scoonheyt,

* thebr. Zor

* h. heerscappende here

* thebr. Zor

4

ende gheset int herte der zee. Vwe naesten, die v stichten, veruulden uwe scoonheyt,

5

si stichten v van Abeelboomen houte van Sanir, met al den gescutsele berderen vander zee. Si brachten den Cederboom van Libano, om v eenen mast te maken

6

Si scaefden die eycken van Basan tot uwen roey riemen, Die plancken daer die roeyers op sitten, maecten si van ^* Iuore van Indien) ende den roef des scips vanden eylanden van ^* Italien)

* th. Yuoren been

* h. Cithijm

7

Versceyden ghemengde syde van Egypten was v gheweuen tot eenen zeyle, datmen hangen soude aenden mast, Hiacinct ende purpure vanden eylanden van Elisa, waren ghemaect tot uwen ouerdecsele.

8

⁺V roeyers waren die ghene die tot Sidon ende tot ^* Aradien) woonden. ^* Tyre) v wijse luyden zijn geworden v stiermannen.

+ B

* the. Auad

* the. Zor.

9

Die ouders van ^* Biblien) ende die wijse luyden hadden scipluyden totten dienste van uwen menigerhanden huysraet, Alle die scepen vander zee, ende haer scipluyden waren in dat volck van uwer comanscap.

* the. Gebal

10

Die van Perssen, ende die van Lidien, ende van Libien waren in uwer scaren, die mannen, v crijschluyden hingen in v om te vercieren, den schilt ende den helm.

11

Die kinderen van ^* Aradien) waren met uwen scaren op die mueren int ronde om v, Maer ende oock die ^* van Pigmea) (die op uwen torrens waren) hinghen haer cokers aen v mueren rontsom, si volmaecten v schoonheyt.

* th. Aruad

* th. dwergen § Sommige lesen die duyckelaers, dat waren, diegene, die om danckers te lossen inde zee duycten.

12

Die van ^* Carthagien) waren v coopluyden, Vander menichten alder rijcheden, van siluer, van tenne, van yser, van loode veruulden si v iaermarcten.

* h. Tharsis

13

Grieckenlant ende Tubal, ende ^* Mosoch) waren v coopluyden. ⁺ Si brachten uwen volcke, gheuangen dienstluyden, ende coperen vaten

* h. Mesech

+ C

14

van Thogorma huyse. Si brachten tot uwer marct paerden, ende rosvolck, ende muylen.

15

Die kinderen van Dedan waren v coopluyden. Veel eylanden waren die coomenscap uwer hant Iuoren tanden, ende ^* Hebenen hout ver-[kolom]wisselden si in uwen prijse)

* th. pauwen voor een ghescenck.

16

Die man van Syrien, was v coopman, Om die menichte van uwe wercken, leyden si v in comenscap voort ^* edel gesteente) purpuren, ende siluer vergulden halsbanden, ende syde, ende flueel, christael, ende roode syde.

* the. smargden.

17

Iuda, ende dat lant van Israel, die zijn v coopmannen met die beste tarwe Si leyden voort in v iaermarcten Balsem, ende honich, ende olie, ende rosine.

18

Die man van Damasco, was v coopman, in die menichte van uwe wercken, in die menichte van menigerhande rijcdommen met vetten wijne, met wollen vander alder bester verwen.

19

⁺Dan ende Grieckenlant ende Mozel, setteden voort in v iaermarcten, ghesmeet yser werck, Scachten ende riet in uwer comenscapen.

+ D

20

Van Dedan waren v coopluyden, met Tapiten om daer op te sitten

21

Arabien ende al die princen van Cedar, waren die coopluyden uwer hant, met lammeren, ende met rammen, ende met bocken, quamen v coopluyden.

22

Die vercoopers van Saba ende Rema, waren v coopluyden, met al wtuercoren specien, ende met costelijcken steenen, ende met goude, dat si voort setteden in v comenscap.

23

Aran ende Chenne, ende Eden v coopluyden, Saba, Assur, ende Chelmath v vercoopers,

24

Si, v coopluyden met haer comenscapen, met menigerley vogelwerc, Hiacincten ende lakenen van versceyden verwen, costelijcke scatten, die om ghewonden, ende gebonden waren met coorden, ende oock mede Cederboomen hadden si in uwe comenscapen

25

^* Ende v princen hadden scepen der zee in v comenschap) ende ghi zijt veruult, ende zeer gheeert int herte der zee.

* the. die scepen van Tharsis waren die vermaerde onder uwe hantieringhe

26

V roeyers voerden v op veel wateren, Die ^* zuyden) wint heeft v ghebroken in dat herte vander zee

* the. oosten

27

zijn v rijcheden, ende v scatten, ende v menigherhande instrument, ⁺ V scipluyden ende v stiermannen, die uwen huysraet hielden, ende die bouen v volck waren, ende die mannen uwe crijschluyden, die daer waren in v, met al uwer menichten, die int midden van v is ^* sullen vallen) in dat herte vander zee, inden dach ws vallens.

+ E

* th. zijn gheuallen.

28

Vanden gheluyde des roepens uwer stiermannen sullen die vergaderingen der scepen verstoort worden.

29

Ende alle die ghene die den roeyriem hielden, sullen neder gaen wten scepen, Die scipluyden ende alle die stiermannen vander zee, sullen op dat lant staen,

30

ende sullen op v weenen met grooter stemmen, ende si sullen bitterlijck roepende screyen. Ende si sullen stof op haer hoofden worpen, ende si sullen met asscen bestroeyt worden,

31

ende si sullen om uwent wille sceeren caluheyt, ende si sullen omgort

[p. R5r]

worden met ^* hayren cleederen.)

* the. sacken

32

Ende si sullen v beweenen inder zielen bitterheyt metten alder bittersten geween, ende ^* si) sullen aennemen op v eenen droeuen sanck, ende v beweenen Welcke is als ^* Tyrus) die stom geworden is int midden der zee?

* h. haer kinderen

* thebr. Zor

33

Die in die wtuoeringhe van uwe comanschapen vander zee, veruult hebt veel volcs, Met die menichte van uwe rijcdommen, ende ^* uwen volcke) hebt ghi rijck gemaect, die coningen vander aerden.

* th. comanschap

34

Nv sidy veetreden inder zee, in die diepten vanden wateren uwe rijcdommen, Ende alle v menichte die int midden van v was, is gheuallen.

35

Alle die ghene die inden eylanden woonden verwonderden op v, Ende alle haer coninghen ^* met onweder gheslaghen, verwandelden haer aensichten.)

* the. grouwelt zeere ende gebaren qualijck

36

Die coopluyden vanden volcke bespotteden, blasende op v, Ghi zijt te niete ghecomen, ende ghi en sult neet zijn tot inder eewicheyt.

§ Dwoort Gods tegen den prince van Tyro, teghen zijn hoouaerdicheyt. Ende tegen Sidonen, want inden val hadden si die kinderen van Israel verdruct. Ende die belofte, van Israel weder te vergaderen.