De Vorsterman Bijbel

§ Dat .v. Capittel.

1

⁺HEERE ghedenct wat ons geschiet is, aenschout ende besiet onsen lachter.

+ A

2

Onse erffelicheit is gekeert totten vremden, onse huysen totten volcke van buyten.

3

Wi zijn weesen geworden sonder vader, Onse moederen zijn als weduwen,

4

Onse water hebben wi om gelt gedroncken, ende onse houten cochten wi om gelt.

5

Wi werden met onsen necken gedreuen, ende den vermoeyden en gafmen gheen ruste.

6

⁺Wi gauen Egipten die hant, ende den volcken van Assyrien, dat wi van broode verzaedt souden worden.

+ B

7

Onse vaderen sondichden, ende si en zijn niet, ende wi hebben haer ^* boosheden) gedragen.

* th. misdaet.

8

Dienstknechten hebben heerscapie bouen ons, Niemant en wasser die ons verloste van haeren handen.

9

^* In onsen sielen brachten wi broot met ons) vanden aensichte des swaerts inder woestinen.

* th. wi moeten onse spise met vare ons leuens in draghen.

10

Onse vel is verbrant als eenen ouen, vanden aensichte des ^* onweders ende des hongers)

* th. grouweliken hongers

11

Si vernederen die vrouwen in Sion, ende die maechden in die steden van Iuda.

12

⁺Die princen zijn metter hant gehangen, ende der ouder mannan aensichten en achten si niet

+ C

13

^* Si misbruycten onbetamelick die iongelinghen, ende die kinderen vielen door dat hout),

* th. Si deden haer iongelingen de muele malen, ende die kinderen hout sleypen

14

Die oude mannen en sitten niet meer onder dye poorten, ende die iongelingen en songen aenden danse niet,

15

Die blischappen onser herten is ontbroken, onse dansen is verkeert in geween

16

Dye croone ons hoofts is neder gheuallen. Wee ons, want wi hebben gesondicht,

17

Hierom is onse herte bedroeft geworden in smerten. ⁺ Hieromme zijn onse oogen verdonckert

+ D

18

om den berch van Sion, Want hy vergaen is, Die vossen wandelen daer inne.

19

Maer ghi HERE sult inder eewicheyt bliuen, uwen throon van geslachte tot gheslachte,

20

Waeromme sult ghi ons eewelijc vergeten? ende sult ghi ons noch lange dagen verlaten?

21

Bekeert ons HERE tot v ende wi sullen bekeert worden, vernieuwet onse daghen, so si vanden beghinne waren,

22

Maer wech worpende, so hebdy ons versteken, ghi zijt veruaerlijck teghen ons vergramt.

§ Hier eynden Ieremias Claghen.