De Vorsterman Bijbel

§ Dat .iij. Capittel.

1

⁺Aleph. IC ben een man siende mijn armoede, van die roede zijnder gramscap.

+ A

2

Aleph. Hi heeft mi gedreuen ende gebracht in donckerheden, ende niet int licht.

3

Aleph. Alleen heeft hi tegen mi gekeert, ende hi heeft al den dach zijn hant omgekeert.

4

Aleph. Hi heeft mijn vel out gemaect, ende mijn vleesch, hy heeft mijn ghebeenten ghebroken.

5

Beth. Hy heeft al omme my vertimmert, ende hy heeft mi omset met ghallen, ende met arbeyde.

6

Beth. In donckerheden heeft hi my gheset, als eewighe dooden.

7

Gimel. Hi heeft teghen mi al omme gesticht dat ic niet wtghaen en sal, hy heeft mijn boeyen verswaert.

8

⁺Gimel. Maer ooc als ic roepe, ende als ick bidde, so heeft hi mijn gebet wtgesloten.

+ B

9

Gimel

[p. P4r]

Hi heeft minen wech besloten met viercante steenen, hi heeft mijn byweghen ^* om gekeert)

* th. gecromt

10

Daleth Eenen beyr laghen legghende is hi mi geworden, ende een leeuw int verborgen.

11

Daleth Hi heeft mijn byweghen omgekeert, ende hi heeft mi ghebroken, ende hy heeft mi verlaten ghesedt.

12

Daleth Hi heeft sinen boghe ghespannen, ende hy heuet mi ghesedt ghelijc een teeken, om na te schieten.

13

He Hi heeft in mine nieren gescoten die ^* dochteren) zijnder pijlkokeren.

* the. sonen § Des kokers sonen, zijn die pijlen, dye daer in steken

14

He Ic ben gheworden tot spotte alle mijnen volcke, ende alle den dach hare liedeken.

15

He Hi heeft mi veruult met bitterheden, hi heuet mi droncken gemaect van alsene.

16

Vau Hi heeft bi getale mijn tanden gebroken, hi heeft mi met asschen ghespijst.

17

Vau Ende mijn siele is ^*) verstooten, ic hebbe vergheten der goeden.

* th. vanden vrede.

18

Vau Ende ic seyde, mijn ^* eynde) ende mijn hope is verloren voor den HEERE.

* th. verwinninge.

19

Zai Ghedenct mijnre armoeden ende mijns ouergangenissen der alsenen ende der gallen.

20

Zai ^* Metter gedachten so sal ic gedencken, ende) mijn siele sal in mi verdwinen.

* th. weest doch wel gedachtich dat mijn leuen wech sinct.

21

Zai Dit gedenckende in mijn herte, daer om sal ic hopen in Gode.

22

Heth Des HEEREN ontfermherticheyt ist, dat wi niet te niete en zijn, want sine ontfermherticheden en hebben niet gebroken.

23

Heth Ic weet vroech in die dagheraet dat v ^* gelooue) veel is.

* th. trouwe.

24

⁺Heth Mijn deel is die HEERE, seyde mijn siele, hier omme sal ic hem verbeyden

+ D

25

Thet Die HEERE is goet den ghenen die op hem hopen, der sielen die hem soect.

26

Thet Het is goet te verbeyden met gheswijge des HEEREN salicheyt.

27

Thet Het is eenen man goet als hi des HEREN iock draecht van zijnre ioncheyt.

28

Iod Dat hy alleen sitte ende swijghe, wandt hy heeft hem seluen verheuen bouen hem seluen.

29

Iod Hy sal sinen mont leggen int stof, ofter by auontueren hope si.

30

Iod Hi sal den ghenen die hem slaet zijn wangen geuen, met lachteren sal hi versaet worden.

31

Caph Want die HEERE en sal inder eewicheyt niet verstooten.

32

Caph ^* Om dat hi hem seluen wech geworpen heeft, so sal hi ontfermen) nae die menichfuldiheyt zijnre ontfermherticheyt.

* th. maer hy en verootmoedighet maer, ende ontfermet dan weder

33

Caph Want hi en heeft nyet verootmoedicht wt zijnre herten, ende die kinderen der menschen [kolom] verworpen.

