De Vorsterman Bijbel

[kolom]

§ Hier begint Ieremias beclaginge.

§ Hoe Ieremias beclaechde ende beweende die verwoestinge der stat van Ierusalem, ende des tempels verwoestinghe, Ende hoe hi noch meer menschen tot medelijden beweghet Ende hoe hi bekende die rechtuaerdicheit Gods, Ende onder zijn lijden dat lijden Christi propheteerde.

§ Dat eerste Capittel.

1

^+* ENde het is gesciet, na dat Israel in die geuangenisse gheuoert was, ende Ierusalem verwoest was dat Ieremias die propheet sadt weenende, ende met desen beween beweende hi in Ierusalem, ende met bitteren moet versuchtende ende screyende heeft hi geseyt).

Aleph Hoe sittet alleene die stat vol volcs? Hoe is die vrouwe vanden heydenen geworden gelijc een weduwe, ende die princersse der prouincien, hoe is si geworden ondertribuyt?

+ A

* ten is nyet int hebre

2

Beth Weende weende si inden nacht, ende haer tranen zijn aen haer wangen, Niemant en is diese vertroost van haeren lieuen vrienden, Alle haer vrienden hebbense versmaet, ende zijn haere vianden gheworden.

3

Gimel. Iuda is ouer geuaren om dat verdriet, ende om die menichte vanden dienst. Hi woonde onder die heydenen, ende en vant geen ruste, Alle haer veruolgers hebbense gegrepen inden anxt.

4

Daleth. Die wegen van Sion weenen, om datter niemant en is die ter feesten coemt. Alle haer poorten zijn verdoruen, haer priesteren versuchten, ⁺ Haer maechden zijn quelende, ende si is verdruct met bitterheden.

+ B

5

He. Haer vianden zijn gheworden int hooft, ende haer vianden zijn rijck geworden, Want die HERE heeft op haer gesproken, om die menichte haerder hoosheden, Haer cleyne kinderen zijn in die geuangenisse geleyt voor des viants aensichte.

6

Vau. Ende vander dochter van Sion is wech ghegaen al haer scoonheit, Haer princen zijn gheworden gelijc ^* rammen) die geen weyden en vinden, ⁺ ende zijn wech gegaen sonder stercheit voor den ghenen die hen na volchden.

* th. herten

+ C

7

Zai. Ende Ierusalem is ghedachtich gheweest der dagen haerder quellinge, ende der ouer tredinge, ende alle haerder ^* begeerlicheden) die si van ouden dagen gehadt heeft, Als haer volc viel in die viantlike hant, ende geen hulper daer en was, Die vianden saghense, ende si bespotteden haere sabbathen.

* th. vercieringe.

8

Heth. Ierusalem heeft sonde gesondicht, hierom is si ongestadich geworden, Alle diese verhieuen, die hebbense versmaet, want si hebben haer bescaemt gesien, si versuchtede, ende is achter waert gekeert.

9

Theth. Haer vuylheden zijn aen haer voeten, ende

[p. P3r]

si en heeft niet gedacht haers eyndts, Sy is seer anxtelijc af gheset, ende en heeft gheenen vertrooster. HEERE siet mijn quellinghe want mijn viant is opgerecht.

10

Ioth. Die viant stac zijn handt tot allen haeren begeerliken goeden, ⁺ Want si sach, dat die heydenen in gecomen waren in haer heylich huys, daer ghi af beuolen hadt, dat si in v vergaderinge niet comen en souden.

+ D

11

Caph. Alle haer volc is versuchtende, ende soeckende broot, Si gauen alderhande costelike dingen om spijse, om ^* die siele) te vermaken, Besiet HEERE ende merct, ^* want ic snoode geworden ben).

* th. tleuen

* the. dat ic so geheel veracht worde

12

Lamech. O ghi alle die door desen wech wandelt, merct ende siet, oft eenige droefheyt is ghelijc mine droefheit, Want die HERE heeft my afgelesen gelijc een wijndruyue, also hi ^* gesproken) heeft inden daghe der gramschappen zijns toorns.

* th. verdruct

13

⁺Mem. Van bouen heeft hi vier gesonden in mijn gebeenten ^* ende heeft mi onderwesen) Hi heuet een nette wtgespreyt minen voeten, hi heeft mi achterwaert ghekeert, Hi heuet my verwoest gheset alle den dach, met bedroeftheden becommert.

+ E

* th. ende heuet aldaer die ouerhant laeten nemen.

14

Nun. Dat ioc van mijnder boosheden heeft ghewaect in sine hant, si zijn te gader gewonden ende gheleyt op minen hals Mijn cracht is ghecrenct, Die heere heeft mi ghegheuen in dye handt, daer ic niet en sal moghen af opstaen.

15

Samech. Die Heere heeft wtgenomen vanden midden van mi al mijn grootdadige luyden, Hy heeft den tijt tegen mi geroepen, dat hi mijn wtuercoren in stucken wriuen soude, Die HEERE heeft die perse getreden der maget der dochteren van Iuda.

16

Ain. Hierom ben ic weenende, ende mijn ooghe brengt water wt, want dye vertrooster dye mijn siele bekeert, ⁺ is verre van mi geworden Mijn kinderen zijn ^* verloren) geweest, want die viant is te bouen ghegaen.

+ F

* th. bedroeft

17

Phe. Sion stac haer handen wt, ende niemant en is diese vertrooste. Die HEERE heeft beuolen teghen Iacob, rontsomme hem sine vianden, ende Ierusalem is onder hen gheworden, alsoft si besmet ware met der vrouwen siecte.

18

Sadich. Die HERE is rechtuaerdich, want ic heb sinen mont tot gramscap verwect, hoort bidde ic, alle tvolc, ende siet mine bedroefheit, Mijn maechden ende mijn iongelingen zijn wech gegaen in die geuankenisse

19

Cuph. Ic riep mijn vrienden, ende si bedroeghen mi, Mijn priesteren ende mijn oude luyden in die stat [kolom] zijn verteert, Want si sochten spise tot haeren behoef, ⁺ om dat si haere ^* sielen) vermaken souden.

+ G

* th. leuen

20

Res. Siet HERE, want ic worde gequelt, minen buyc is in verdriet, Ende mijn herte is omgekeert in mi seluen, Want ic ben ^* vol van bitterheden) Van buyten ^* verslaet) dat sweert, ende des gelijc die doot is inden huyse.

* the. soo seer weder spannich gheweest.

* the. onterfghenaemt

21

Sin. Si hebben gehoort dat ic versuchte, ende niemant en is die mi vertroost, Alle mijn vianden hebben mijn ^* quaet) gehoort, si zijn verblijt want ghi hebbet gedaen, Ghi hebt toe ghebracht den dach des troostens, ende si sullen mi ghelijc worden.

* th. ongeluc

22

Thau. Laet alle haer quaet voor v comen, ende snijtse af, so ghi mi afgesneden hebt, om alle mijns boosheyts wille, want mijn versuchtingen zijn vele, ende mijn herte is truerende.