De Vorsterman Bijbel

§ Dat .xviij. Capittel.

1

⁺ENde des HEEREN woort geschiede tot mi, segghende,

+ A

2

Wat ist, dat ghi onder v, die ghelijckenisse int lant van Israel keert, in dese segsprake? ende segt, De vaders aten een soere wijndruyue, ende haerder kinderen tanden zijn boomich

3

^* Ic leue, seyt die HERE God,) Oft v voortmeer dese ghelijckenisse sal zijn in Israel, tot een segwoort,

* h. so waer als ic leue seit de heerscappende HEERE

4

Siet [kolom] alle zielen zijn mijne, alsoo des vaders ziele, also is oock des kints ziele mijne, ☞ Die ziele die sondicht, die sal steruen.

5

⁺Ende ist dat eeen man rechtueerdich is, ende doet hi ^* oordeel ende gerechticheyt)

+ B

* thebre. dat recht ende behoorlijc is

6

En eet hi op de bergen niet, Ende en heft hi zijn oogen niet op totten afgoden waert des huys van Israel, Ende en ⁺ vercracht) hi zijns naesten huysfrouwe niet, Ende en gaet hi niet totten wiue die haer maent suyueringe heeft,

+ th. ontreynicht,

7

Ende en bedroeft hi den mensche niet, Ende gheeft hi zijn schuldenaren sinen pant weder, Ende en rooft hi met crachte niet, Ende geeft hi zijn broot den hongerigen, ende cleet hi den naecten met eenen cleedt,

8

Ende en leent hi niet, om woecker, Ende en nemet hi niet meer weder dan hi en leende, Ende keert hi zijn hant van ^* boosheden) Ende doet hi gerechtich oordeel tusschen den man ende den man

* theb. onbehoorlicheit

9

Ende wandelt hi in mijn ^* geboden) ende bewaert hi mijn oordeel, ⁺ op dat hi die waerheyt doet Dese is rechtuaerdich, Hi sal dat leuen leuen seyt die ^* HERE God)

* theb. zeden

+ C

* tg. die heerscappende

10

Ist dat hi wint eenen sone eenen moordenaer, die bloet wtstort, ende doet hi een van desen dingen,

11

Ende dat hi al dese dinghen niet en doet, Maer dat hi op die bergen eet, ende dat hi zijns naesten wijf besmet,

12

Ende bedroeft den behoeftigen ende den armen, Ende dat hi roouen rooft, Ende den pant niet weder en geeft, Ende dat hi zijn oogen opheft totten afgoden, Ende onmenschelijcke afgrijselicheyt doet,

13

⁺ende gheeft hi wt tot woeckere, ende ontfanct hi meer weder, Sal hi ooc leuen? Hi en sal niet leuen, als hi alle dese versmadelijcke dinghen gedaen heeft, hi sal die doot steruen, Sijn bloet sal op hem zijn.

+ D

14

Ist dat hi eenen sone gewonnen heeft, die aensiende alle zijns vaders sonden die hi gedaen heeft, vreest, ende en doet hi niet die des gelijck zijn,

15

Ende en eet niet op die bergen, Ende zijn oogen niet op en heft totten afgoden des huys van Israel, Ende zijns naestens wijf niet en ontreynicht,

16

Ende eenen man niet en bedroeft, Ende den pant niet en hout Ende gheenen roof en rooft, ende den hongerigen zijn broot geeft, ende den naecten cleedt met eenen cleede,

17

Ende hi zijn hant aftrect van eens armens menschen onrecht, Ende hi die woeker ende meer dan hi leende niet en ontfanct, Ende mijn oordeelen doet, ende hi in mijn ^* geboden) wandelt, Dese en sal niet steruen in zijns vaders ^* boosheyt,) maer hi sal dat leuen leuen.

