Logo DBNL
De Vorsterman Bijbel (ca. 1528-1531)

De Vorsterman Bijbel

(ca. 1528-1531)–Anoniem Vorsterman Bijbel–rechtenstatus Auteursrechtvrij

Vorige Volgende

§ Dat .iiij. Capittel

1

Aleph. HOe is tgout so verdonckert ende * die alderbeste verwe is) verandert, + Die steenen der heyliger plaetsen zijn gestroeyt int hooft van allen straten.

2

Beth. Die edel sonen van Sion, ende * die ghecleet zijn metten) besten goude, hoe zijn si gheacht voor aerdene vaten, tot een werc van des potbackers handen.

3

Gimel. Maer ooc die * witte vrouwen) ontdecten hare borsten ende soochden haer ionghen, Die dochter mijns volcs is fel, gelijc den struys inder wildernissen.

4

Daleth. Des suygende kints tonge hinck bouen vast inden hemel des monts van dorste, de cleyne kinderkens eyschten broot, ende nyemant en was diet hen brack.

5

He. Die weeldelic aten, zijn vergaen inden weghen, + die inder * gecruyde sofferaen spijsen) opgeuoet werden, die hebben drec omhelst

6

Vau. Ende die * boosheit) der dochter mijns volcs is meerder geworden dan die sonde van Sodoma, die omgeworpen wert in een oogenblic, ende gheen handen en heeftmen aen haer gheleyt.

7

Zain Haer * geheylichde mannen) zijn blinckender dan sneeu, ende claerder schinende dan melc, rootachtigher dan * out yuoren) schoonder dan Saphirus.

8

Heth. Haer aensicht is swerter geworden dan colen ende si en zijn nyet bekent inder straten, haer huyt cleefde aen haer beenen, het verdroochde, ende is geworden gelijc hout.

9

Theth Beter wast den ghenen die metten swaerde verslaghen waren, + dan die gedoot waren metten honger, want dese vermagherden, si werden verteert van die onuruchtbaerheyt der aerden.

10

Iod. Die handen der bermhertiger vrouwen hebben haers selfs sonen gecooct, ende die zijn hare spijse geworden, in die instucken wriuinghe der dochteren mijns volcs.

11

Caf. Die HEERE heeft sinen toren volbracht, [kolom] hi heeft wtghestort die gramscap zijnder toornicheyt. Ende hi heeft in Syon een vier ontsteken, ende het heeft haer fundamenten verslonden.

12

+Lamech. Die coninghen der aerden, ende alle dye in die werelt woonden, en geloofden nyet, dat die viant ingaen soude door dye poorten van Ierusalem.

13

Mem. Om dye sonden haerder propheten, ende om die * boosheyt) van haren priesteren, die int midden van hen wtghestort hebben der rechtuerdigher bloet.

14

Nun. Die blinden hebben gedwaelt inden straten si zijn besmet vanden bloede.

* Ende als si daer niet in en mochten gaen, soo hielden si haer slippen)

15

Samech. Gaet wech ghi besmette, riepen si tot hen gaet wech, gaet van hier, ende en willes niet aentasten * Want si hebben gekeuen, ende zijn beroert, ende si seyden onder die heydenen, men sal hier niet meer toedoen, dat hi onder hen woonen sal)

16

Phe. Des HEREN aensicht heeftse gescheyden, hi en salse nymmermeer meer aensien.

Si en hebben niet ontsien der priesteren aensichten, noch si en ontfermden der ouder lieden niet.

17

Ain. Als wi noch bleuen staende, soo gebraken ons onse oogen, tot onser ydelder hulpen, als wi naerstelic sagen totten volcke, dat ons niet behouden en mochte.

18

+Sadick Si hebben onse voeten slibberich gemaect inden wech van onsen straten, Onse eynde is ghenaect, onse dagen zijn voleyndt, want onse eynde is gecomen.

19

Cuph. Onse veruolgers waren snelder dan die aernen des hemels, si veruolchden ons tot op die berghen, inder wildernissen leyden si ons laghen.

20

Res. * Die geest ons monts, Christus dye HERE is geuangen in onsen sonden) tot welcke wi seyden, wi sullen in v scaduwen leuen inden heydenen.

21

Sin. Verblijt ende verhuecht v o dochter van Edom, die daer woont int lant van Hus, Tot v sal oec comen den kelck, ghi sult droncken ende naect gemaect worden.

22

Thau O dochter van Sion, v * boosheyt) is veruult hi en salder niet meer toe doen, dat hi v wech voeren sal, O dochter van Edom, hi sal uwe boosheyt versoecken, hi sal uwe sonden ontdecken.

§ Hier na volcht Ieremias ghebet.

§ Ieremias ghebet.


Vorige Volgende