De Vorsterman Bijbel

§ Dat .xliij. Capittel.

1

⁺HEt gheschiede doen Ieremias voldaen hadde, sprekende totten volcke al des HEREN woorden haers Godts, daer hem die HERE haer God om ghesonden hadde tot hen, al dese woorden,

+ A

2

So seyde Azarias Iosias sone, ende Iohannan Caree sone, ende alle die hoouaerdige mannen, ende seyden tot Ieremiam, Ghi spreect lueghenen, Dye HEERE onse God en heeft v niet ghesonden, segghende, En gaet niet in Egypten, om daer te woonen

3

Maer Baruch Nereas sone, verwect v teghen ons, om dat hi ons leueren soude inder Caldeeuscer handen, ⁺ ende dat hi ons dooden soude ende dat hi ons soude doen voeren in Babilonien

+ B

[p. O5r]

4

⁺Ende Iohannan Caree sone, ende al die hooftluyden vanden crijsknechten, ende al dat volck en hoorden niet des HEREN stemme, datsi bliuen souden int lant van Iuda.

+ C

5

Maer Iohannan Caree sone, ende die hooftluyden der crijsknechten namen al die ouergebleuene van Iuda, die daer weder gekeert waren van allen heydens daer si te voren waren verstroeyt. Op dat si souden woonen int lant van Iuda,

6

die mannen, ende die vrouwen, ende die cleyne kinderen, ende des conincs dochteren, ende al die sielen die Nabusardan die hooftman vander heyrscaren ghelaten hadde, bi Godolia Ahicans sone, die Saphans sone was, Ende bi Ieremiam den prophete, ende Baruch Nerias sone,

7

Ende si ghingen in dat lant van Egipten, want si en waren niet gehoorsaem des HEREN stemme, Ende si quamen tot Taphnis.

8

Ende des HEREN woort gesciede tot Ieremiam in Taphnis seggende

9

Neemt in uwe hant groote steenen, ende ghi sultse berghen in die scuere, die inden muer vanden steenen is, ⁺ in die poorte van Pharaons huyse in Taphnis, daert die mannen die Ioden sien,

+ D

10

ende ghi sult tot hen seggen. Dit seyt die HERE der heyrscharen God van Israel. Siet, ick sal seynden, ende ick sal halen Nabuchodonosor den coninc van Babilonien minen knecht, ende ic sal sinen throon setten op die steenen die ic hier verborghen hebbe ende hi salder ^* sinen throon op setten.)

* th. zijn tenten ouer opslaen

11

Ende ⁺ hi sal comen, ende slaen dit lant van Egipten ende die des doots zijn, ter doot, ende die des geuanghenisse zijn, in die gheuanghenisse, ende die des swaerts zijn, inden zwaerde.

+ E

12

Ende hi sal een vier ontsteken inden goden der Egipten tempelen, ende verbernense, ende hi salse gheuanghen leyden. Ende hi sal omgecleet worden metten lande van Egipten, also een herder omghecleet wort met sinen mantel, ende hi sal daer wt reysen in vrede.

13

Ende hy sal in tween breken die ^* beelden) vander zonnen huyse, die int lant van Egipten zijn, ende der goden tempelen van Egipten, sal hi metten viere verbernen.

* th. colomnen

§ Hoe die propheet tvolc straft vander ongehoorsaemheyt ende afgoderie, Ende dreychtse metten swaerde, hongher, ende doot, Ende die vrouwen metten mans antwoorden, dat si Ieremiam niet en souden hooren.