De Vorsterman Bijbel

§ Dat .xlij. Capittel

1

⁺ENde doen ginghen alle die hooftluyden vanden crijschknechten, ende Iohannan Caree sone, ende ^* Iechonias) Iosias sone, ende dat

+ A

* th. Iezanias.

[p. O4v]

ander ghemeyn volck, vanden cleynen totten grooten,

2

tot Ieremiam den propheet, ende seyden, Onse ghebet laet vallen in uwen aensichte, Ende bidt voor ons totten HERE uwen God, voor alle dese ouerghebleuene, Want wi zijn gelaten weynich, van velen, Also v oogen ons aensien.

3

Ende die HERE v God bootscappe ons den wech daer wi door reysen sullen, ende dat woort dat wi doen sullen,

4

Ende Ieremias die propheet seyde tot hen, Ick hebt gehoort, Siet, ic aenbidde den HEERE uwen God, na uwen woorden, Alle woort dat hi mi antwoorden sal, dat sal ic segghen, ende ic en sal v niet met allen heelen.

5

⁺Ende si seyden tot Ieremiam, Die HERE moet tusschen ons zijn een getuyghe der waerheyt, ende des geloofs, ist dat wi niet na elck woort, in welck v die HERE onse God tot ons seynden sal,

+ B

6

also doen sullen, tsi goet oft quaet, Wi sullen gehoorsaem zijn der stemmen ons HEREN ons Gods daer wi v toe seynden, Dat ons wel zijn moet, als wi hooren des HEREN ons Gods stemme,

7

Ende doen .x. dagen volbracht waren, soo gheschiede des HEREN woort tot Ieremiam.

8

⁺Ende hi riep Iohannan Caree sone, ende alle die princen vanden crijsknechten, die met hem waren, ende al dat volc, vanden minsten totten meesten,

+ C

9

ende hi seyde tot hen, Dit seyt die HERE God van Israhel, totten welcken ghi my ghesonden hebt, dat ick uwe ghebet soude brengen in sinen aenscouwen,

10

Ist dat ghi rustende blijft in dit landt, ⁺ so sal ic v stichten, ende niet verderuen, ic sal v planten, ende niet wt roeden ^* Want ic ben nv ghesoent op dat quaet, dat ic v gedaen heb,)

+ D

* th. Want dat ongheluck dat ick v bewesen heb: rouwet mi

11

En wilt v niet ontsien van des conincs aensichte van Babylonien, dien ghi vreesende ontsiet, En wilt hem niet ontsien, seydt dye HERE, Want ic ben met v, dat ic v behouden maken sal, ende ic sal v beschermen van zijnre hant,

12

ende ic sal v ontfermherticheyt geuen, ende ws ontfermen, ende ick sal v doen woonen in uwen lande.

13

Maer ist dat ghi segt, wi en sullen nyet woonen in desen lande, noch wi en sullen niet hooren die stemme ws Gods

14

ende segdy, neen wi niet, Maer wi sullen reysen ten lande waert van Egypten, daer en sullen wi gheenen strijt sien, ende wi en sullen niet hooren dat gheruchte vanden trompetten, ende wi en sullen gheenen hongher lijden, ende sullen daer woonen.

15

Daer om, ghi ouerblijfsel van Iuda, hoort nv des HEEREN woort, ⁺ Dit seyt die HERE der heyrscharen, God van Israel. Ist dat ghi v aensicht sedt, om in Egypten te ghaen, ende gaedy daer in, [kolom] om daer te woonen,

+ E

16

dat swaert dat ghi ontsiet, sal v daer begrijpen int lant van Egypten, ende den honger, daer ghy om besorcht zijt, sal aen v hanghen in Egypten, ende ghi sult daer alle steruen,

17

Ende alle die mannen die haer aensicht setten sullen om in Egypten te gaen, om daer te woonen, die sullen steruen vanden swaerde, ende honger, ende pestilencie. Niemant van hen luyden en sal blijuen, noch ontulieden vanden aensichte des quaets, dat ick op hen brenghen sal,

18

Want dyt seyt dye HERE der heyrscharen, God van Israhel, Also minen toren ende mijn gramschap barnende was, op die ghene die in Iherusalem woonen, also sal mijn gramschap ontsteken worden op v, als ghy in Egypten gaen sult, Ende ghi sult zijn tot eenen ghesworen eedt ende in een verwonderen, ende tot een veruloeckinghe, ende tot een lachtere, ende ghy en sult nimmermeer dese plaetse sien.

19

⁺Want des HEREN woort is tot v, ghy ouerblijfsel van Iuda, En wilt in Egypten niet gaen, Wetende suldi weten, dat ic v huyden getuycht heb,

+ F

20

dat ghi uwe zielen bedrogen hebt, Want ghi sont my totten HEERE onsen God, ende seydet, Bidt voor ons totten HERE onsen God, ende na al, dat v segghen sal die HEERE onse God, dat bootschapt ons, ende wi sullent doen,

21

Ende ic hebt v huyden gebootscapt, ende ghi en hebt niet ghehoort des HEREN ws Gods stemme, van allen dien daer hi mi om tot v ghesonden heeft.

22

Nv hierom suldi wetende weten, dat ghi steruen sult inden swaerde, ende in honger, ende in pestilencie, in dye plaetse daer ghi in gaen wout, om dat ghi daer in woonen sout

§ Hoe Ieremias totten volcke sprack, Ende dat Iohannan tvolc in Egypten leyde, Ende hoe Ieremias steenen, in Taphnis nam, ende borchdese dattet volc sach in die splete, ende seyde dat die coninc van Babilonien daer op soude comen.