* theb. zeden

* th. misdaet

18

Sijn vader, om dat hi ouerdaet dede, ende ghewelt dede sinen broedere, ⁺, ende quaet ghedaen heeft onder dat middel van sinen volcke, siet, hi sal steruen in zijn ^* boosheyt,)

+ E

* h. misdaet

19

Ende ghi segt, ⁺ Waerom en sal die sone niet dragen zijns vaders ^* boosheyt?) Dat, is, om dat

+ deu. xxxiiij iiij.re. iiij. ij.par. xxv

* h. misdaet

[p. Q8r]

die sone oordeel ende rechtuaerdicheyt heeft gedaen, hi heeft bewaert alle mijn ^* geboden,) ende hi heeftse ghedaen, hi sal dat leuen leuen,

* theb. zeden

20

Die siele die sondicht, die sal steruen, Ende die sone en sal des vaders ^* boosheyt) niet dragen, ende die vader en sal zijns soons ^* boosheyt) niet dragen. Des rechtuaerdigen rechtuaerdicheit sal op hem zijn, ende die boosheyt des ongoddeliken sal op hem zijn. ☜

* h. misdaet

* h. misdaet

21

Ende ist dat die ongoddelijcke ^* berou bewijst) van alle zijn sonden die hi gedaen heeft, ende hout alle mijn ^* geboden) ende doet oordeel ende rechtuaerdicheyt, ⁺ so sal hi dat leuen leuen ende niet steruen,

* th. bekeert

* theb. zeden

+ F

22

Alle zijn boosheden die hi ghedaen heeft ^* en sal ic niet ghedencken) Hi sal leuen in zijn rechtuaerdicheit die hi gedaen heeft.

* theb. en salmen hem niet gedencken

23

Ist yet mijns wille des ongoddelijken doot? seyt die ⁺ HEERE God) ☞ ende dat hi niet bekeert en worde van zijn wegen ende leue? ☜

+ theb. heerscappende HERE

24

Maer ist dat hem die rechtuaerdige mensche afkeert van zijnder rechtuaerdicheyt, ende doet hi boosheyt na alle dye afgrijselicheden, die een ongoddelike pleech te doen, sal hi leuen? Alle zijn rechtuaerdicheden die hi gedaen heeft, en salmen niet gedencken Inder ouertredinge, daer hi inne ouer ghetreden is, ende in zijn sonden die hi gesondicht heeft, daer in sal hi steruen.

25

Ende ghi hebt geseyt, Des HEEREN wech en is niet rechtuaerdich, Hoort daerom ghi huys van Israel En is minen wech niet rechtuaerdich? ende en zijn uwe wegen niet veel meer quaet?

26

⁺Want als hem een rechtuaerdich mensche afkeert van zijnder rechtuaerdicheyt, ende hi boosheyt doet so sal hi in die boosheyt steruen, In die ongerechticheyt die hi gedaen heeft, sal hi steruen

+ G

27

Ende als hem een ongoddelijke afkeert van zijnder boosheyt, die hi ghedaen heeft, ende hi doet oordeel ende rechtuaerdicheyt, soo sal hi zijn siele leuende maken.

28

Want merkende, ende hemseluen afkeerende van alle zijn boosheden die hi ghedaen heeft, sal hi dat leuen leuen, ende hi en sal niet steruen.

29

Ende ^* die kinderen van Israel seggen,) Des HEREN wech en is niet rechtuaerdich, En zijn mijn wegen niet rechtuaerdich, o huys van Israel, ende en zijn uwe wegen niet veel meer quaet?

* h. dat huys van Israel seyt noch

30

Hierom o huys van Israel, sal ic elcken oordeelen na zijn wegen, seyt die ^* HEERE God), ^* Bekeert v ende bewijst berou) van alle uwe boosheden ende die boosheyt en sal v niet sijn tot valle

* h. heerscappende Heere

* th. bekeert v terstont

31

Worpt wech van v alle uwe boosheden, daer ghi in ouer getreden zijt, ☞ Ende maect v een nieuwe herte, ende eenen nieuwen geest, Ende waeromme suldi steruen o huys van Israel?

32

want ick en wil des steruenden doot niet, seyt die ^* HEERE God), Keert weder ende leeft.

[kolom]

* thebr. heescappende Heere

§ Van Ioachim ende Iechonia ende Ioachims sone, ende vanden ouerbleuenen van Iuda, die gheenen Coninck en hebben