34

Lamech. ^* Om dat hi) onder sine voeten vertreden soude alle die geuangenen der aerden.

* th. als of hi

35

Lamech. Om dat hy des mans ordeel neder buygen soude in des alderhoochsten aensichte.

36

Lamech. ^* Op dat hy den mensche verkeeren soude in sinen ordeele, dat en wiste die here niet)

* th. Oft al wilde hi eenen mensche in sinen rechte verordeelen laten, dattet die here niet en wiste

37

Mem Wie is dese die seyde, datment doen soude alst die Here niet en beual.

38

Mem Ende dat wt des HEREN alre hoochsten mont niet en comen, noch goede noch quade.

39

Mem. ^* Wat murmureerde een leuende mensche, een man voor sine sonden.)

* the. waer om sal dan alleene een leuende mensce hem mede becommeren tegen zijn sonden

40

Nun Laet ons onse wegen ondersoecken, ende laet ons soecken, ende laet ons weder bekeeren totten HEERE.

41

Nun Laet ons onse herten opheffen met onse handen tot Gode waert inden hemel.

42

⁺Nun Wi hebben onrechtuaerdelic ghedaen, ende hebben v tot gramscap verwect, hier om en sidi niet te verbiddene.

+ E

43

Samech Ghi hebt ons met gramscappen ouerdect, ende ^* geslaghen) ende doot gheslaghen, ende niet gespaert.

* th veruolghet.

44

Samech Ghi hebt tegen v een wolcke gesedt, dat dat gebedt niet en mach doorgaen.

45

Samech. Ghi hebt mi geset een ontwortelinghe ende afworpinghe int midden vanden volcke.

46

Phe. Sij hebben haren mont op ons opgesperret alle die vianden.

47

Phe. ^* Propheteringhe) is ons lieden geworden, ende anxt, ende stricken, ende verdruckinge.

* th. verwoestinge

48

Phe Mijn ooge heeft wtghebracht scheydinge der wateren ^* in die intwee breekinge) der dochteren mijns volcs

* th. om der scaden wille

49

Ain Mijn ooge is gequelt, ende en sweech nyet om datter gheen ruste en was

50

⁺Ain Totter tijt toe, dat die HERE vanden hemelen dat mercte ende aensach.

+ F

51

Ain Mijn ooge ^* heeft mijn siele berooft, in) allen den dochteren van mijnder stadt.

* th. is onghemotich worden teghen

52

Sadech Mijn vianden hebben my sonder sake beuaen met iachte, gelijc eenen vogel.

53

Sadech Mijn leuen is geuallen in eenen put, ende si leyden op mi eenen steen.

54

Sadech Die wateren liepen bouen mijn hooft, ic seyde, ic ben bedoruen.

55

Cuph Ic aenriep uwen naem, HERE, vanden wtersten putte.

56

Cuph Ghi hebt gehoort mijn stemme, en keert v oore niet af van minen suchten, ende van minen roepen.

57

Cuph Ghi quaemt bi mi inden daghe doen ic v aenriep, ghy seyt, en vreest niet.

58

⁺Res. HEERE ghi hebt mi geoordeelt, die sake mijnre sielen, verlosser mijns leuens.

+ G

59

Res HEERE ghi hebt haer boosheyt ghesien teghen mi, oordeelt mijn oordeel

60

Res Ghi gebt gesien alle haren toorn, alle haer gedachten teghen mi.

[p. P4v]

61

Sin. Ghi hebt gehoort haren lachter HERE, al haer gedachten tegen mi.

62

Sin Die lippen der ghenen die tegen mi opstaen, ende dye gedachten haerder herten teghen my alle den dach.

63

Samech. Haer sitten ende haer opstaen aensiet, ic ben haren ^* Psalm)

* the. liedeken

64

Thau. HEERE verghelt hen haren loon na die wercken van haren handen.

65

Thau. Ghi sult hen geuen ^* den schilt des herten, dinen arbeyt)

* the. uwen vloeck dat hen therte breken mochte.

66

Thau. Ghi sult hen veruolgen in uwen toren, ende vertredense onder die hemelen.